Jesu o isoa ho Pilato
1E sa le kameso, baprista le baholo bohle ba sechaba ba rera ho bolaea Jesu. 2Ha ba se ba mo tlamile, ba mo khanna, ba ea mo neela 'musisi Pilato.
Lefu la Judase
3Eare ha Judase, ea ekileng Jesu, a bona hore o se a ahlōletsoe lefu, a ikoahlaea, a busetsa lichelete tsa silefera tse mashome a mararo ho baprista ba baholo, le baholo, 4a re: “Ke sitiloe ka ho èka mali a se nang molato.”
Empa ba re: “Hoo ho re ama ka'ng? Ke tabeng ea hao!”
5Hoba a akhele lichelete tseo ka Tempeleng, a tloha, a ea iphenetha.
6Baprista ba baholo ba nka lichelete tseo, ba re: “Ha ho lumellehe hore li kenngoe pōlōkelong ea lichelete tsa Tempele, hobane ke tsa theko ea mali.” 7Eare hoba ba rere, ba reka tšimo ea sebōpi sa lipitsa ka tsona, e tle e be moo ho epeloang balichaba teng. 8Ka baka leo, tšimo eo e bitsoa Tšimo ea Mali le kajeno-ea-bokajeno. 9Eaba ho phethahala ho boletsoeng ke moporofeta Jeremia, ha a re: “Ba nka lichelete tsa silefera tse mashome a mararo; theko ea ea ileng a beeloa theko, eo ba bang ba bana ba Iseraele ba ileng ba 'meela theko, 10ba fana ka tsona ho reka tšimo ea sebōpi sa lipitsa, joalokaha Morena a ile a ntaela.”
Pilato o botsa Jesu
11Joale Jesu a emisoa pel'a 'musisi; 'musisi a 'motsa, a re: “Na u khosi ea Bajuda?”
Jesu a re: “Uena u rialo.”
12Ha a ntse a qosoa ke baprista ba baholo le ke baholo, ha aa ka a araba letho. 13Eaba Pilato o re ho eena: “Na ha u utloe bopaki bo bokaale-kaale boo ba u qosang ka bona?” 14Empa ha aa ka a mo araba leha e le polelong e le 'ngoe, hoo 'musisi a bileng a makala ka ho fetisisa.
Jesu o ahlōleloa lefu
15Ka mokete 'musisi o ne a tloaetse ho lokollela letšoele motšoaruoa e mong, eo le mo ratang. 16Ka nako eo ba ne ba e-na le motšoaruoa ea tumileng ka bokhopo, ea bitsoang Barabase. 17Joale ha ba phuthehile, Pilato a re ho bona: “Le rata ha ke le lokollela ofe, Barabase kapa Jesu ea bitsoang Kreste?” 18O ne a tseba hore ba neelane ka eena ka baka la mōna.
19Eare a sa lutse setulong sa boahlōli, mohats'a hae a rōmela ho eena, a re: “U se ke ua ba le taba le motho eo ea lokileng, hobane ke ile ka tšoenyeha habohlōkō kajeno ha ke lora.”
20Empa baprista ba baholo le baholo ba hlohlelletsa letšoele hore le kōpe Barabase, Jesu eena a bolaoe.
21'Musisi a re ho bona: “Le rata ha ke le lokollela ofe ho bao ba babeli?”
Ba re: “Barabase!”
22Pilato a re ho bona: “Joale ke etse joang ka Jesu ea bitsoang Kreste?”
Bohle ba re: “A thakhisoe!”
23A re: “Empa o entse bobe bofe?”
Ba eketsa ba hōoa, ba re: “A thakhisoe!”
24Eare ha Pilato a bona hore ha ho thuse letho, lerata le mpa le eketseha, a nka metsi, a hlapa matsoho pontšeng ea letšoele, a re: “Ha ke na molato maling a motho enoa; ke tabeng ea lōna!”
25Sechaba sohle sa arabela, sa re: “Mali a hae a botsoe rōna le bana ba rōna!”
26Joale a ba lokollela Barabase; hoba a laele hore Jesu a shapuoe, a neelana ka eena hore a thakhisoe.
Bahlabani ba soma Jesu
27Joale bahlabani ba 'musisi ba isa Jesu tlung ea bobusisi, ba nt'o 'mōkellela lebōtho lohle. 28Ba mo hlōbōlisa, ba mo apesa kobo e khubelu, 29ba lōha mofapahlooho ka meutloa, ba mo roesa oona, ba mo tšoarisa leqala ka letsoho le letona, ba khumama pel'a hae, ba mo soma, ba re: “Ahe! Khosi ea Bajuda!” 30Ba mo tšoela ka mathe, ba nka leqala, ba 'mata hloohong. 31Ha ba se ba mo somme, ba mo hlōbōlisa kobo eo, ba mo apesa liaparo tsa hae, 'me ba mo qhōba ho ea mo thakhisa.
