Jesu o hanoa Nasaretha
1Jesu a tloha moo, a fihla motseng oa habo, 'me barutuoa ba hae ba mo latela. 2Ha Sabatha se fihlile, a qala ho ruta ka tlung ea thapelo, 'me ha bongata bo utloa, ba hlolloa, ba re: “Lintho tsee, eo o li nka kae? Bohlale boo a bo filoeng ke bo joang? O etsa liketso tse matla hakaakang ka matsoho a hae! 3Na eo hase 'metli oa mapolanka, mor'a Maria, le ngoan'abo Jakobo, le Joseta, le Juda le Simone na? Na likhaitseli tsa hae ha li har'a rōna moo?” Ba khopiseha ke eena.
4Jesu a re ho bona: “Moporofeta o hlomphuoa hohle haese motseng oa habo har'a bang ka eena, le tlung eabo feela.”
5A sitoa ho etsa ketso e matla leha e le 'ngoe moo, haese ho bea bakuli ba seng bakae matsoho, a ba folisa. 6A makalla ho se lumele ha batho ba teng.
Thōmo ea ba leshome le metso e 'meli
A potoloha le metsana a ntse a ruta. 7Eaba o bitsa ba leshome le metso e 'meli, a qala ho ba rōma ka bobeli, a ba nea matla holim'a meea e litšila.
8A ba laela hore ba se ke ba nka letho ha ba eta haese lere feela, ho se be bohobe, kapa mokotlana, leha e le chelete ea lethose lipacheng tsa bona; 9ba roale meqathatso, ba se ke ba apara liaparo tse peli. 10A re ho bona: “Kae le kae moo le kenang ka tlung le hlole teng ho fihlele le tloha. 11Ha le e-tsoa sebakeng sefe kapa sefe seo ba sa le amoheleng ho sona, le ho le mamela, le hlōhlōre lerōle maotong a lōna, e be bopaki bo ba qosang.”
12Hoba ba ee, ba ruta batho hore ba bake; 13ba leleka bademona ba bangata, 'me ba tlotsa bakuli ba bangata ka ole, ba ba folisa.
Polao ea Johanne Mokolobetsi
14Khosi Heroda a utloa tsena, hobane lebitso la Jesu le ne le tumile. Ho ne ho thoe Johanne Mokolobetsi o tsohile bafung, ka baka leo, matla a hlollang a sebetsa ka eena.
15Ba bang ba ne ba re ke Elia; ba bang bona ba re ke moporofeta ea joaloka e mong oa baporofeta.
16Empa Heroda ha a utloa, a re: “Johanne eo ke mo khaotseng hlooho, o tsohile bafung.”
17Heroda o ne a ile a tšoara Johanne, a mo hlahlela chankaneng ka baka la Herodiase mosali oa moen'ae Filipi, eo Heroda a neng a mo nyetse. 18Johanne o ne a ile a re ho Heroda: “Ha ho lumelloe hore u nyale mosali oa ngoan'eno.”
19Herodiase o ne a qōphile Johanne, 'me a rata ho 'molaea, a mpa a sitoa. 20Heroda o ne a tšaba Johanne ka ho tseba hore ke monna ea lokileng, ea halalelang, 'me a mo sireletsa. Ha a mo utloa o ne a tsieleha haholo, le hoja a ne a thabela ho mo utloa.
21Nako e lokelang ea fihla, ha Heroda a etsetsa matona a hae, le balaoli ba hae ba mabōtho, le batho ba ka sehloohong ba Galelea mokete oa khopotso ea tsoalo ea hae. 22Hoba morali oa Herodiase a kene, a etsa motjeko, a khahlisa Heroda le ba leng lijong le eena. Khosi ea re ho ngoanana eo: “Nkōpe eng kapa eng eo u e ratang, 'me ke tla u fa eona.” 23Eaba oa mo hlapanyetsa, o re: “Ke tla u fa eng kapa eng eo u tla nkōpa eona, leha e ka ba halofo ea 'muso oa ka.”
24Ngoanana a tsoa, a re ho 'm'ae: “Ke kōpe eng?”
'M'ae a re: “Hlooho ea Johanne Mokolobetsi.”
25Ngoanana a kena ka ho khosi ka potlako, a kōpa, a re: “Ke rata hore hona joale u mphe hlooho ea Johanne Mokolobetsi ka mokèkè.”
