1Joale bana ba Iseraele ba tsoela pele leetong, ba ea hloma liphuleng tsa Moabe, pel'a Jorodane, mabapa le Jeriko.
Khosi ea Moabe e bitsa Bileame
2Balake, mora oa Sipore, a bona tsohle tseo Baiseraele ba li entseng ho Baamore. 3Bamoabe ba tšaba sechaba seo haholo, hobane se ne se le sengata haholo. Bamoabe ba tšoha haholo ka baka la bana ba Iseraele.
4Bamoabe ba re ho baholo ba Midiane: “Letšoelehali lena le tla qeta tsohle tse re pota-potileng, joalokaha pholo e fula joang naheng.”
Balake, mora oa Sipore, e ne e le eena khosi ea Moabe ka nako eo. 5A rōmela maqosa naheng ea Baamone, ho ea bitsa Bileame, mora oa Beore, ea neng a le Petore e pel'a Nōka, a re: “Bona, sechaba ke sena se tsoang Egepeta, se pupelitse naha eohle; se ahile pel'a ka. 6Tloo hle, u nthōhakele sechaba sena, hobane se matla ho mpheta. Mohlomong nka tseba ho se hlōla, ka se leleka naheng ena, hobane kea tseba hore motho eo u mo hlohonolofatsang, o hlohonolofalitsoe, 'me eo u mo rōhakang, o rōhakehile.”
7Baholo ba Moabe le baholo ba Midiane ba tloha ba nkile chelete ea bonohe. Ba fihla ho Bileame, 'me ba mo phetela molaetsa oa Balake.
8Eaba Bileame o re ho bona: “Robaletsang mona bosiung bona, 'me ke tla le arabela ho ea komoo Morena a tla bua le 'na kateng.” Mahosana ana a Moabe a robaletsa ha Bileame.
9Molimo a fihla ho Bileame, a re: “Banna baa ba nang le uena ke bo-mang?”
10Bileame a re ho Molimo: “Balake, mora oa Sipore, khosi ea Moabe, o nthōmeletse molaetsa ona: 11‘Bona, sechaba ke sena se tsoang Egepeta se pupelitse naha; joale tloo, 'me u nthōhakele sona, mohlomong nka tseba ho se hlōla, ka se leleka.’ ”
12Molimo a re ho Bileame: “U se ke ua ea le banna bao. U se ke ua rōhaka sechaba seo, hobane se hlohonolofalitsoe.”
13Bileame a tsōha e sa le hoseng, a re ho mahosana a Balake: “Khutlelang naheng ea habo lōna, hobane Morena ha a ntumelle ho tsamaea le lōna.”
14Mahosana a Moabe a tsamaea, a khutlela ho Balake, a re: “Bileame o hanne ho tla le rōna.”
15Balake a boela a rōmela mahosana a mang hape, a tumileng haholo ho feta a pele. 16Mahosana ao a fihla ho Bileame, 'me a re ho eena: “Balake, mora oa Sipore, o buile tjena: ‘Ho se be letho le ka u thibelang ho tla ho 'na, kea u kōpa. 17Ke tla u tlōtla haholo, 'me ke tla etsa eng kapa eng eo u tla ntaela eona. Ka baka leo, tloo, kea u rapela. Nthōhakele sechaba sena!’ ”
18Bileame a arabela bahlanka ba Balake, a re: “Leha Balake a ka mpha ntlo ea hae e tletse silefera le khauta, nke ke ka tlōla taelo ea Morena Molimo oa ka, ka ho etsa ntho e kholo kapa e nyenyane. 19Joale le lōna kea le rapela; robaletsang mona bosiung bona, hore ke tle ke tsebe seo Morena a ntaelang sona hape.”
20Molimo a fihla ho Bileame bosiu, 'me a re ho eena: “Haeba banna bana ba tlil'o u bitsa, ema, u tsamaee le bona. Feela uena u tla etsa seo ke tla u bolella sona.” 21Bileame a tsōha e sa le hoseng, a qhaneha tonki ea hae, a tsamaea le mahosana a Moabe.
