LENGOLO LA JEREMIA 6

₁Lena ke lengolo leo Jeremia a ileng a le romela ho ba neng ba tla isoa kholehong, Babilona, ke khosi ea Babilona, le ba tsebisang seo Molimo a mo laetseng sona.

₂Ka baka la libe tseo le li entseng pontšeng ea Molimo, le tla isoa kholehong, Babilona, ke Nebukadenesare, khosi ea Babilona. ₃Etlare ha le fihla Babilona, le tla lula teng nako e telele ka lilemo tse ngata, ho ea fihla molokong oa bosupa; empa ka mora' tseo, ke tla le lata ka khotso. ₄Joale Babilona le tla bona melimo e entsoeng ka silefera, khauta le sefate, e jaroang ka mahetla, e bakelang balichaba tšabo. ₅Hlokomelang ke hona hore le se etsise balichaba, 'me le se tšabe melimo ena, mohla le bonang letšoele le e etellang pele, le le e setseng morao, ho e khumamela. ₆Le mpe le re ka lipelong tsa lona: “Morena, ke uena eo re tšoanetseng ho mo khumamela.” ₇Lengeloi la ka le har'a lona ho hlokomela bophelo ba lona.

₈Melimo ena e na le maleme a kutlelitsoeng ke babetli; e koahetsoe ka khauta le silefera, empa ke ea bohata, 'me ha e tsebe ho bua. ₉E tlisetsoa khauta ke batho, joalokaha eka ke moroetsana ea ratang likhabiso; ba lokisetsa lihlooho tsa melimo ea bona mefapahlooho. ₁₀Ho ee ho etsahale hore baprista ba utsoetse melimo ea bona khauta le silefera ho li sebelisa; esita le ho fana ka e 'ngoe ho matekatse moo a lulang teng. ₁₁Ba e khabisa ka liaparo, joaloka hoja ke batho, melimo ena e entsoeng ka silefera, khauta le sefate; ₁₂empa eona e ke ke ea itšireletsa mafoomeng le likokoanyaneng, leha e apesitsoe seaparo se perese. ₁₃Ba e hlakola lifahleho ka baka la lerole le lengata la ntlo, le bokellaneng holim'a eona. ₁₄O mong o tšoere lere joaloka 'musi oa naha, empa o ke ke oa timetsa ea o sitetsoeng. ₁₅O mong o tšoere sabole le selepe ka tsohong le letona, empa o ke ke oa iqobeletsa ntoeng le linokoaneng. ₁₆Ka hoo ho totobetse hore hase melimo: ka baka leo le se ke la e tšaba!

₁₇Joalokaha pitsa e pshatlehileng e se e se na thuso ho mong'a eona, le eona melimo ea bona e beiloeng litempeleng e joalo. Mahlo a eona a tletse lerole le tsosoang ke maoto a ba kenang. ₁₈Joalokaha motho ea hlompholotseng khosi kapa ea ahloletsoeng lefu a koalloa ka thata, ka mokhoa o tšoanang baprista ba koala matlo a melimo ena ka mamati, linotlolo le libere-bere, esere ea utsoetsoa ke linokoana. ₁₉Ba e hoteletsa mabone a mangata ho feta ao bona ba a hlokang, empa eona e sitoa ho bona leha le le leng la 'ona. ₂₀E joaloka tšiea ea ntlo feela; kamoo ho boleloang kateng, lipelo tsa eona li kokonnoe ke likokoanyana tse tsoang mobung, tse e qetang 'moho le liaparo tsa eona, empa ha e utloe letho. ₂₁Lifahleho tsa eona li ntšofalitsoe ke mosi o ka tlung. ₂₂Bo-'mankhane, mafokotsane le linonyana tse ling li phuphusela holim'a eona le holim'a lihlooho tsa eona; le likatse li tšethemela ho eona. ₂₃Ka hoo le tla lemoha hore hase melimo: ka baka leo le se ke la e tšaba!

₂₄Ha khauta, eo e koahetsoeng ka eona ho e khabisa, e sa tlosoe mafoome ke motho, melimo ena e ke ke ea e bentša; le mohla e ileng ea etsoa, e ne e sa utloe letho. ₂₅Leha e rekiloe ka theko e boima, ha e na phefumoloho. ₂₆Kaha e se na maoto, e jaroa ka mahetla, 'me e pepesa bofeela-feelane ba eona mahlong a batho. ₂₇E hlabisa le ba e sebeletsang lihlong, hobane ha e ka oela fatše, e hloka ho tsosoa ke motho. Leha e ka emisoa, e ke ke ea itsamaisa ka bo-eona; ha e ka sekama, e ke ke ea ikotlolla hape. Ho bea limpho pel'a eona ho tšoana le ho li bea pel'a litopo. ₂₈Tseo e li hlabetsoeng, baprista baa li rekisa, ba fumane chelete; le bona basali ba bona ba noka karolo e 'ngoe ea tsona ka letsoai, empa ha ba thuse mafutsana le mohloki. ₂₉Tseo melimo ena e li hlabetsoeng, mosali ea matsatsing le motsoetse baa li ama. Joale ka mabaka ana le tsebe hore hase melimo: le se ke la e tšaba!

