Setšoantšo sa balemi tšimong ea morara
1Jesu a qala ho bua le bona ka litšoantšo, a re: “Motho o ile a lema tšimo ea morara, a e teela hare ka lerako, a cheka setlhōtlelo har'a eona, a ba a haha le kalana ea molebeli. A e nea balemi ho e lema seahlōlo, eaba oa eta. 2Eare ha nako e fihlile, a rōmela mohlanka ho balemi, hore a bōkelle ho bona seabo sa hae sa kotulo. 3Ba mo tšoara, ba mo khakhatha, 'me ba mo khutlisa a se na letho. 4A boela a rōmela mohlanka e mong ho bona; eo ba 'mata hloohong, 'me ba mo tlontlolla. 5A rōmela e mong, eena ba 'molaea; le ba bang ba bangata, bao ba ileng ba khakhatha ba bang ho bona, ba bolaea ba bang.
6“O ne a saletsoe ke motho a le mong feela, mora eo a mo ratang. A mo rōmela ho bona e le oa ho qetela, a re: ‘Ba tla hlompha mora oa ka.’
7“Empa balemi bao ba buisana, ba re: ‘Enoa ke mojalefa; a re 'molaeeng, lefa e tle e be la rōna.’ 8Ba mo tšoara, ba 'molaea, 'me ba mo lahlela kantle ho tšimo ea morara.
9“Joale na mong'a tšimo o tla etsa joang? O tla tla, 'me a timetse balemi bao, tšimo a e nee ba bang. 10Na ha le e-s'o bale Mangolong a halalelang, moo ho thoeng:
“ ‘Lejoe le lahliloeng ke lihahi
le fetohile lejoe la mantlha.
11Ke Morena ea entseng hona,
'me mahlong a rōna ke mohlolo?’ ”
12Joale ba batla ho mo tšoara, ba mpa ba tšaba letšoele, hobane ba ne ba utloisisa hore ka setšoantšo sena o bolela bona. Ba mo tlohela, ba ikela.
Taba ea ho lefa lekhetho
13Eaba ba rōmela ba bang ba Bafarisi le balateli ba Heroda ho Jesu, hore ba tle ba mo tšoase ka lipuo tsa hae. 14Ba fihla, ba re ho eena: “Moruti, rea tseba hore u motho oa 'nete, le hore ha u natse motho, hobane ha u ee ka tšobotsi, empa u ruta tsela ea Molimo kannete. Na hoa lumelleha hore ho ntšetsoe Sesare lekhetho kapa che? Na re ka le ntša, kapa re ke ke ra le ntša?”
15Empa eena, ka ho tseba boikaketsi ba bona, a re ho bona: “Le ntekela'ng? Ntlisetseng chelete ea denare, nke ke e bone.”
16Ba e tlisa. A re ho bona: “Setšoantšo see, le mongolo oo, ke tsa mang?”
Ba re ho eena: “Ke tsa Sesare.”
17Eaba Jesu o re ho bona: “Ntšetsang Sesare tseo e leng tsa Sesare, le Molimo tseo e leng tsa Molimo,” 'me ba mo tsota.
Taba ea tsoho ea bafu
18Joale Basaduke, ba neng ba re ha ho tsoho ea bafu, ba tla ho eena, ba 'motsa, ba re: 19“Moruti, Moshe o re ngoletse hore ha ngoan'abo monna a e-shoa, 'me a siea mohlolohali a se na bana, ngoan'abo a kenele mohlolohali eo, 'me a tsoalle ngoan'abo bana. 20Ho ne ho e-na le bara ba motho ba supileng. Oa pele a nyala mosali, empa a shoa a se na bana. 21Oa bobeli a mo kenela; a shoa a se na bana. Ha e-ba joalo le ho oa boraro. 22Ka bosupa ba bona ha baa ka ba e-ba le bana. Kamorao ho bohle le eena mosali a shoa. 23Mohl'a tsoho ea bafu, ha ba tsoha, mosali eo e tla ba oa mang ho bona, kaha ba ne ba mo nyetse ka bosupa ba bona?”
