Basali ba bang ba felehetsa Jesu
1Hamorao Jesu a etela motse le motsana ka mong, a ntse a phatlalatsa, a bolela molaetsa o molemo oa 'Muso oa Molimo. Ba leshome le metso e 'meli ba ne ba e-na le eena, 2le basali ba bang ba neng ba folisitsoe meea e mebe le maloetse: Maria ea bitsoang oa Magadala, eo bademona ba supileng ba tsoileng ho eena, 3le Johanna, mosali oa Kusase, qhooku ea Heroda, le Susanna, le ba bang ba bangata, ba neng ba thusa Jesu le barutuoa ka tseo ba nang le tsona.
Setšoantšo sa mojali
4Eare ha letšoelehali le khōbōkana, 'me batho ba motse ka mong ba e-tla ho eena, Jesu a bua ka setšoantšo, a re: 5“Mojali o ne a tsoe ho ea jala peō ea hae. Ha a ntse a jala, e 'ngoe ea oela ka tseleng, ea hatakeloa, 'me linonyana tsa e ja. 6E 'ngoe ea oela mokurutlaneng, 'me hoba e mele, ea pona ke ho hloka mongobo. 7E 'ngoe ea oela har'a meutloa, 'me hoba li hōle 'moho, meutloa ea e bipetsa. 8E 'ngoe ea oela mobung o motle, ea mela, ea beha tse lekholo.”
Hoba a rialo a hōoa, a re: “Ea nang le litsebe ho utloa a utloe!”
Sepheo sa litšoantšo
9Joale barutuoa ba hae ba 'motsa hore na setšoantšo seo se lekanya'ng? 10A re: “Lōna le neiloe ho tseba liphiri tsa 'Muso oa Molimo, empa ba bang ba neiloe ka litšoantšo hore
“ ‘leha ba bona,
ba se ke ba bona,
'me leha ba utloa,
ba se ke ba utloisisa.’ ”
Jesu o qaqisa setšoantšo sa mojali
11“Qaqiso ea setšoantšo ke ena: Peō ke lentsoe la Molimo. 12E ka tseleng ke ba utloang, ebe hamorao ho tla Diabolosi, a tlose lentsoe lipelōng tsa bona, esere ba lumela, ba pholosoa. 13E mokurutlaneng ke bao ereng ha ba utloa, ba amohele lentsoe ka thabo, empa ba se na motso; ba lumela ka nakoana, ere nakong ea moleko, ba koenehe. 14E oetseng meutloeng, ke ba utloang, 'me khabareng ba bipetsoe ke likhathatso, maruo le menyaka ea bophelo, 'me ha ba fihle ho butsoeng. 15Athe e mobung o motle, ke ba utloang lentsoe, ba le khomarele ka pelo ea sebele, e molemo, ba behe litholoana ka mamello.
Lebone le katlas'a nkho
16“Ha ho ea hotetsang lebone, a le koahele ka nkho, kapa a le bee tlas'a bethe, empa o le bea sululoaneng, hore ba kenang ba tle ba bone leseli. 17Ha ho letho le patiloeng le ke keng la hlahela, kapa sephiri se ke keng sa tsejoa le ho pepesoa. 18Ha ho le joalo, hlokomelang kamoo le utloang kateng, hobane mang le mang ea nang le letho o tla ekeletsoa, empa ea se nang letho o tla amohuoa le seo a hopolang hore o na le sona.”
Bana babo Jesu le 'm'ae
19'M'a Jesu le bana babo Jesu ba tla ho eena, empa ba sitoa ho fihla ho eena ka baka la letšoele. 20A tsebisoa, ha thoe: “'M'ao le bana beno ba eme kantle, ba rata ho u bona.”
21Empa a ba araba, a re: “Bao e leng 'mè le bana beso, ke ba utloang, ba phethang lentsoe la Molimo.”
Jesu o khutsisa sefefo
22Ka le leng la matsatsi ao, a kena ka sekepeng le barutuoa ba hae, 'me a re ho bona: “A re tšeleleng ka mose oane ho letša!” Eaba baa tšela. 23Ha ba ntse ba tšela, a khaleha. Sefefo sa theohela letšeng, sekepe sa qala ho tlala metsi, 'me ba ba kotsing.
24Ba atamela, ba mo tsosa, ba re: “Monghali, monghali, rea timela!”
A tsoha, a khalemela moea le maqhubu; eaba lia khaotsa, 'me ha e-ba le khutso. 25Eaba o re ho bona: “Tumelo ea lōna e hokae?”
Ba tšoha, ba hlolloa, 'me ba botsana, ba re: “Ekaba motho eo ke mang, ea laelang le meea le metsi, 'me li mo mamele?”