Tonki ea Bileame
22Khalefo ea Morena ea tlōkōma, hobane Bileame a ile a tsamaea. Lengeloi la Morena la mo thibela tseleng, a ntse a palame tonki ea hae, a e-na le bahlanka ba hae ba babeli. 23Ha tonki e bona lengeloi la Morena le eme ka tseleng, le tšoere sabole ka letsohong la lona, tonki ea kheloha tsela, ea hlahlathela. Empa Bileame a e shapa ho e khutlisetsa tseleng.
24Lengeloi la Morena la ema ka tseleng e tšesanyane, e pakeng tsa lirapa tsa morara. Lerako le ne le le teng ka nq'ena le ka nq'ane. 25Tonki ea bona lengeloi la Morena, eaba e thula lerako, e peteletsa leoto la Bileame lerakong. Bileame a e shapa hape.
26Lengeloi la Morena la tsoela pele, la ema mopatisaneng o moholo, hoo ho neng ho se sebaka sa ho thinyetsa ka ho le letona kapa ka ho le letšehali. 27Ha tonki e bona lengeloi la Morena, ea botha Bileame a ntse a e palame. Khalefo ea Bileame ea tlōkōma, a e mamōla ka molamu.
28Morena a etsa hore tonki e bue, 'me ea re ho Bileame: “Ke u senyelitse eng, ha e le moo u nchapile hararo tjee?”
29Bileame a re ho tonki: “Ke hobane u bapala ka 'na! Hoja ke ne ke tšoere sabole, hona joale nka be ke se ke u bolaile.”
30Tonki ea re ho Bileame: “Na ha ke tonki ea hao, eo esaleng u e palama haesale u tsoaloa, ho fihlela kajeno? Na ke 'ne ke u etse tjee?”
Bileame a re: “Che.”
31Joale Morena a tutubolla mahlo a Bileame. A bona lengeloi la Morena le eme ka tseleng, le tšoere sabole ka letsoho; eaba oa inama, o itihela fatše ka sefahleho.
32Lengeloi la Morena la re ho eena: “Ke hobane'ng ha u shapile tonki ea hao ka makhetlo a mararo? Bona mona, ke tlile ho tla u thibela, hobane tsela ea hao e isa timelong. 33Tonki e ile ea mpona, 'me ka makhetlo a mararo ea nkoekoetla. Hojane ea se ke ea nkoekoetla, ruri hona joale nka be ke se ke u bolaile, empa eona nkabe ke e babaletse.”
34Bileame a re ho lengeloi la Morena: “Ke sitiloe, hobane ke ne ke sa tsebe hore u nthibetse tsela. Haeba u nkhalefetse nka mpa ka khutla.”
35Lengeloi la Morena la re ho Bileame: “Tsamaea le banna bana, feela u e'o bolela seo ke tla u bolella sona.” Bileame a tsamaea le mahosana a Balake.
Balake o amohela Bileame
36Ha Balake a utloa hore Bileame o ntse a e-tla, a ea mo khahlanyetsa motseng oa Moabe, o moeling oa Arenone, moo moeli o fellang teng.
37Balake a re ho Bileame: “Na ha kea ka ka fela ka rōma maqosa ho ea u bitsa? Ke hobane'ng u sa kang ua tla ho 'na? Na ruri ke sitoa ho u tlōtla?”
38Bileame a re ho Balake: “Bona he, ke se ke le teng. Ke na le matla afe a ho bua letho? Ke tla bua feela seo Molimo a reng ke se bue.”
39Bileame a tsamaea le Balake, ba ea fihla Kiriate-Husote. 40Balake a etsa sehlabelo ka lipholo le linku, a rōmela litho tse ling tsa tsona ho Bileame le ho mahosana a neng a e-na le eena. 41Ka la hosasane, Balake a tsamaea le Bileame, a mo isa Bamote-Baale, moo a ileng a bona karolo e 'ngoe ea sechaba sa Iseraele.