24Jesu a re ho bona: “Na ha le lahlehe ke hobane le sa tsebe Mangolo a halalelang, leha e le matla a Molimo? 25Ha batho ba tsoha bafung, ha ba nyalane, empa ba joaloka mangeloi maholimong. 26Tabeng ea bafu ba tsohang, na ha le e-s'o bale bukeng ea Moshe, moo ho buuoang ka sehlahla, kamoo Molimo a ileng a re ho eena kateng: ‘Ke 'na Molimo oa Aborahama, Molimo oa Isaka, le Molimo oa Jakobo?’ 27Molimo hase Molimo oa bafu, empa ke Molimo oa ba phelang. Le lahlehile hampe.”
Taelo e kholo
28E mong oa Litsebi tsa Molao, ea neng a ba mametse ha ba pheile khang, 'me a bona hore Jesu o ba arabile hantle, a tla ho eena, a 'motsa, a re: “Taelo ea pele ho tsohle ke efe?”
29Jesu a araba, a re: “Ea pele ke e reng: ‘Mamela Iseraele! Morena Molimo oa rōna ke eena feela Morena, 30'me u rate Morena Molimo oa hao ka pelo ea hao eohle, le ka moea oa hao oohle, le ka maikutlo a hao 'ohle, le ka matla a hao 'ohle.’ 31Ea bobeli ke ena: ‘Rata mohaeno joalokaha u ithata.’ Ha ho taelo e 'ngoe e kholo ho feta tsena.”
32Setsebi sa Molao sa re ho eena: “U nepile, Moruti, u buile 'nete ha u re, ‘Molimo o mong, ha ho e mong kantle ho eena,’ 33'me ‘ho mo rata ka pelo eohle, le ka kelello eohle, le ka matla 'ohle, le ho rata mohahabo rōna joalokaha re ithata,’ ho feta licheso tsohle le mahlabelo 'ohle.”
34Jesu ha a bona hore o arabile ka bohlale, a re ho eena: “Ha u hōle le 'Muso oa Molimo.” Ha hoa ka ha hlola ho e-ba le ea betang pelo ho 'motsa.
Potso ka Mora oa Davida
35Jesu ha a ntse a ruta ka Tempeleng, a botsa, a re: “Litsebi tsa Molao li bolela joang hore Kreste ke Mora oa Davida? 36Davida, ka tataiso ea Moea o Halalelang, o ile a re:
“ ‘Morena o itse ho Morena oa ka:
Lula ka letsohong la ka le letona,
ho fihlela ke bea lira tsa hao
katlas'a maoto a hao.’
37“Davida ka boeena o 'mitsa Morena. Joale e ka ba mora oa hae joang?”
Letšoelehali le ne le thabela ho mo mamela.
Jesu o nyatsa Litsebi tsa Molao
38Thutong ea hae Jesu a re: “Hlokomelang Litsebi tsa Molao! Ke batho ba ratang ho itsamaela ka liaparo tse phuphuthang le ho lumelisoa mabaleng a metse; 39ba batlang litulo tse hlomphehang matlung a thapelo le litulo tse kapele meketeng; 40ba hapang matlo a basali ba bahlolohali, leha ba ntse ba etsa lithapelo tse telele tsa boikaketsi. Ba tla ahlōloa ka ho fetisisa.”
Nyehelo ea mosali oa mohlolohali
41Jesu a ea lula malebana le letlōle la matlotlo, a talima kamoo letšoele le nokelang chelete letlōleng kateng. Barui ba bangata ba ne ba nokela e ngata. 42Ha tla mosali e mong oa mohlolohali ea futsanehileng; a nokela cheletana tse peli, tse ka lekanang le sente.
43Eaba Jesu o bitsa barutuoa ba hae, o re ho bona: “Kannete kea le bolella, mosali eo oa mohlolohali, ea futsanehileng, o noketse ho feta bohle ba nokelang letlōleng, 44hobane bohle ba noketse ba nkile bonkong, athe eena o noketse a nkile bohloking, tsohle tseo a neng a e-na le tsona, sohle seo a neng a tla phela ka sona.”
