Jesu o folisa motho ea shoeleng litho
1Jesu a kena ka sekepeng, a tšelela motseng oa habo. 2Batho ba mo tlisetsa monna ea shoeleng litho, ba mo nkile ka liphate. Ha Jesu a bona tumelo ea bona, a re ho ea shoeleng litho: “Ngoan'a ka, beta pelo, u tšoaretsoe libe tsa hao.”
3Eaba Litsebi tse ling tsa Molao li re ka lipelong tsa tsona: “Enoa oa nyefola!”
4Jesu, ka ho tseba mehopolo ea bona, a re: “Le hopolela'ng bobe ka lipelong tsa lōna? 5Hantle ho leng bonolo ke hofe, ha e le ho re: ‘U tšoaretsoe libe tsa hao,’ kapa ho re: ‘Tsoha, u tsamaee?’ 6Joale hore le tle le tsebe hore Mor'a Motho o na le matla lefatšeng a ho tšoarela libe,” a re ho ea shoeleng litho: “Tsoha, u nke liphate tsa hao, u ee hae!”
7A tsoha a ea hae. 8Eare ha matšoele a bona hoo, a tšoha, 'me a tlotlisa Molimo ea neileng batho matla a joalo.
Jesu o bitsa Matheu
9Ha Jesu a fetela pele, a bona monna ea bitsoang Matheu a lutse tlung ea lekhetho. A re ho eena: “Ntatele!”
Matheu a ema, 'me a mo latela.
10Eitse ha Jesu a le lijong ka tlung, balekhetho le baetsalibe ba bangata ba ja le eena le barutuoa ba hae. 11Ha Bafarisi ba bona hoo, ba re ho barutuoa ba hae: “Ke ka baka la'ng moruti oa lōna a jang le balekhetho le baetsalibe?”
12Eena ha a utloa, a re ho bona: “Ba hlokang ngaka ke ba kulang, e seng ba phelang hantle. 13E-eang, le ithute hore na ke ho re'ng ha ho thoe: ‘Ke thabela mohau, e seng sehlabelo.’ Ke tlile ho bitsa baetsalibe, e seng ba lokileng.”
Potso ka tsa ho itima lijo
14Joale barutuoa ba Johanne ba tla ho Jesu, ba re: “Ke ka baka la'ng rōna le Bafarisi re itimang lijo hangata, empa barutuoa ba hao ba sa itime?”
15Jesu a ba araba, a re: “Na baetsana ba ee ba hlomohe ka nako eo monyali a ntseng a e-na le bona? Ho tla tla matsatsi ao ka 'ona monyali a tla tlosoa ho bona, e be hona ba itimang lijo.
16“Ha ho motho ea rōkellang setsiba sa lesela le lecha seaparong sa khale, hobane setsiba se ka nathola seaparo, 'me sa eketsa ho taboha. 17Hape ha ho motho ea ka tšèlang veine e ncha makukeng a khale, esere mohlomong makuka a phatloha, veine ea qhaleha, le 'ona makuka a senyeha, empa o ee a tšele veine e ncha makukeng a macha, 'me bobeli ba tsona li bōlōkehe.”
Pholiso ea mosali le tsōso ea moroetsana
18Ha Jesu a ntse a ba bolella tsena, ha fihla e mong oa baokameli ba ntlo ea thapelo, a mo khumamela, a re: “Morali oa ka o sa tsoa hlokahala, empa tloo, u 'mee letsoho, 'me o tla phela.”
19Jesu a ema, a mo latela, le barutuoa ba hae ba ea le eena.
20Eaba mosali, eo e neng e se e le lilemo tse leshome le metso e 'meli lehatlelo la hae le sa khaotse, o hlaha Jesu kamorao, o ama qola ea seaparo sa hae, 21hobane o ne a re ka pelong: “Ha nka mpa ka ama seaparo sa hae, ke tla fola.”
22Jesu a reteleha, 'me ha a 'mona, a re: “Morali, beta pelo, tumelo ea hao e u folisitse.” Mosali eo a fola ho tloha nakong eona eo.
23Ha Jesu a fihla tlung ea mookameli, 'me a bona liletsi tsa makolilo le letšoele le tlatsang lerata, 24a re: “Suthang! Ngoanana ha aa shoa, o mpa a robetse.” Ba mo ja litšeho. 25Eare ha batho ba ntšelitsoe kantle, Jesu a kena, a tšoara ngoanana ke letsoho, 'me a tsoha. 26Taba ena ea aparela lefatše leo lohle.
Lifofu lia foufolloa
27Ha Jesu a fetela pele, lifofu tse peli tsa mo latela, li ntse li hōoa, li re: “Mor'a Davida, re hauhele!”
28Eare ha a kena ka tlung, lifofu tseo tsa tla ho eena, 'me Jesu a re ho tsona: “Na le lumela hore nka etsa hoo?”
Tsa mo araba, tsa re: “E, Morena!”
29Eaba o ama mahlo a tsona, o re: “Le etsetsoe ho ea ka tumelo ea lōna!” 30Eaba mahlo a tsona aa bona. Jesu a li laea, a re: “Hlokomelang, ho se be motho ea ka tsebang!”
31Empa hoba li tsoe, tsa hasanya litaba tsa Jesu lefatšeng leo lohle.
Semumu sea bua
32Eare ha lifofu li tsoile, ha tlisoa ho Jesu motho oa semumu ea nang le modemona. 33Hoba modemona o lelekoe, semumu sa bua. Matšoele a makala, a re: “Ha ho e-s'o ka ho hlaha ntho e tjena Iseraeleng.”
34Empa Bafarisi ba ne ba re: “O leleka bademona ka morena oa bademona.”
Jesu o utloela batho bohlōkō
35Jesu o ne a e-ea le metse le metsana eohle, a ntse a ruta matlung a bona a thapelo, a phatlalatsa molaetsa o molemo oa 'Muso, a folisa mafu le maloetse 'ohle. 36Ha a bona batho, a ba utloela bohlōkō, hobane ba ne ba khathetse matla, ba saretsoe joaloka linku tse se nang molisa. 37Eaba o re ho barutuoa ba hae: “Kotulo e kholo, empa basebetsi ha ba bakae; 38ka baka leo, rapelang mong'a kotulo hore a rōmele basebetsi kotulong ea hae.”