26Khosi ea soaba haholo, empa ka baka la kano ea eona, le ka baka la ba leng lijong, ea tšaba ho mo hanela. 27Khosi ea rōma 'molai, ea mo laela ho tlisa hlooho ea Johanne. 'Molai a ea, a mo khaola hlooho chankaneng, 28a tlisa hlooho eo ka mokèkè, a e fa ngoanana, 'me ngoanana a e fa 'm'ae. 29Ha barutuoa ba Johanne ba utloa hona, ba tla, ba nka setōpō sa hae, ba se epela lebitleng.
Jesu o fepa ba kete tse hlano
30Baapostola ba phuthehela ho Jesu, ba mo tsebisa tsohle tseo ba li entseng, le tseo ba li rutileng. 31A re ho bona: “Tloong, re eeng nahathothe moo ho leng ngoèsè, le phomole hanyenyane,” hobane ba tlang le ba tlohang ba ne ba le bangata, 'me ba hloka le sebaka sa ho ja.
32Ba kena ka sekepeng, ba ea nahathothe boinotšing.
33Bongata ba ba bona ha ba tloha, 'me ba ba tseba, eaba batho ba mathela teng hammoho, ba e-tsoa metseng eohle, ba ba fihlela pele. 34Jesu ha a e-tsoa ka sekepeng, a bona letšoelehali, a le utloela bohlōkō, hobane le ne le le joaloka linku tse hlokang molisa, 'me a qala ho le ruta litaba tse ngata.
35Ha letsatsi le se le ile, barutuoa ba hae ba tla ho eena, ba re: “Mona ke nahathothe, 'me letsatsi le se le ile; 36lokolla batho, ba tle ba e'o ithekela seo ba ka se jang metseng le metsaneng e re teetseng hare.”
37Empa a ba araba, a re: “Ba fepeng e le lōna!”
Ba re ho eena: “Na re ka ea reka bohobe ka lidenare tse makholo a mabeli, ra ba fepa na?”
38Eena a re ho bona: “Le na le linkhoa tse kae? E-eang, le bone!”
Ha ba se ba fumane, ba re: “Li hlano, le litlhapi tse peli.”
39A laela barutuoa hore ba lulise batho kaofela ka lihlopha-hlopha joanng bo botalana. 40Ba lula ka maquloa-quloana a ba lekholo, le ba mashome a mahlano. 41A nka linkhoa tse hlano le litlhapi tse peli, a lelalla leholimong, a boka, a ngoatha bohobe, a bo nea barutuoa ba hae, hore ba abele batho, le litlhapi tse peli a li arolela bohle. 42Bohle ba e-ja, ba khōra, 43eaba ho bōkelloa makumane le marathana a litlhapi a ileng a tlatsa lirōtō tse leshome le metso e 'meli. 44Ba jeleng bohobe e ne e le banna ba kete tse hlano.
Jesu o tsamaea holim'a metsi
45Kapele-pele Jesu a laela barutuoa ba hae ho kena ka sekepeng, ho mo etella pele ho ea mose Bethesaida, ha eena a ntse a qhala letšoele. 46Hoba a ba lumelise, a ea thabeng ho rapela.
47Mantsiboea, sekepe se ne se le bohareng ba letša, eena a le 'notši lebōpong. 48A bona hore ba soka haboima, hobane ba ne ba tobane le moea. Ha e batla e e-ba kameso, a ea ho bona a tsamaea holim'a letša, a il'o ba feta. 49Empa ha ba 'mona a tsamaea holim'a letša, ba hopola hore ke sethotsela, 'me ba bokolla, 50hobane ba ne ba 'mona bohle, 'me ba tšoha.
Empa a phakisa a bua le bona, a re: “Khobang matšoafo, ke 'na; se tšabeng!” 51A kena ho bona ka sekepeng, 'me moea oa teba; ba hlolloa ka ho fetisisa, 52hobane ba ne ba sa ka ba utloisisa taba ea linkhoa, pelo tsa bona li thatafetse.
Jesu o folisa bakuli Genesareta
53Hoba ba tšele, ba fihla lebōpong la Genesareta, 'me ba emisa teng. 54Hoba ba tsoe ka sekepeng, batho ba tseba Jesu hang-hang, 55ba matha sebakeng seo sohle, 'me ba qala ho mo tlisetsa ba kulang ka liphate hohle moo ba utloelang hore o hona teng. 56Kae le kae moo a neng a kena metseng le metsaneng le hohle, ba bea bakuli mabaleng a metse, ba mo rapela hore a ba lumelle ho ama leha e le qola ea seaparo sa hae feela, 'me bohle ba mo amileng ba fola.
