Boikokobetso ba Kreste le ba Mokreste
1Haeba ho Kreste le fumana matšeliso, le khothatso e tsoang leratong, le phelisano le Moea o Halalelang, le mohau, le kutloelobohlōkō, 2le ke le nthabise haholo, ka ho ba pelonngoe, ka ho ba le lerato le tšoanang, le ka ho ba moeamong, le maikutlo a le mang. 3Le se ke la etsa letho ka khang kapa ka boithoriso ba lefeela, empa ka boikokobetso e mong le e mong oa lōna a nke ba bang ba le baholo ho eena. 4Motho ka mong a se ke a italimela tsa hae feela, a mpe a talime le tsa ba bang.
5E-bang le maikutlo ana a neng a le ho Kreste Jesu: 6Eena o ne a e-na le boleng ba Molimo, 'me o ne a sa hopole hore o iphamolela letho ha a re o lekana le Molimo, 7empa o ile a iketsa lefeela, a inkela boleng ba lekhoba, a tšoana le batho, a phela joaloka motho. 8O ile a inyenyefatsa, ea e-ba ea mamelang ho isa lefung, le hona lefu la sefapano. 9Ka baka leo, Molimo o ile a mo phahamisetsa holimo-limo, 'me a mo fa lebitso le hlomphehang ho feta mabitso 'ohle, 10e le hore, ha ho bitsoa lebitso la Jesu, mangoele 'ohle a leholimong, le a lefatšeng, le a katlas'a lefatše, a tle a khumame, 11'me maleme 'ohle a tle a bolele hore “Jesu Kreste ke Morena,” e be tlotliso ho Molimo Ntate.
Khanyang joaloka leseli lefatšeng
12Ka baka leo, baratuoa, le lōna le mamele joaloka kamehla. Etsang joalo, e seng feela ha ke le teng, empa haholo-holo kajeno ha ke le sieo. Sebeletsang pholoho ea lōna ka tšabo le ka thōthōmelo, 13hobane ho rata le ho phetha ha lōna ho sebetsoa ka ho lōna ke Molimo, ka ho ea ka boithatelo ba hae.
14Etsang tsohle ntle ho pelaelo kapa ngangisano, 15e le hore le tle le hloke molato, le se ke la nyatseha, le be bana ba Molimo ba hlokang koli, har'a molōko ona o khopo, o bolotsana, oo ho oona le khanyang joaloka linaleli sebakeng, 16ka ho o tlisetsa lentsoe la bophelo. Ha le etsa joalo, ke tla ithorisa ka lōna mohl'a Letsatsi la ho tla ha Kreste, hobane e tla ba ha kea mathela lelea, ha kea sebeletsa ntat'a-selala. 17Le haeba mali a ka a ka tšolleloa ho ba sehlabelo ho Molimo, se kopanang le nyehelo le tšebeletso ea tumelo ea lōna, hoo ho tla nthabisa, 'me ke tla thaba le lōna bohle. 18Ka lona lebaka leo, le lōna thabang, 'me le thabe 'moho le 'na.
Timothea le Epafaroditose
19Ka thuso ea Morena Jesu ke tšepile ho le rōmela Timothea haufinyane, le 'na ke tle ke khothale ha ke utloa tsa bophelo ba lōna. 20Ke eena feela mona ea nang le maikutlo a kang a ka, ea le thahasellang. 21Bohle ba ipatlela tsa bona, e seng tseo e leng tsa Kreste Jesu. 22Timothea o pakoa ke mesebetsi ea hae. Le tseba hore o nthusitse ho phatlalatsa molaetsa o molemo, joalokaha mora a thusa ntat'ae. 23Ka baka leo, ke eena eo ke hopotseng ho mo rōma, hang-hang ha ke bone boemo ba litaba tsa ka. 24Ka thuso ea Morena ke na le tšepo e tiileng ea hore le 'na ke tla tla ho lōna haufinyane.
25Hape ke fumana ho lokela hore ke rōme ngoan'abo rōna Epafaroditose, eo re thusaneng le eena mosebetsing le ntoeng, eo le neng le mo laele ho tla ntšebeletsa ha ke ne ke hloka thuso. 26O le hlolohetsoe bohle, o tšoenyehile haholo, hobane le ne le utloe hore o ile a kula. 27E, ke 'nete o ne a kulela lefu, empa Molimo o ile a mo hauhela. Ha aa ka a hauhela eena feela, empa le 'na o nkhauhetse, esere ka sithabetsoa ke masoabi. 28Ka baka leo, ke thabetse ho mo rōmela ho lōna, le tle le thabele ho 'mona hape, le 'na masoabi a ka a tle a fokotsehe. 29Mo amoheleng ka thabo ka lebitso la Morena. Hlomphang ba kang eena, 30hobane ka baka la mosebetsi oa Kreste o ile a batla a e-shoa, feela a sa re letho ka bophelo ba hae, a mpa a iteletse ho ntšebeletsa moo lōna le sitiloeng ho ntšebeletsa teng.
