MATHEU 24

₁Ha Jesu a tloha Tempeleng a tsamaea, barutuoa ba hae ba tla ho eena, ba 'montša mehaho ea Tempele. ₂A ba botsa, a re: “Na tsee kaofela lea li bona? Ruri kea le bolella hore ha ho na lejoe le tla sala holim'a le leng mona; a tla heletsoa kaofela.”

₃Eare ha a ntse a lutse Thabeng ea Mehloaare, barutuoa ba hae ba tla ho eena boinotšing, ba re: “Ak'u re bolelle: Lintho tsee li tla etsahala neng? Pontšo e tla ba efe ea ho tla ha hao le ea ho fela ha mehla ea kajeno?”

₄Jesu a ba araba, a re: “Hlokomelang, le se ke la tšoha le khelosoa ke motho ofe kapa ofe! ₅Ba bangata ba tla tla ka lebitso la ka, ba re: ‘Ke 'na Kreste,’ 'me ba tla khelosa ba bangata. ₆Le tla utloa mekhosi ea lintoa le malume a lintoa. Hlokomelang, le se ke la tšoha. Hona eka khona ho etsahale, empa ha e e-s'o be bofelo. ₇Lichaba li tla tsohelana matla le mebuso e futuhelane; ho tla ba le litlala tsa sekoboto le litšisinyeho tsa lefatše libakeng tse ngata. ₈Lintho tsena tsohle ke qaleho ea litlokotsi.

₉“Mohlang oo ba tla neelana ka lōna hore le hlōkōfatsoe, 'me ba tla le bolaea. Lichaba tsohle li tla le hloea ka baka la lebitso la ka. ₁₀Joale ba bangata ba tla oa, ba èkane, ba hloeane. ₁₁Ho tla hlaha baporofeta ba bohata ba bangata, ba khelose ba bangata, ₁₂'me ka baka la ho ata ha bokhopo lerato la ba bangata le tla qepha. ₁₃Empa ea tla tiisetsa ho fihlela qetellong, eena o tla pholosoa. ₁₄Molaetsa ona o molemo oa 'Muso o tla phatlalatsoa lefatšeng lohle, e le bopaki ho lichaba tsohle, 'me ebe joale ho tla bofelo.”

₁₅“Ha le bona Manyala a Tšenyeho a eme Sebakeng se halalelang, kamoo ho ileng ha boleloa kateng ke moporofeta Daniele 'mali a utloisise se boleloang! ₁₆Mohlang oo ba leng Judea ba balehele lithabeng; ₁₇motho ea sehlōhlōlōng sa ntlo a se ke a ba a theoha ho ea ntša thepa ka tlung ea hae; ₁₈le motho ea masimong a se ke a ba a khutlela hae ho ea lata seaparo sa hae. ₁₉Ho tla ba malimabe baimana le batsoetse ba matsatsi ao! ₂₀Rapelang hore paleho ea lōna e se be ka nako ea mariha kapa ka tsatsi la Sabatha, ₂₁hobane mohlang oo ho tla ba le litlokotsi tse kholo, tse e-song ho be teng ho tloha tšimolohong ea lefatše ho fihlela joale, 'me ha li sa tla ba teng hape. ₂₂Hojane nako eo ha e tl'o khutsufatsoa ho ne ho se motho le ea mong ea neng a tla pholoha, empa nako eo e tla khutsufatsoa ka baka la bakhethoa. ₂₃Mohlang oo haeba motho a ka re ho uena: ‘Bona, Kreste ke enoa!’ kapa: ‘Bona, ke eo!’ le se ke la ba la lumela, ₂₄hobane bo-Kreste ba bohata le baporofeta ba bohata ba tla hlaha, 'me ba tla etsa lipontšo le limakatso tse kholo hore, haeba ho ka etsahala, ba tle ba khelose le bona bakhethoa. ₂₅Joale, ke le boleletse e sa le pele.

