MALAKIEA 2

₁“Joale lōna baprista kea le laea. ₂Haeba le sa 'mamele, le sa tsotelle ho ntlotlisa,” ho rialo Morena oa mabōtho, “ke tla le lihela thōhako, ke le amohe mahlohonolo a lōna. E, ke se ke le amohile 'ona, hobane ha le ntsotelle!

₃“Ke tla timetsa litlōhōlō tsa lōna, ke le phare mahlong ka mosoang oa mahlabelo a lōna a mekete; le be le lahleloe le oona kantle. ₄Kahoo le tla tseba hore ke 'na ea le neileng taelo e le hore selekane sa ka le Levi se se ke sa fela,” ho rialo Morena oa mabōtho.

₅“Ke ne ke entse selekane le eena: Ka mo nea bophelo le khotso; ka mo ruta ho ntlhompha, 'me a fela a ntlhompha, a ntšaba. ₆O ile a ruta thuto ea 'nete, a se ke a bua leshano. A tsamaea le 'na ka khotso le ka ho loka, 'me a sokolla ba bangata sebeng.

₇“Lipolelo tsa moprista li tšoanela hore e be tse nang le tsebo, e le hore batho ba tle ba ithute ka tsona, hobane moprista ke leqōsa la Morena oa mabōtho. ₈Empa lōna le khelohile tsela ena, la ba la khelosa ba bangata ka thuto ea lōna; selekane sa Balevi le se fetotse lefeela,” ho rialo Morena oa mabōtho. ₉“Kahoo le 'na ke entse hore le nyelisehe, sechaba sohle se le tèllè, hobane ha lea ka la natsa litsela tsa ka, empa le bontšitse leeme linyeoeng.”

₁₀Na rōna bohle ntat'a rōna ha a mong? Na ha rea bōptjoa ke Molimo a le mong? Ke ka baka la'ng ha re silafatsa selekane sa baholo-holo ba rōna ka ho hlokelana botšepehi?

₁₁Juda o hlokile botšepehi, lintho tse manyala li entsoe naheng ea Iseraele le Jerusalema: Ka ho nyala morali oa molimo osele, Juda o silafalitse Sehalalelo seo Morena a se ratang. ₁₂Mang kapa mang ea etsang tsena Morena a ke a mo leleke sechabeng sa Iseraele, leha a ka tlisa linyehelo ho Morena oa mabōtho.

₁₃Hape-hape le etsa tjena: Lea lla, lea bokolla, le kolobisa aletare ea Morena oa mabōtho ka likhapha, hobane Morena a hana ho talima linyehelo tsena, leha e le ho amohela limpho tseo le mo etsetsang tsona. ₁₄Joale lea mpotsa, le re: “Ke ka baka la'ng?” Ke hobane Morena o tseba se etsahetseng pakeng tsa hao le mosali oa hao oa matsoathaka. U ile ua mo hlokela botšepehi, le hoja le ne le entse selekane sa hore e be mosali oa hao.

₁₅Na hase Morena ea entseng hore monna le mosali e be ntho e le 'ngoe? Ke ba hae ka nama le ka moea. Ke hobane'ng ha a ba entse hore e be ntho e le 'ngoe? Ke hobane a ne a batla bana ba mo hlomphang. Kahoo u itlhokomele, u se siteloe mosali oa hao oa matsoathaka.

₁₆“Ke hloile tlhalano,” ho rialo Morena, Molimo oa Iseraele; “ke hloile ha monna a etsetsa mosali oa hae sehlōhō se joalo. Hlokomela hore u se fetohele kano ea hao ea ho tšepahala ho mosali oa hao,” ho rialo Morena oa mabōtho.

₁₇Le khathalitse Morena ka lipuo tsa lōna.

Lea mpotsa, le re: “Re mo khathalitse joang?”

Le mo khathalitse ha le re: “Bohle ba etsang bokhopo ba lokile mahlong a Morena, 'me Morena oa ba thabela;” kapa le re: “O hokae Molimo ea lokileng?”