Baetapele ba merabe
1Morena a bua ho Moshe le ho Arone, a re: 2“Ha bana ba Iseraele ba hloma litente tsa bona, e mong le e mong oa bona a be pel'a mokhele oa hae, tlas'a folakha ea ntlo ea ntat'ae. Ba tla hloma litente tsa bona li pota-potile Tente ea Morena, feela ba be hōjana le eona.
3“Ba tla hloma ka bochabela e tla ba ba nkileng mokhele oa mokhetho oa Juda, ho ea ka mabōtho a bona. Khosana ea bana ba Juda e tla ba Naheshone, mora oa Aminadabe. 4Palo ea lebōtho la hae e ne e le likete tse mashome a supileng le metso e mene le makholo a tšeletseng.
5“Ba tla hloma pel'a Juda e tla ba ba morabe oa Isakare, 'me khosana ea morabe oa Isakare e tla ba Netanele mora oa Suare. 6Palo ea lebōtho la hae e ne e le likete tse mashome a mahlano le metso e mene le makholo a mane.
7“Joale e be morabe oa Sebulone, 'me khosana ea bana ba Sebulone e tla ba Eliabe, mora oa Helone. 8Palo ea lebōtho la hae e ne e le likete tse mashome a mahlano le metso e supileng le makholo a mane.
9“Palo eohle ea mokhetho oa Juda e ne e le likete tse lekholo le mashome a robeli a metso e tšeletseng le makholo a mane, ho ea ka mabōtho a bona, 'me ke bona ba tla tloha pele.
10“Ba nkileng mokhele oa mokhetho oa Rubene ba tla ba ka boroa, ho ea ka mabōtho a bona. Khosana ea bana ba Rubene e tla ba Elesure, mora oa Shedeure. 11Palo ea lebōtho la hae e ne e le likete tse mashome a mane le metso e tšeletseng le makholo a mahlano.
12“Ba tla hloma pel'a hae e tla ba ba morabe oa Simeone, 'me khosana ea bana ba Simeone e tla ba Shelōmiele, mora oa Surishadai. 13Palo ea lebōtho la hae e ne e le likete tse mashome a mahlano le metso e robong le makholo a mararo.
14“Joale e be morabe oa Gade, 'me khosana ea bana ba Gade e tla ba Eleasafo, mora oa Reuele. 15Palo ea lebōtho la hae e ne e le likete tse mashome a mane le metso e mehlano le makholo a tšeletseng le mashome a mahlano.
16“Palo eohle ea mokhetho oa Rubene e ne e le likete tse lekholo le mashome a mahlano le motso o le mong le makholo a mane le mashome a mahlano, ho ea ka mabōtho a bona, 'me ke bona ba tla latela ba tlohileng pele.
17“Joale Tente ea Morena e tla tloha e jeroe, mokhetho oa Balevi o tsamaee pakeng tsa mekhetho e 'meli e kapele, le e 'meli e kamorao; mekhetho e tsamaee kaho hlahlamana, joalokaha e ne e hlahlamantsoe ha ho hlongoa; monna e mong le e mong a be sebakeng sa hae, pel'a mokhele oa hae.
18“Ba nkileng mokhele oa mokhetho oa Efraime, ho ea ka mabōtho a bona, ba be ka lehlakoreng le ka bophirimela. Khosana ea bana ba Efraime e tla ba Eleshama, mora oa Amihude. 19Palo ea ba baliloeng ba lebōtho la hae ea e-ba likete tse mashome a mane le makholo a mahlano.
20“Pel'a bao e tla ba ba morabe oa Manase. Khosana ea bana ba Manase e tla ba Gamaleele, mora oa Pedasure. 21Palo ea ba baliloeng ba lebōtho la hae ea e-ba likete tse mashome a mararo le metso e 'meli le makholo a mabeli.
22“Joale e be morabe oa Benjamine. Khosana ea bana ba Benjamine e tla ba Abidane, mora oa Gidoni. 23Palo ea ba baliloeng ba lebotho la hae ea e-ba likete tse mashome a mararo le metso e mehlano le makholo a mane.
24“Bohle ba baliloeng ba mokhetho oa Efraime ea e-ba likete tse lekholo le metso e robeli le lekholo, ho ea ka mabotho a bona, 'me e tla ba ba boraro ba tlohang.
25“Ba nkileng mokhele oa mokhetho oa Dane ba tla ba ka lehlakoreng le ka leboea, ho ea ka mabōtho a bona. Khosana ea bana ba Dane e tla ba Ahiesere, mora oa Amishadai. 26Palo ea ba baliloeng ba lebōtho la hae ea e-ba likete tse mashome a tšeletseng le metso e 'meli le makholo a supileng.
27“Pel'a bao e tla ba ba morabe oa Ashere. Khosana ea bana ba Ashere e tla ba Pagiele, mora oa Okerane. 28Palo ea ba baliloeng ba lebōtho la hae ea e-ba likete tse mashome a mane le motso o le mong le makholo a mahlano.
29“Joale e be morabe oa Nafthali. Khosana ea bana ba Nafthali e tla ba Ahira, mora oa Enane. 30Palo ea ba baliloeng ba lebōtho la hae ea e-ba likete tse mashome a mahlano le metso e meraro le makholo a mane.
31“Bohle ba baliloeng ba mokhetho oa Dane ea e-ba likete tse lekholo le mashome a mahlano le metso e supileng le makholo a tšeletseng, 'me bona e tla ba ba ho qetela ba tlohang.”
32Bana ke bana ba Iseraele ba ileng ba baloa, ho ea ka matlo a bo-ntat'a bona. Bohle ba mekhetho ba baliloeng ho ea ka mabitso a bona ea e-ba likete tse makholo a tšeletseng le metso e meraro le makholo a mahlano le mashome a mahlano. 33Empa ha e le Balevi ha ba ka ba balelloa le bana ba Iseraele, joalokaha Morena a ne a laetse Moshe.
34Bana ba Iseraele ba etsa joalokaha Morena a ne a laetse Moshe. Ba hloma pela mekhele ea bona, ba tsoela pele leetong, e mong le e mong le ba lelapa la hae, ho ea ka matlo a bo-ntat'a bona.