Jesu oa thakhisoa
32Eare ha ba e-tsoa, ba teana le monna oa Sirene, ea bitsoang Simone; ba mo qōbella ho jara sefapano sa Jesu. 33Ha ba fihlile sebakeng se bitsoang Gologotha, e leng ho bolela Sebaka sa Lehata, 34ba mo nea veine e tsoakiloeng le nyooko hore a e noe, empa hoba a e latsoe, a hana ho e noa.
35Eare hoba ba mo thakhise, ba arolelana liaparo tsa hae ka lotho, 36ba nt'o lula moo, ba mo lebela. 37Kaholimo ho hlooho ea hae ba maneha lengolo le bolelang molato oa hae, le reng: enoa ke jesu, khosi ea bajuda. 38Linokoane tse peli tsa thakhisoa le eena, se seng ka letsohong le letona, se seng ka ho le letšehali.
39Ba fetang ka tsela ba mo nyefola, ba ntse ba sisinya lihlooho, 40ba re: “Uena ea qhaqhang Tempele, 'me u e tsose ka matsatsi a mararo, ipholose he! Haeba u le Mora oa Molimo, theoha sefapanong!”
41Ka mokhoa o joalo le baprista ba baholo, le Litsebi tsa Molao, le baholo ba mo soma, ba re: 42“O pholositse ba bang, empa eena o sitoa ho ipholosa; ke khosi ea Iseraele, ha a ke a theohe sefapanong joale, 'me re tla lumela ho eena. 43O tšepile Molimo, ha a ke a mo namolele joale, haeba a mo rata, hobane o itse: ‘'Na ke Mora oa Molimo!’ ”
44Ka mokhoa o joalo le tsona linokoane tse thakhisitsoeng le eena tsa mo hlapaola.
Lefu la Jesu
45Ho tloha ka hora ea leshome le metso e 'meli lefifi la aparela lefatše lohle ho fihlela ka hora ea boraro. 46Eare ha e batla e e-ba hora ea boraro, Jesu a meketsa ka lentsoe le phahameng, a re: “Eli, Eli, lema sabakthani?” ke ho re: “Molimo oa ka, Molimo oa ka, u ntahletse'ng na?”
47Eare ha ba bang ba neng ba eme moo ba utloa, ba re: “O bitsa Elia.” 48E mong oa bona a phakisa a matha, a nka semonya-metsi, a se kenya aseneng, a se hloma leqaleng, 'me a mo nea hore a noe.
49Ba bang bona ba re: “Lesang, re ke re bone hore na Elia o tla mo pholosa.”
50Jesu a boela a meketsa ka lentsoe le phahameng, 'me a neela moea.
51Bonang, lesira la Tempele la taboha ka lehare, ho tloha holimo ho isa tlase, lefatše la sisinyeha, mafika a petsoha, 52mabitla a buleha, litōpō tsa bahalaleli ba bangata ba ithobaletseng tsa tsoha; 53ba tsoa mabitleng kamora' tsoho ea Jesu, ba kena motseng o halalelang, ba bonoa ke ba bangata.
54Eare ha molaoli oa ba lekholo le ba lebetseng Jesu le eena ba bona tšisinyeho ea lefatše le tse etsahalang, ba tšoha haholo, ba re: “Kannete enoa e ne e le Mora oa Molimo.”
55Joale basali ba bangata, ba neng ba ile ba latela Jesu ho tloha Galelea, ba ntse ba mo sebeletsa, ba ne ba le teng, ba talimile ba le thōkoana; 56har'a bona ho e-na le Maria oa Magadala, Maria 'm'a Jakobo le Josefa, Josefa, le mohats'a Sebedea.
Kepelo ea Jesu
57Mantsiboea ha tla monna oa morui ea bitsoang Josefa oa Arimathea, eo le eena e neng e le morutuoa oa Jesu. 58A ea ho Pilato, 'me a kōpa setōpō sa Jesu. Eaba Pilato o laela hore a se neoe. 59Josefa a nka setōpō, a se phuthela ka lesela le hloekileng, 60a se bea ka lebitleng la hae le lecha leo a neng a le betlile lefikeng, 'me hoba a phikolosetse lejoe le leholo monyako oa lebitla, a tloha. 61Maria oa Magadala le Maria e mong ba ne ba le moo, ba lutse malebana le lebitla.
Balebeli lebitleng
62Ka la hosasane, e leng letsatsi le hlahlamang la tlhekelo, baprista ba baholo le Bafarisi ba phuthehela ho Pilato, 63ba re: “Morena, re hopotse hore mothetsi eane ha a sa phela, o ile a re: ‘Ke tla tsoha kamora' matsatsi a mararo.’ 64Ka baka leo, ak'u laele hore lebitla le lebeloe ka thata ho fihlela letsatsi la boraro, esere mohlomong barutuoa ba hae ba tla mo utsoa, 'me ba re ho sechaba: ‘O tsohile bafung!’ Leshano lena la morao le tla ba lebe ho feta la pele.”
65Pilato a re ho bona: “Nkang balebeli, le e'o lebela ka thata joalokaha le tseba.” 66Ba ea, ba tiisa lejoe la lebitla ka letšoao la bona, ba siea balebeli ho le lebela ka thata.
