Bakanana baa hlōloa
1Ha khosi Arada oa Mokanana, ea neng a ahile Negebe, a utloa hore Iseraele o ntse a e-tla ka tsela ea Atarime, a loantša Baiseraele, 'me a hapa ba bang ba bona. 2Eaba Iseraele oa hlapanya, o re ho Morena: “Ruri haeba u ka mpha matla a ho hlōla sechaba sena, ke tla ripitla metse ea sona ho hang.” 3Morena a utloa Iseraele, 'me a mo fa matla a ho hlōla Bakanana. Baiseraele ba ripitla Bakanana le metse ea bona ho hang. Eaba sebaka seo ba se rea lebitso la Horema.
Nōha ea lethose
4Ho tloha thabeng ea Hore ba tsamaea ka tsela e eang Leoatleng la Lehlaka, hore ba kekolohe naha ea Edomo. Sechaba sa felloa ke mamello tseleng. 5Sechaba sa nyatsa Molimo le Moshe, sa re: “Ke hobane'ng ha le re nyolotse Egepeta, hore re tl'o shoela moo lehoatateng? Mona ha ho na lijo, ha ho na le metsi, re tenehile le ke lijo tse mpe!”
6Eaba Morena o rōmela linōha tse mahlōkō har'a sechaba, tsa lōma batho, 'me Baiseraele ba bangata ba e-shoa. 7Sechaba sa tla ho Moshe, sa re: “Re entse sebe, hobane re loantšitse Morena, le uena re u loantšitse. Ak'u rapele Morena hore a tlose linōha tsena har'a rōna.” Moshe a rapella sechaba.
8Morena a re ho Moshe: “Bōpa nōha e mahlōkō, u e fanyehe sefateng. E mong le e mong ea lōmiloeng, ha a e talima o tla fola.” 9Moshe a bōpa nōha ka lethose, a e fanyeha sefateng. E ne e ee ere ha mang kapa mang ea lōmiloeng ke nōha a talima nōha ena ea lethose, ebe oa fola.
Ho uoa likhohlong tsa Moabe
10Bana ba Iseraele ba tsoela pele leetong, 'me ba ea hloma Obote. 11Ho tloha Obote ba ea hloma masuping a lithabeng tsa Abarime, lehoatateng le ka bochabela ho Moabe. 12Ho tloha moo ba tsoela pele leetong, ba ea hloma khohlong ea Serede. 13Ho tloha moo ba tsoela pele leetong, ba ea hloma ka nq'ane ho Arenone e lehoatateng le nametseng ho ea fihla moeling oa Baamore, hobane Arenone ke oona moeli oa Bamoabe le Baamore. 14Ke ka hona, Bukeng ea lintoa tsa Marena, ho thoeng:
“Wahebe e Sufa,
le likhohloana tsa Arenone;
15le methipoloha ea likhohloana
tse lelemellang liahelong tsa Are,
tse sikang le moeli oa Moabe.”
16Ho tloha moo ba tsoela pele leetong, ba ea Selibeng. Ke sona seliba seo Morena a ileng a bua ho Moshe ka sona, a re: “Bōkanya sechaba kaofela, 'me ke tla se fa metsi.”
17Ke ha Baiseraele ba bina pina, ba re:
“Runya-runya, uena seliba;
lōna se bineleng!
18Seliba se chekiloeng ke mahosana,
sa habolloa ke marena a sechaba,
ka lere la khosi
le ka mare a marena.”
Ho tloha Selibeng ba ea Matana; 19ho tloha Matana ba ea Nahaleele, 'me ho tloha Nahaleele ba ea Bamote; 20ho tloha Bamote ba ea khohlong e naheng ea Moabe, kaholimo ho Pisega, e okametseng lehoatata.
21Joale Baiseraele ba rōmela maqosa ho Sihone, khosi ea Baamore, hore a re:
22“Re lumelle re fete har'a naha ea hao. Re ke ke ra khelohela masimong, kapa lirapeng tsa morara; re ke ke ra noa le metsi a liliba; re tla itsamaela feela 'mileng o moholo oa khosi, ho fihlela re ba re tlōla moeli oa hao.”
23Empa Sihone a se ke a lumella Baiseraele ho tšela moeli oa hae. A bōkanya sechaba sa hae kaofela, a tsoa, a futuhela Baiseraele lehoatateng. A ea fihla Jahase, moo a ileng a loana le Baiseraele teng. 24Baiseraele ba bolaea Sihone ka sabole, ba hapa naha ea hae, ho tloha Arenone ho ea fihla Jaboko, le ho ea fihla naheng ea bana ba Amone, hobane moeli oa bana ba Amone o ne o raletsoe.
25Baiseraele ba hapa metse ena eohle, 'me ba aha metseng eohle ea Baamone, e leng Heshebone le metsana e mathōkong a eona. 26Heshebone e ne e le motse-moholo oa Sihone, khosi ea Baamore. Ke eena Sihone ea neng a loantše khosi ea pele ea Moabe, a hapa naha eohle ea khosi eo ho ea fihla Arenone. 27Ke ka hona baroki ba reng:
“Lōna, tloong Heshebone!
Ho hahoe motse oa Sihone, o tiee.
28“Mollo o qhōmme Heshebone,
Khabo ea tlōla motseng oa Sihone,
ea metsa Are-Moabe,
le marena a lihlaba tsa Arenone.
29U malimabe hakaakang,
uena Moabe!
Le timetse lōna, chaba sa Kemoshe!
O tlohetse bara ba hae
ho ba baphaphathehi,
barali ba hae ho ba batšoaruoa,
batšoarua ba Sihone,
khosi ea Baamore.
30“Re ba timelitse ho hang,
ho tloha Heshebone
ho ea fihla Dibone,
ra ba nanaola ho ea fihla Nofa,
khabo ea laima
ho ea fihla Medeba.”
31Ka mokhoa ona Baiseraele ba aha naheng ea Baamore.
32Moshe a rōmela lihloela Jasere. Baiseraele ba hapa Jasere le metse e mathōkong a eona, ba leleka Baamore ba neng ba ahile moo.
Oge oa hlōloa
33Baiseraele ba thinya, ba nyoloha ka tsela e eang Bashane. Oge, khosi ea Bashane, a tsoa a e-na le sechaba sa hae sohle, a ba futuhela, 'me a ba loantša Ederei.
34Morena a re ho Moshe: “U se ke ua mo tšaba, hobane eena, 'moho le sechaba sa hae sohle, le naha ea hae, ke nehelane ka eena matsohong a hao. U tla mo etsa seo u neng u se etse Sihone, khosi ea Baamore, ea neng a ahile Heshebone.”
35Ba bolaea Oge, le bara ba hae, le sechaba sa hae sohle, ho fihlela ho se le ea mong ea setseng. Naha ea hae ea e-ba ea bona.
