MAREKA 14

₁Ho ne ho setse matsatsi a mabeli pele ho Paseka le mokete oa bohobe bo sa lomosoang. Baprista ba baholo le Litsebi tsa Molao ba ne ba batla mokhoa oa ho tšoara Jesu ka mano, ba tle ba 'molaee, ₂kaha ba ne ba re: “E se be mohl'a mokete, esere mohlomong moferefere oa e-ba teng har'a sechaba.”

₃Eare ha Jesu a le Bethania ha Simone oa molepera, 'me a lutse lijong, ha tla mosali ea nang le pitsana e tletseng setlolo sa nareta ea sebele, se theko e phahameng. A thua pitsana, a se tšèla hloohong ea Jesu.

₄Empa ba bang ba ipelaetsa, 'me ba buisana, ba re: “Tšenyo ee ea setlolo e etsetsoa'ng? ₅Setlolo sena se ka be se rekisitsoe lidenare tse fetang makholo a mararo, 'me tsa abeloa mafutsana.” Ba omanya mosali eo.

₆Jesu a re ho bona: “Mo leseng! Le mo nyahamisetsa'ng pelo? O nketselitse ketso e molemo. ₇Mafutsana le na le 'ona kamehla, 'me le ka a etsetsa molemo neng le neng ha le rata; athe 'na le ke ke la ba le 'na kamehla. ₈O entse sohle seo a neng a ka se etsa: o se a tlotselitse 'mele oa ka kepelo. ₉Kannete kea le bolella, hohle lefatšeng moo molaetsa ona o molemo o tla phatlalatsoa teng, seo a se entseng se tla boleloa, e be seo a hopoloang ka sona.”

₁₀Eaba Judase Isekariota, e mong oa ba leshome le metso e 'meli, o ea ho baprista ba baholo, hore a tle a ba neele Jesu. ₁₁Bona ha ba utloa ba thaba, 'me ba mo tšepisa ho mo fa chelete. Joale a batla monyetla oa ho ba neela eena.

₁₂Ka letsatsi la pele la mokete oa bohobe bo sa lomosoang, ha ho hlajoa likonyana tsa Paseka, barutuoa ba Jesu ba re ho eena: “U rata ha re ea u lokisetsa ho jela Paseka kae?”

₁₃Eaba o rōma barutuoa ba babeli, a re ho bona: “E-eang motseng, 'me le tla khahlana le monna ea jereng nkho ea metsi; mo lateleng. ₁₄Moo a kenang teng, le re ho mong'a ntlo: ‘Moruti o re: Kamore eo nka jelang Paseka ho eona 'moho le barutuoa ba ka, e kae?’ ₁₅O tla le bontša kamore e kaholimo, e lokisitsoeng, e kholo, e nang le thepa. Le re lokisetse hona teng.”

₁₆Barutuoa ba tloha, ba ea motseng, ba fumana ho le joalokaha a ba boleletse, 'me ba lokisetsa Paseka.

₁₇Mantsiboea Jesu a tla le ba leshome le metso e 'meli. ₁₈Ha ba ntse ba lutse ba e-ja, Jesu a re: “Kannete kea le bolella hore e mong oa lōna ea jang le 'na, o tla nkèka.”

₁₉Ba qala ho soaba, 'me ba re ho eena ka bomong: “Na ke 'na?”

₂₀A re ho bona: “Ke e mong oa ba leshome le metso e 'meli, ea kenyang letsoho le 'na ka sejaneng. ₂₁Ruri Mor'a Motho o ikela joalokaha ho ngotsoe ka eena, empa ho malimabe motho eo Mor'a Motho a tla èkoa ke eena. Ho ka be ho bile molemo ho eena hoja a se ke a tsoaloa.”

₂₂Eare ha ba ntse ba e-ja, Jesu a nka bohobe, 'me hoba a boke, a bo ngoatha, a ba nea bona, a re: “Nkang: hona ke 'mele oa ka.”

₂₃A nka senoelo, a leboha, a nt'o ba nea sona, 'me bohle ba noela ho sona.

₂₄A re ho bona: “Hona ke mali a ka a selekane, a tla tšolleloa ba bangata. ₂₅Kannete kea le bolella, ha nka ke ka hlola ke e-noa se tsoang tholoaneng ea morara, ho fihlela letsatsing leo ke tla se noa se le secha 'Musong oa Molimo.”

₂₆Hoba ba bine sefela, ba tsoa, ba ea Thabeng ea Mehloaare.

₂₇Eaba Jesu o re ho bona: “Bohle le tla koeneha, hobane ho ngotsoe, ho thoe:

₂₉Petrose a re ho eena: “Leha bohle ba ka koeneha, 'na nke ke!”

₃₀Jesu a re ho eena: “Kannete kea u bolella hore kajeno, bosiung bona, etlare mokōkō o e-s'o lle habeli, u tla be u ntatōtse hararo.”

₃₁Petrose a mpa a bua ka matla, a re: “Leha eba ke tlameha ho shoa le uena, ha nka ke ka u latōla.” Bohle le bona ba bua joalo.

₃₂Eaba ba ea serapeng seo lebitso la sona e leng Gethesemane, 'me Jesu a re ho barutuoa ba hae: “Lulang mona ha ke ntse ke rapela.” ₃₃A tsamaea le Petrose, le Jakobo le Johanne, 'me a qala ho tšoha haholo le ho tšoenyeha. ₃₄Eaba o re ho bona: “Moea oa ka o masoabing a maholo hoo nka shoang; salang mona, le falimehe.”

₃₅A ea pejana, a itihela fatše, a rapela hore, ha ho ka etsahala, motsotso oo o tle o mo fete. ₃₆A re: “Abba, Ntate, ha ho letho le ka u sitang: ak'u tlose senoelo sena pel'a ka! Empa ho etsoe se ratoang ke uena, e seng ke 'na!”

