BAFILIPI 4

₁Ha ho le joalo, bana beso ba ratehang, bao ke ba hlolohetsoeng haholo, lōna baratuoa, thabo le moqhaka oa ka, emang le tiile joalo Moreneng.

₂Ke rapela Efodia le Sintike hore ba be pelonngoe Moreneng. ₃Le uena molekane oa ka mosebetsing, uena ea tšepahalang, kea u kōpa hore u ba thuse, hobane ba ile ba loanela molaetsa o molemo hammoho le 'na, le Tlelemente le balekane ba bang ba ka, bao mabitso a bona a ngotsoeng bukeng ea bophelo.

₄Kamehla thabang ka ho ba ho Morena; ke boela ke re: Thabang! ₅Mosa oa lōna o ke o tsejoe ke batho bohle. Morena o haufi. ₆Se ngongoreheng ka letho, empa tsohle tseo le li hlokang le li hlahise ho Molimo ka thapelo le kōpo e nang le teboho. ₇Khotso ea Molimo, e fetang kutloisiso eohle, e tla bōlōka lipelo tsa lōna le mehopolo ea lōna ho Kreste Jesu.

₈Qetellong, bana beso, tsohle tseo e leng 'nete, tsohle tse hlomphehang, tsohle tse lokileng, tsohle tse hloekileng, tsohle tse ratehang, tsohle tse babatsehang, leha e le eng le eng e khabane le e rorisehang, tsena le li nahane. ₉Tseo le ithutileng tsona, la li amohela, la li utloa, la li bona ho 'na, le li phethe, 'me Molimo ea re fang khotso o tla ba le lōna.

₁₀Morena o nthabisitse ha e le mona qetellong le ile la boela la nthahasella. Hase ho re le ne le sa nthahaselle, le mpile le sa fumane monyetla. ₁₁Ha ke rialo ka baka la ho hloka, hobane ke ithutile ho khotsofalla boemo boo ke leng ho bona. ₁₂Ke tseba hore na ho kolla ntsi hanong ke eng; ke tseba le hore na ho hafa ka nkatana ke eng. Linthong tsohle, ka mekhoa eohle, ke ithutile ho phela ka ho khōra le ka ho lapa, ka nala le ka bohloki. ₁₃Nka etsa tsohle ka Kreste ea 'matlafatsang.

₁₄Leha ho le joalo, le entse hantle ha le nthusitse tsietsing ea ka. ₁₅Le lōna Bafilipi, lea tseba hore ha ke qala ho phatlalatsa molaetsa o molemo, ha ke tloha Masedonia, ha ho kereke e kileng ea mpuseletsa letho bakeng sa thuso ea ka, haese lōna feela. ₁₆Ha ke ne ke le Thesalonika, ke ka makhetlo le ileng la nthōmella seo ke neng ke se hloka. ₁₇Hase hobane ke batla limpho, empa seo ke se batlang ke hore mosebetsi oa lōna o behe litholoana. ₁₈Ke fumane tsohle tseo ke li hlokang, esita le ho feta; ke thusitsoe kahohle-hohle ka ho amohela ho Epafaroditose tse tsoang ho lōna, tseo e leng nyehelo e monko o monate, sehlabelo se amohelehang, se khahlisang Molimo. ₁₉Molimo oa ka o tla le sitsa ka tsohle tseo le li hlokang, ho ea ka bongata ba maruo a hae, ka Kreste Jesu.

₂₀Joale tlōtla e be ho Molimo Ntat'a rōna kamehla le mehla. A ho be joalo!

₂₁Lumelisang bohle ba lumelang ho Kreste Jesu. Bana babo rōna, bao ke nang le bona, baa le lumelisa. ₂₂Balumeli bohle baa le lumelisa, haholo-holo ba sebetsang tlung ea Sesare.

₂₃Mohau oa Morena Jesu Kreste o ke o be le lōna.