1“Bona, ke tla rōmela leqōsa la ka ho ntokisetsa tsela. Morena eo le 'matlang o tla kena ka Tempeleng ea hae a sa lebelloa. Morōmuoa eo le mo lebeletseng oa tla, a phatlalatse selekane sa ka,” ho rialo Morena oa mabōtho.
2Ebe ke mang ea ka tiisetsang tsa mohl'a letsatsi la ho tla ha hae? Hona ke mang ea ka emang a tiile ha a hlaha? Eena o joaloka mollo oa sebōpi kapa sesepa sa sehlatsoi. 3O tla lula fatše joaloka ea tšèkang, a hloekisa silefera. O tla hloekisa Balevi, a ba tšèkè joaloka khauta le silefera, ba tle ba tlisetse Morena linyehelo tse lokelang. 4Linyehelo tsa Juda le tsa Jerusalema li tla amoheleha ho Morena, joaloka mehleng ea pele, joaloka mengoaheng ea boholo-holo.
5“Ke tla fihla har'a lōna ke le ahlōle. Ha ke na ho qea-qea ho qōsa linōhe, le bafebi, le ba hlapanyang ka leshano, le ba jang basebetsi moputso oa bona, le ba hatellang bahlolohali le likhutsana, le ba hlokelang balichaba toka, le bohle ba sa ntlhompheng,” ho rialo Morena oa mabōtho.
Lithèlo le linyehelo
6“Ke 'na Morena, ha ke fetohe; kahoo lōna bana ba Jakobo, ha le e-s'o timetsoe. 7Ho tloha mehleng ea baholo-holo ba lōna la na la furalla litaelo tsa ka, la se ke la li boloka. Khutlelang ho 'na, le 'na ke tla khutlela ho lōna,” ho rialo Morena oa mabōtho.
“Empa lea ipotsa, le re: ‘Re ka khutlela joang?’
8“Na motho a ka qhekanyetsa Molimo? Empa lōna lea nqhekanyetsa.
“Le boetse le re: ‘Re u qhekanyelitse joang?’
“Le nqhekanyelitse ha ho fanoa ka karolo e le 'ngoe ho tse leshome, le ka linyehelo tsa lōna. 9Lōna sechaba kaofela, le rohakehile, hobane le nqhekanyelitse. 10Linthong tsohle tsa lōna tlisang karolo e le 'ngoe ho tse leshome, e le hore lijo li tle li be teng ka Tempeleng ea ka. E, le ke le nteke joalo,” ho rialo Morena oa mabōtho, “le tle le bone hore na nke ke ka le bulela mehloli ea liliba tsa leholimo, ka le tšollela mahlononolo a mangata-ngata. 11Ke tla thibela litsie, li se ke tsa senya lijalo tsa lōna masimong, le litholoana tsa morara oa lōna li se ke tsa phutsa,” ho rialo Morena oa mabōtho. 12“Lichaba tsohle li tla re le lehlohonolo, hobane naha ea lōna e tla khahleha haholo,” ho rialo Morena oa mabōtho.
Molimo o tla hauha
13“Lōna le mpuile hampe,” ho rialo Morena.
“Empa lea mpotsa, le re: ‘Re u buile hampe joang?’
14“Le itse: ‘Ha ho thuse letho ho sebeletsa Molimo. Morena oa mabōtho o re buseletsa ka eng ha re phetha litaelo tsa hae, 'me re inyatsa? 15Rōna re re ea ikhōhōmōsang ke eena ea lehlohonolo; ba etsang bokhopo ke bona ba atlehang. Ba ile ba phephetsa Molimo, empa ba se ke ba hlaheloa ke letho.’ ”
16Ba tšabang Morena ba 'nile ba buisana, 'me Morena a ba utloa, a ba sekèhèla tsèbè. Eaba bukeng e kapele ho eena ho ngoloa ba mo tšabang, ba hlomphang lebitso la hae.
17“Bao e tla ba ba ka,” ho rialo Morena oa mabōtho, “e be ba ka mohl'a letsatsi leo ke le khethileng. Ke tla ba baballa joalokaha ntat'a a baballa mora oa hae ea mo sebeletsang. 18Le tla boela le tseba hore na ea lokileng o fapane joang le ea khopo, ea sebeletsang Molimo o fapane joang le ea sa mo sebeletseng.”
