MAREKA 5

₁Eaba ba fihla ka mose oane ho letša, naheng ea Bagerasa. ₂Eare ha a e-tsoa ka sekepeng, a re ptjang-ptjang le monna ea nang le moea o litšila, a e-tsoa har'a mabitla, ₃moo a neng a phela teng, 'me ho ne ho se ea ka hlolang a mo tlama le ka ketane, ₄hobane o ne a hlola a tlangoa ka mahlaahlela le ka liketane, ebe liketane oa li ngamolla, mahlaahlela a a khaole likotoana. Ho ne ho se ea ka mo hlōlang ka matla. ₅Kamehla, bosiu le motšeare, o ne a hōoa a le har'a mabitla le lithabeng, 'me a itšèha ka majoe.

₆Eare ha a bona Jesu a sa le hōle, a matha, a fihla, a mo khumamela. ₇A hōoa ka lentsoe le phahameng, a re: “U nkene ka'ng, Jesu, Mora oa Molimo ea holimo-limo? Ke u rapela ka lebitso la Molimo hore u se ke ua ntlhōkōfatsa.” ₈Jesu o ne a itse ho eena: “Tsoa mothong eo, uena moea o litšila!”

₉Jesu a 'motsa, a re: “Lebitso la hao u mang?”

A re ho eena: “Lebitso la ka ke Lebōtho, hobane re bangata.” ₁₀A mo rapela ka matla hore a se ke a ba leleka naheng eo.

₁₁Ho ne ho e-na le mohlapehali oa likolobe o neng o fula mosikong oa thaba. ₁₂Meea e litšila ea mo kōpa, ea re: “Re rōmele likolobeng, e le hore re kene ka ho tsona.” ₁₃A e lumella, eaba meea e litšila ea tsoa, e kena ka likolobeng. Mohlape oo, o neng o ka etsa likete tse peli, oa tsubella selomong, oa itihela letšeng, 'me oa khangoa ke metsi.

₁₄Balisa ba likolobe ba baleha ho ea beha litaba tsena motseng le metsaneng, 'me batho ba tla ho tla bona se etsahetseng. ₁₅Ba tla ho Jesu, 'me ba bona monna ea neng a e-na le lebōtho la bademona a lutse, a apere, kelello ea hae e tsitsitse hantle, 'me ba tšoha. ₁₆Ba boneng ba ba bolella se etsahetseng ho ea neng a e-na le modemona le ka likolobe.

₁₇Eaba ba qala ho rapela Jesu hore a tsoe naheng ea bona.

₁₈Eare ha a kena ka sekepeng, monna ea neng a e-na le modemona a kōpa hore a tsamaee le eena.

₁₉Jesu a se ke a mo lumella, a mpa a re ho eena: “E-ea hae, ho ba heno, u ba bolelle tsohle tseo Morena a u etselitseng tsona, ka ho u utloela bohlōkō.”

₂₀Eaba oa ikela, 'me a phatlalletsa baahi ba Dekapolese lintho tseo Jesu a mo etselitseng tsona, 'me batho bohle ba makala.

₂₁Hoba Jesu a tšelele hape mose oane ka sekepe, letšoelehali la 'mōkanela a le pel'a letša. ₂₂E mong oa baokameli ba ntlo ea thapelo, ea bitsoang Jairuse, a fihla, 'me ha a 'mona a itihela maotong a hae, ₂₃a mo rapela haholo, a re: “Morali oa ka o lekhatheng la ho shoa; ak'u tle, u 'mee matsoho, hore a tle a fole, 'me a phele.” ₂₄Eaba Jesu o ea le eena.

A lateloa ke letšoelehali, le neng le penyane ho eena.

₂₅Ho ne ho e-na le mosali ea qetileng lilemo tse leshome le metso e 'meli lehatlelo la hae le sa khaotse, ₂₆ea neng a sotliloe haholo ke lingaka, a sentse tsohle tseo a neng a e-na le tsona, empa a sa fumana thuso, bohlōkō bo ntse bo tōta. ₂₇O ne a utloile tsa Jesu; eaba o tla kamora' hae har'a letšoele, 'me a ama seaparo sa hae. ₂₈O ne a re: “Leha nka ama liaparo tsa hae feela, ke tla fola.”

₂₉Hang-hang lehatlelo la hae la khaotsa, 'me a ikutloa hore bohlōkō ba hae bo folile.

₃₀Eare ha Jesu a hlokomela hore matla a tsoile ho eena, a retelehela ho letšoele, a re: “Ke mang ea amileng liaparo tsa ka?”

₃₁Barutuoa ba hae ba re ho eena: “Ua bona hore letšoele le penyane holim'a hao, empa u re: ‘Ke mang ea nkamileng?’ ”

₃₂A thalatsa ka mahlo ho bona ea entseng joalo. ₃₃Empa mosali, ka ho tseba se etsahetseng ho eena, a tla ka tšabo le ka thōthōmelo, a itihela kapele ho eena, 'me a 'molella 'nete eohle. ₃₄Eaba o re ho eena: “Morali, tumelo ea hao e u folisitse; tsamaea ka khotso, bohlōkō ba hao bo fole.”

₃₅Eare a sa ntsane a bua, ha fihla ba tsoang lapeng la mookameli oa ntlo ea thapelo, ba re: “Morali oa hao o shoele; u sa khathaletsa'ng moruti?”

₃₆Empa Jesu ha a utloa se boleloang, a re ho mookameli oa ntlo ea thapelo: “Se tšabe; lumela feela.”

₃₇A se ke a lumella motho ho mo felehetsa, haese Petrose, le Jakobo, le Johanne ngoan'abo Jakobo. ₃₈Ba fihla tlung ea mookameli oa ntlo ea thapelo, 'me a fumana ho le lerata, batho ba lla, ba bokolla haholo. ₃₉Ha a kena a re ho bona: “Ke'ng ha le tlatsa lerata, le lla? Ngoana ha a ea shoa, o mpa a robetse!” ₄₀Ba mo ja litšeho.

Eare hoba a ntšetse batho bohle kantle, a nka ntat'a ngoana le 'm'ae, le bao a nang le bona, a kena le bona kamoo ngoana a leng kateng. ₄₁Eaba o mo tšoara ka letsoho, o re ho eena: “Talitha, kumi!” e leng ho re: “Ngoanana, ke re ho uena: Tsoha!”

₄₂Hang-hang ngoanana a ema, a tsamaea. O ne a le lilemo tse leshome le metso e 'meli. Kapele-pele ba hlolloa ho qeta. ₄₃A ba laea ka thata hore ho se be motho ea tsebang hona, eaba o re ba fe ngoanana seo a ka se jang.