Nehemia o ea Jerusalema
1Ka khoeli ea 'Mesa, ka selemo sa mashome a mabeli sa puso ea khosi Aretaseresese, veine e ne e beiloe kapele ho eena. Ka nka veine ena, ka e nea khosi. Pele ho mona, ke ne ke e-s'o ka ke ema kapele ho khosi ke hlorile. 2Eaba khosi e re ho 'na: “Ke ka lebaka la'ng ha u bonahala u hlorile, empa u sa kule? Hona ho supa hore moea oa hao oa ngongoreha.”
Eaba ke tšoha haholo. 3Ka re ho khosi: “Khosi a e ke e re phelele! Ke tlamehile ho hlora, hobane motse oo mabitla a bo-ntate a leng ho oona, o fetohile lesupi, 'me mamati a oona a chesitsoe ka mollo.”
4Joale khosi ea re ho 'na: “U rata ha ke u etsetsa eng?”
5Eaba ke rapela Molimo oa maholimo. Ka re ho khosi: “Haeba khosi e ka khahloa, 'me eba e hauhetse mohlanka oa eona, a e ke e nthōme naheng ea Juda, motseng oo mabitla a bo-ntate a leng ho oona, e le hore ke tle ke o tsose.”
6Mofumahali o ne a lutse lehlakoreng la khosi, ha khosi e re ho 'na: “Leeto la hao le tla nka nako e kae, 'me u khutle neng?” Khosi ea ananela kōpo ena ea ka, ea ntumella hore ke tsamaee. Ka e bolella hore na ke tla nka nako e kae.
7Ka boela ka re ho khosi: “Haeba khosi e ka khahloa, a nke ke neoe mangolo a eang ho babusi ba naha e ka bophirimela ho nōka ea Euferatese, e le hore ba tle ba ntumelle ke fete, ke be ke e'o fihla naheng ea Juda. 8Hape ke neoe le lengolo le eang ho Asafo, molebeli oa moru oa khosi, e le hore a tle a mphe lifate tse tla etsa menyako ea qhobosheane, e pel'a Tempele, le ea lerako la motse, le ea ntlo ea ka ea bolulo.”
Khosi ea amohela kōpo ea ka, hobane Molimo oa ka o ne a ntlhohonolofalitse.
9Ha ke fihla ho babusi ba naha e ka bophirimela ho nōka ea Euferatese, ka ba nea mangolo a khosi. Khosi e ne e rōmetse balaoli ba mabōtho, le bahlabani ba palamang, hore ba tsamaee le 'na.
10Ha bo-Sanebalate oa Mohore, le Tobiea oa Moamone, eo e neng e le mohlanka oa 'muso, ba utloela taba ena ea hore ho fihlile monna ea tlil'o ntlafatsa tsa bophelo ba bana ba Iseraele, ba tšoenyeha haholo.
Nehemia o hlahloba marako a Jerusalema
11Ka fihla Jerusalema, 'me ka ba moo ka matsatsi a mararo. 12Ka tsoha har'a bosiu ke e-na le banna ba 'maloana. Ka se ke ka bolella motho, seo Molimo oa ka a itseng ke tl'o se etsetsa motse oa Jerusalema. Ho ne ho se na phoofolo le e 'ngoe, haese eo ke neng ke e palame.
13Ka tsoa har'a bosiu joalo, ka feta Monyakong o ka Khohlong, ka feta le Selibeng sa Khanyapa, ka fihla Monyakong oa Thōtōbōlō. Ka hlahloba marako a Jerusalema a helelitsoeng, le mamati a 'ona a chesitsoeng. 14Eaba ke fetela Monyakong oa Seliba, le Letšaneng la Khosi, empa ho ne ho se moo phoofolo eo ke neng ke e palame e neng e ka feta le teng. 15Ka nyolosa joalo le bosiu, ke ikhōhlile ka molatsoana; ka 'na ka hlahloba lerako, ka nt'o khutla, ka kena ka Monyako oa Khohlo. 16Babusi ba ne ba sa tsebe moo ke ileng teng, kapa seo ke ileng ho se etsa; esita la Bajuda, le baprista, le mahosana, le babusi, le ba bang ba neng ba sebetsa, ke ne ke e-s'o ka ke ba bolella letho.
17Eaba ke re ho bona: “Le bona tsietsi eo re leng har'a eona, le kamoo Jerusalema e leng lesupi kateng, le kamoo menyako ea eona e chesitsoeng kateng. Tloong, re haheng lerako la Jerusalema, re tle re se ke ra ba le sekhobo.” 18Ka ba bolella kamoo Molimo oa ka a ileng a ntlhohonolofatsa kateng; ka ba bolella le seo khosi e mpoleletseng sona.
Eaba ba re: “A re qaleng ho tsosa lerako!” Ba kena mosebetsing ona o khabane ka mafolofolo.
19Empa ha bo-Sanebalate oa Mohore, le Tobiea oa Moamone, eo e neng e le mohlanka oa 'muso, le Gashemu oa Moarabia, ba utloela hona, ba re soma, ba re nyelisa, 'me ba re: “Ke ntho 'ngoe ee, eo le e etsang? Na le fela le fetohela khosi?”
20Eaba kea ba araba, ke re ho bona: “Molimo oa maholimo ke eena ea tla re atlehisa; ka baka lena, rōna, bahlanka ba hae, re tla ema ka maoto, re hahe. Ha e le lōna, mona Jerusalema, ha le na kabelo, kapa tokelo, kapa sefika.”