₃₇A tla, a fumana ba robetse, 'me a re ho Petrose: “Simone, u robetse? Na u sitiloe ho falimeha hora e le 'ngoe? ₃₈Falimehang, le rapele, hore le se kene molekong; moea o mafōlōfōlō, empa 'mele oa fokola.”

₃₉A tloha hape ho bona, 'me a rapela, a pheta mantsoe 'ona ane. ₄₀Ha a khutlela ho bona hape, a fumana ba robetse, hobane mahlo a bona a ne a le boima ke boroko. Ba ne ba sa tsebe hore na ba ka mo araba joang.

₄₁Ha a khutlela ho bona khetlo la boraro, a re ho bona: “Na le sa ntse le robetse, le phomotse? Ho lekane. Nako e fihlile. Bonang, Mor'a Motho o neeloa matsohong a baetsalibe. ₄₂Tsohang, a re eeng, ea nkèkang ke enoa, o se a atametse.”

₄₃A re a sa bua, ha hlaha Judase, e mong oa ba leshome le metso e 'meli, a e-na le letšoele le tšoereng lisabole le likoto, le e-tsoa ho baprista ba baholo, le Litsebi tsa Molao, le baholo.

₄₄Ea èkang Jesu o ne a ba neile pontšo, a re: “Eo ke tla mo aka, ke eena; le mo tšoare, le mo khanne, a se ke a phonyoha.”

₄₅Hang-hang ha a fihla, a toba Jesu, a re: “Moruti!” Eaba oa mo aka. ₄₆Joale ba mo tšoara. ₄₇E mong oa ba neng ba eme moo a hula sabole ea hae, a hlatha mohlanka oa Moprista e Moholo, a mo pōma tsebe.

₄₈Jesu a bua, a re ho bona: “Na ebe ke senokoane ha le tlile ho ntšoara ka lisabole le ka likoto tjee? ₄₉Ke 'nile ka ba le lōna ka matsatsi, ke ruta ka Tempeleng, ha lea ka la ntšoara. Empa eka khona Mangolo a phethahale.”

₅₀Bohle ba mo siea, ba baleha.

₅₁Mohlankana e mong o ne a mo latela, a itšophile ka lesela feela, 'me ba mo tšoara. ₅₂Empa eena a monyoha leseleng, a baleha a le feela.

₅₃Eaba ba isa Jesu ho Moprista e Moholo, 'me baprista ba baholo bohle, le baholo, le Litsebi tsa Molao ba kopana. ₅₄Petrose a mo latela a le sebakana ho ea fihla kahare ha Moprista e Moholo. A lula le balebeli mollong, a ikomosa.

₅₅Baprista ba baholo le lekhotla kaofela ba batla bopaki bo ka tsoang Jesu, hore ba tle ba 'molaee, empa ha baa ka ba bo fumana. ₅₆Ba bangata ba ne ba mo qōsa ka bopaki ba leshano, empa bopaki ba bona bo ne bo sa lumellane.

₅₇Eaba ba bang baa ema, ba mo qōsa ka bopaki ba leshano, ba re: ₅₈“Re mo utloile a re: ‘Ke tla qhaqha Tempele ena e hahiloeng ke batho, 'me ka matsatsi a mararo ke hahe e 'ngoe e sa hahoang ke batho!’ ” ₅₉Empa esita le hona moo bopaki ba bona bo ne bo sa lumellane.

₆₀Moprista e Moholo a ema kapel'a bona, a botsa Jesu, a re: “Na ha u arabe letho holim'a tseo ba u qōsang ka tsona?” ₆₁Empa eena a khutsa, a se ke a araba letho.

Moprista e Moholo a 'motsa hape, a re: “Na u Kreste, Mora oa Ea Bokehang?”

₆₂Jesu a re: “Ke eena;

₆₃Eaba Moprista e Moholo o hahola liaparo tsa hae, o re: “Re sa hlokela'ng lipaki? ₆₄Le ikutloetse nyefōlo! Le bona joang?”

Bohle ba mo ahlōla ka ho re o tšoaneloa ke lefu. ₆₅Ba bang ba qala ho mo tšoela ka mathe, ho mo khurumetsa sefahleho, ho mo otla ka litebele, ba re ho eena: “Porofeta!” Le bona balebeli ba ne ba mo jabela.

₆₆Eare ha Petrose a ntse a le katlase, lebaleng, le leng la makhabunyane a Moprista e Moholo la fihla. ₆₇Ha le bona Petrose a ntse a ikomosa, la mo talimisisa, la re:

“Le uena u n'u e-na le Jesu oa Nasaretha.”

₆₈A latōla, a re: “Ha ke tsebe, ebile ha ke utloisise seo u se bolelang!” Eaba o tsoela kantle, o leba monyako, 'me mokōkō oa lla.

₆₉Ha lekhabunyane leo le 'mona, la boela la qala hape ho re ho ba neng ba eme moo: “Enoa ke e mong oa bona.” ₇₀A latōla hape.

Hamoraonyana, ba neng ba eme moo ba boela ba re ho Petrose: “Kannete u e mong oa bona, etsoe u Mogalelea.”

₇₁Ea e-ba moo a qalang ho rōhakana le ho hlapanya, a re: “Ha ke tsebe motho eo le 'molelang.”

₇₂Hang-hang mokōkō oa lla khetlo la bobeli. Petrose a hopola polelo eo Jesu a neng a 'moleletse eona, e reng: “Mokōkō o e-s'o lle habeli, u tla be u ntatōtse hararo.” A lla habohlōkō.