LUKA 5

₁Eitse ha letšoele le patisitse Jesu ho mamela lentsoe la Molimo, a eme lebōpong la letša la Genesareta, ₂a bona likepe tse peli li eme lebōpong la letša, batšoasi ba litlhapi ba tsoile ka ho tsona ba hlatsoa matlōoa a bona. ₃A kena ka ho se seng sa likepe, e leng sa Simone, a mo kōpa hore a se sesisetse sebakana le lebōpo; hoba a lule, a ruta matšoele a le ka sekepeng.

₄Ha a qetile ho bua, a re ho Simone: “Sesisetsa koeetseng, le lepeletse matlōoa a lōna, le tšoase.”

₅Simone a araba, a re: “Monghali, re sebelitse ka thata bosiu bohle re sa tšoase letho, empa ho ea ka polelo ea hao ke tla lepeletsa matlōoa.”

₆Hoba ba etse joalo ba tšoasa litlhapi tse ngata haholo; matlōoa a bona a ba a batla a taboha. ₇Ba hoèhla balekane ba ka sekepeng se seng hore ba tl'o ba thusa; ba tla, 'me likepe tsa tlala bobeli ba tsona, hoo li ileng tsa batla li teba.

₈Ha Simone Petrose a bona hoo, a itihela mangoeleng a Jesu, a re: “Morena, tloha ho 'na, hobane ke motho oa moetsalibe!” ₉A rialo hobane eena le bohle bao a nang le bona ba hloletsoe ka baka la tšoaso ea litlhapi tseo ba li tšoasitseng. ₁₀Ha e-ba joalo le ho bara ba Sebedea, e leng Jakobo le Johanne, bao e neng e le balekane ba Simone.

Jesu a re ho Simone: “Se tšabe; ho tloha joale u tla ba motšoasi oa batho.” ₁₁Hoba ba hulele likepe lebōpong, ba tlohela tsohle, 'me ba mo latela.

₁₂Eare ha Jesu a le ho o mong oa metse, monna ea tletseng lepera, ha a 'mona, a itihela fatše ka sefahleho, a mo kōpa, a re: “Morena, ha u rata u ka ntlhoekisa.”

₁₃Jesu a otlolla letsoho, a mo ama, a re: “Kea rata, hloeka!” Eaba lepera le tloha ho eena hang-hang.

₁₄Jesu a mo laela ho se bolelle motho, a re: “U mpe u e'o itlhahisa ho moprista, u nyehelle tlhoekiso ea hao kamoo Moshe a laetseng kateng, e be bopaki ho bona.”

₁₅Empa taba ea hae ea 'na ea phatlalla, 'me matšoelehali a phuthehela ho tla mo mamela le ho folisoa maloetseng a 'ona. ₁₆Eena a ikela nahathothe, 'me a rapela.

₁₇Ka le leng la matsatsi ao, ha Jesu a ntse a ruta, Bafarisi le baruti ba Molao ba tsoang motseng o mong le o mong oa Galelea, Judea le Jerusalema, ba ne ba lutse moo. Matla a Morena a ho folisa a ba teng ho eena. ₁₈Banna ba nkileng monna ea shoeleng litho, ka liphate ba leka ho mo kenya le ho 'mea kapele ho Jesu. ₁₉Ka ho hloka mokhoa oa ho mo kenya ka baka la letšoele, ba hloella kaholim'a ntlo, ba phunya marulelo, ba mo lepelletsa kahare, kapele ho Jesu, a ntse a le liphateng.

₂₀Ha a bona tumelo ea bona, a re: “Monna, u tšoaretsoe libe tsa hao.”

₂₁Eaba Litsebi tsa Molao le Bafarisi ba qala ho buisana, ba re: “Eo ke mang ea nyefolang? Ke mang ea ka tsebang ho tšoarela libe, haese Molimo a 'notši na?”

₂₂Empa Jesu, ka ho tseba mehopolo ea bona, a ba araba, a re: “Le hopola'ng ka lipelong tsa lōna? ₂₃Ho bonolo ho feta ke hofe, ha e le ho re: ‘U tšoaretsoe libe tsa hao,’ kapa e le ho re: ‘Ema, u tsamaee?’ ₂₄Empa hore le tle le tsebe hore Mor'a Motho o na le matla lefatšeng a ho tšoarela libe,” a re ho ea shoeleng litho: “ke re ho uena: Ema, nka liphate tsa hao, e-ea tlung ea hao!” ₂₅Hang-hang a ema ba ntse ba 'mona, a nka seo a neng a robetse ho sona, a ea tlung ha hae a ntse a tlotlisa Molimo. ₂₆Eaba bohle baa hlolloa, ba tlotlisa Molimo, ba tlala tšabo, ba re: “Kajeno re bone limakatso.”

₂₇Kamora' tsena Jesu a tsoa, 'me a bona molekhetho ea bitsoang Levi a lutse tlung ea lekhetho, a re ho eena: “Ntatele!” ₂₈A tlohela tsohle, a ema, a mo latela.

₂₉Levi a mo etsetsa mokete o moholo ka tlung ea hae; ho ne ho e-na le sehlophahali sa balekhetho le ba bang ba lutse ba e-ja le bona. ₃₀Bafarisi le Litsebi tsa bona tsa Molao ba korotlela barutuoa ba Jesu, ba re: “Ke ka lebaka la'ng ha le e-ja, 'me le e-noa le balekhetho le baetsalibe na?”

₃₁Jesu a ba araba, a re: “Ba sa kuleng ha ba hloke ngaka, empa e hlokoa ke ba kulang. ₃₂Ha kea tla ho biletsa ba lokileng pakong, empa baetsalibe.”

₃₃Joale ba re ho Jesu: “Barutuoa ba Johanne ba itima lijo khafetsa, 'me ba etsa merapelo, le ba Bafarisi ba etsa joalo, empa ba hao baa ja, 'me baa noa.”

₃₄Jesu a re ho bona: “Na le ka re baetsana ba itime lijo ha monyali a ntse a e-na le bona? ₃₅Empa ho tla tla matsatsi ao ka 'ona monyali a tla tlosoa ho bona, e be hona ba tla itima lijo matsatsing ao.”

₃₆A ba bolella le setšoantšo, a re: “Ha ho ea tabolang setsiba seaparong se secha, 'me a se rōkelle seaparong sa khale, esere seaparo se secha sa taboha, 'me setsiba se secha sa se ke sa lumellana le seaparo sa khale. ₃₇Ha ho ea tšèlang veine e ncha makukeng a khale, esere veine e ncha ea phatlola makuka, eona ea qhaleha, makuka a senyeha, ₃₈empa veine e ncha e tšoanetse ho tšèloa makukeng a macha. ₃₉Ha ho eo ekareng ha a noele veine ea khale, ebe o lakatsa e ncha, hobane o re: ‘Ea khale e monate ho feta.’ ”