Pholiso ea Mogerasa ea nang le bademona
26Eaba ba tšelela ka sekepe naheng ea Bagerasa, e malebana le Galelea. 27Eare ha a tsoela lebōpong, a khahlanyetsoa ke monna e mong ea tsoang motseng, ea neng a e-na le bademona, e se e le nako e telele a sa apare letho, a sa lule ka tlung, a mpa a lula mabitleng. 28Eare ha a bona Jesu, a itihela fatše pel'a hae, a re ka lentsoe le phahameng: “U nkene ka'ng, Jesu Mora oa Molimo ea holimo-limo? Kea u rapela, u se ke ua ntlhōkōfatsa!” 29Ke hobane Jesu o ne a ile a laela moea o litšila ho tsoa monneng eo. O ne o ee o mo hlasele hangata, a tlangoe ka mahlaahlela le liketane, a lebeloe, empa a khaole litlamo tseo, a susumeletsoe feelleng ke modemona.
30Jesu a 'motsa, a re: “Lebitso la hao u mang?”
A re: “Ke Lebōtho;” kahobane ho ne ho kene bademona ba bangata ka ho eena. 31Ba mo rapela hore a se ke a ba laela ho ea mohohlong o se nang pheletso.
32Joale ho ne ho fula mohlape oa likolobe tse ngata thabeng; ba rapela Jesu hore a ba lumelle ho kena ka likolobeng tseo, 'me a ba lumella. 33Bademona ba tsoa monneng eo ba kena ka likolobeng, 'me mohlape oa tsubella selomong, oa itihela letšeng, oa khangoa ke metsi.
34Balisa, ha ba bona se etsahetseng, ba baleha, ba ea beha motseng le metsaneng. 35Batho ba tsoa ho ea bona se etsahetseng, ba tla ho Jesu, 'me ba fumana monna eo bademona ba tsoileng ho eena a lutse maotong a Jesu, a apere, kelello ea hae e tsitsitse hantle, 'me ba tšoha. 36Ba boneng ba ba behela kamoo ea neng a e-na le bademona a folisitsoeng kateng. 37Eaba bongata bohle ba tikoloho ea Bagerasa bo kōpa Jesu hore a tlohe ho bona, hobane ba ne ba tšohile haholo. A kena ka sekepeng a khutla.
38Monna eo bademona ba tsoileng ho eena a mo kōpa hore a tsamaee le eena, empa Jesu a mo lokolla, a re: 39“Khutlela hae, u e'o bolela tsohle tseo Molimo a u etselitseng tsona.” Eaba o tloha a e-ea le motse oohle, a phatlalatsa lintho tseo Jesu a mo etselitseng tsona.
Pholiso ea mosali le tsoso ea morali oa Jairuse
40Ha Jesu a khutla, a amoheloa ke letšoele, hobane bohle ba ne ba mo lebeletse. 41Bonang, ha tla monna ea bitsoang Jairuse, e le mookameli oa ntlo ea thapelo, a itihela fatše, maotong a Jesu, a mo rapela hore a kene ka tlung ha hae, 42hobane o ne a e-na le morali ea 'notši ea ka bang lilemo tse leshome le metso e 'meli, 'me morali eo o ne a le lekhatheng la ho shoa.
Joale ha Jesu a ntse a e-ea teng, matšoele a penyana ho eena. 43Ho ne ho e-na le mosali ea qetileng lilemo tse leshome le metso e 'meli, lehatlelo la hae le sa khaotse, a lefile lingaka ka sohle seo a neng a e-na le sona, empa ho se le e 'ngoe e ka mo phekolang. 44A tla kamora' Jesu, a ama qola ea seaparo sa hae, 'me hang-hang lehatlelo la hae la khaotsa.
45Jesu a re: “Ea nkamileng ke mang?”
Eare ha ba latōla bohle, Petrose a re: “Monghali, matšoele a penyane holim'a hao, 'me aa u patisa.”
46Empa Jesu a re: “Ho na le ea nkamileng, hobane ke utloile hore matla a tsoile ho 'na.”
47Eare ha mosali a bona hore ha a ea pateha, a tla ka thōthōmelo, a itihela fatše pel'a hae, a bolela pel'a sechaba sohle lebaka leo a mo amileng ka lona, le kamoo a folisitsoeng kateng hang-hang. 48Eaba Jesu o re ho eena: “Morali, tumelo ea hao e u folisitse; e-ea ka khotso!”
49Eare a sa ntsane a bua, ha fihla motho ea tsoang lapeng la mookameli oa ntlo ea thapelo, a re: “Morali oa hao o shoele; u se hlole u khathatsa moruti!”
50Empa Jesu ha a utloa, a re ho Jairuse: “Se tšabe; lumela feela, 'me o tla fola.”
51Eare ha a fihla ka tlung, a se ke a lumella motho ho kena le eena, haese Petrose, Johanne le Jakobo, le ntat'a ngoanana le 'm'ae. 52Bohle ba ne ba lla, ba hlomohetse mofu. Jesu a re: “Se lleng, hobane ha a ea shoa, o mpa a robetse.”
53Ba mo ja litšeho, kaha ba ne ba tseba hore o shoele. 54Empa a mo tšoara ka letsoho, a 'mitsa, a re: “Ngoanana, tsoha!” 55Moea oa hae oa khutla, a tsoha hang-hang, 'me Jesu a laela hore a fuoe lijo. 56Batsoali ba hae ba hlolloa; a mpa a ba laea ho se bolelle motho se etsahetseng.