₂₆“Ka baka leo, haeba ba re ho lōna: ‘Bonang, o teng feelleng!’ le se ke la ea teng; kapa, ‘Bonang, o phaphosing!’ le se ke la ba lumela, ₂₇hobane joalokaha lehalima le tsekema ho tloha bochabela le be le e'o fihla bophirimela, le ho tla ha Mor'a Motho ho tla ba joalo. ₂₈Kae le kae moo sefifi se leng teng matlaka a tla bōkana teng.”

₃₀“Joale pontšo ea Mor'a Motho e tla hlaha leholimong, merabe eohle ea lefatše e tla ikotla lifuba ka lillo, 'me e tla bona Mor'a Motho a e-tla a le holim'a maru a leholimo, ka matla le ka tlōtla e kholo. ₃₁O tla rōma mangeloi a hae ka terompeta e molumo o moholo, 'me a tla phutha bakhethoa ba hae ba e-tsoa liqoleng tse 'ne tsa lefatše, ba e-tsoa pheletsong e ka nq'ena ea maholimo ho isa ho e ka nq'ane.

₃₂“Ithuteng ka setšoantšo sa sefate sa feiee. Ha lekala la sona le nolofala, le fuputsa mahlaku, le ee le tsebe hore lehlabula le haufi. ₃₃Ka mokhoa o joalo, le lōna ha le bona lintho tsena tsohle, tsebang hore o haufi, o monyako. ₃₄Ruri kea le bolella, molōko ona o ke ke oa fela tseo tsohle li e-s'o etsahale. ₃₅Leholimo le lefatše li tla fela, empa mantsoe a ka a ke ke a fela.

₃₆“Empa letsatsi leo le hora eo, ha ho ea li tsebang, esita le mangeloi a leholimo kapa Mora, ha a li tsebe, haese Ntate a le mong feela. ₃₇Joaloka mehleng ea Nōoe, ho tla ba joalo ha Mor'a Motho a e-tla. ₃₈Mehleng eo, e bileng pele ho morallo oa metsi, batho ba ne ba e-ja, ba e-noa, ba nyala, ba nyalisa, ho fihlela letsatsing leo Nōoe a neng a kene arekeng ka lona. ₃₉Ha baa ka ba tseba ho fihlela morallo oa metsi o fihla, o ba hōhōla kaofela. Ho tla ha Mor'a Motho le hona ho tla ba joalo. ₄₀Mohlang oo ba babeli ba tla ba masimong, e mong o tla nkoa, e mong a siuoe; ₄₁basali ba babeli ba tla be ba sila leloaleng, e mong o tla nkoa, e mong a siuoe.

₄₂“Ka hona falimehang, hobane ha le tsebe letsatsi leo Morena oa lōna a tla tla ka lona. ₄₃Lea tseba hore hoja mong'a ntlo a tseba nako eo lesholu le tla tla ka eona bosiu, a ka be a ile a falimeha, 'me a se ke a lumela hore ntlo ea hae e thuuoe. ₄₄Ka baka leo, le lōna itokiseng, hobane Mor'a Motho o tla tla ka nako eo le sa e lebellang.

₄₅“Joale ke ofe mohlanka ea tšepahalang, ea bohlale, eo mong'a hae a 'meileng ho laola ba lelapa la hae, hore a ba fepe ka nako e lokelang?

₄₆“Ho lehlohonolo mohlanka eo ereng ha mong'a hae a fihla, a mo fumane a etsa joalo. ₄₇Ruri kea le bolella, o tla mo etsa molisa oa maruo 'ohle a hae. ₄₈Empa haeba e le mohlanka ea khopo, o tla re ka pelong: ‘Mong'a ka o lieha ho tla,’ ₄₉ebe o qala ho otla balekane ba hae ba bohlanka, 'me a je, a noe le matahoa. ₅₀Mong'a mohlanka eo o tla tla ka letsatsi leo mohlanka a sa le lebellang, le ka nako eo a sa e tsebeng, ₅₁'me o tla mo khabelaka, a 'mee har'a baikaketsi, moo ho tla ba le lillo le litsikitlano tsa meno.