₃₀Hantle e ka bitsoa melimo joang, ha e le moo e le basali ba nyehelang limpho ho melimo ena e entsoeng ka silefera, khauta le sefate? ₃₁Ka tempeleng tsa eona, baprista ba lutse ba apere marantha, ba kutile moriri le litelu, ba sa roala letho hloohong. ₃₂Baa puruma 'me ba tleroha pel'a melimo ea bona, joalokaha ba bang ba ee ba etse lijong tsa ho felehetsa mofu. ₃₃Baprista ba e hlobolisa liaparo 'me ba li apesa basali le bana ba bona. ₃₄Leha melimo ena e ka etsoa hampe kapa hantle, e sitoa ho iphetetsa kapa ho buseletsa; hape e sitoa ho hloesetsa khosi setulong kapa hona ho e theola. ₃₅Ka tsela e tšoanang e sitoa ho fana ka maruo kapa ka eona chelete. Leha motho a ka roba kano eo a e etselitseng eona, melimo ena e ke ke ea mo qosa ka letho.

₃₆E ke ke ea pholosa motho lefung, leha e le ho namolela ea fokolang ho ea matla. ₃₇E ke ke ea tutubolla mahlo a sefofu, kapa hona ho ntša motho tsietsing. ₃₈E ke ke ea hauhela mohlolohali, kapa ho tsoela khutsana molemo. ₃₉E tšoana le majoe a thaba, melimo ena e entsoeng ka sefate, e koahetsoeng ka khauta le silefera; 'me ba e sebeletsang ba tla hlajoa ke lihlong. ₄₀Joale ho ka hopoloa joang, kapa ha boleloa joang hore ke melimo na?

₄₁Esita le Bakaldea baa e hlompholla, bona bao e eeng ere ha ba bona semumu, se sa tsebeng ho bua, ba se ise ho Bele, ba mo kope hore a se fe ho bua, joalokaha eka oa utloa. ₄₂Leha ho le joalo, ba sitoa ho lemoha taba eo le ho lahla melimo ena, hobane le bona ba hloka kutloisiso. ₄₃Basali ba itlammeng ka likhoele thekeng ba lutse litseleng, ba chesa litlhoka ho etsa mokubetso. E ee ere ha e mong oa bona a ka huleloa thoko ke monna ea fetang ka tsela 'me a robala le eena, a nyefole ea haufi le eena ka hore eo ha aa ka a khahleha joaloka eena, khoele ea hae ha ea ka ea khaoloa. ₄₄Tsohle tse etsetsoang melimo ena ke mashano. Joale ho ka hopoloa joang, kapa ha boleloa joang hore ke melimo na?

₄₅E entsoe ke ba betlang litšoantšo tsa sefate le ba sebetsang khauta; ka bo-eona hase letho, haese feela seo basebetsi bana ba ratileng hore e be sona. ₄₆Ba e entseng le bona ha ba phele nako e telele: mesebetsi ea bona, eona e ka ba melimo joang? ₄₇Ba siela litloholo tsa bona mashano le sekhobo. ₄₈Ha ho ka qhoma ntoa kapa ha hlaha matšoenyeho, baprista ba ipotsa moo ba ka ipatang teng 'moho le melimo ea bona. ₄₉Joale ho ea ka'ng hore ebe motho ha a utloisise hore hase melimo, ha e le moo e sitoa ho ipholosa ntoeng kapa matšoenyehong?

₅₀Erekaha e entsoe ka sefate se koahetsoeng ka khauta le silefera, khabareng ho tla hlahella hore ke ea bohata. ₅₁Ho tla totobala ho ba lichaba tsohle le ho likhosi tsa tsona hore hase melimo, empa ke mesebetsi ea matsoho a batho, le hore e sitoa ho phetha liketso tsa bomolimo. ₅₂Joale ke mang ea ke keng a bona hore hase melimo na?

₅₃E ke ke ea bea khosi holim'a naha e itseng, kapa hona ho nesetsa batho pula; ₅₄leha e le ho itlhophisetsa litaba, kapa ho namolela ea entsoeng hampe. Joaloka makhoaba a fofang pakeng tsa leholimo le lefatše, ha e thuse letho. ₅₅Ha mollo o ka oela holim'a ntlo ea melimo ena ea sefate, e koahetsoeng ka khauta le silefera, baprista ba eona ba tla baleha hore ba pholohe, athe eona e tla chella kahare joaloka litšiea. ₅₆E ke ke ea itoanela pel'a khosi kapa sera. Joale ho ka lumeloa joang, kapa ha hopoloa joang hore ke melimo na?

₅₇E ke ke ea ipholosa masholung kapa linokoaneng, melimo ena ea sefate, e koahetsoeng ka silefera le khauta. Batho ba tla e hlotha khauta le silefera, ₅₈'me ba ikele ka liaparo tse e apesitseng: le mona e ntse e sitoa ho iqobeletsa. ₅₉Ka baka lena, ho molemo ho ba khosi e tšoarang senna, kapa ho ba sejana se nang le thuso ho mong'a sona lapeng, ho e-na le ho ba melimo ena ea bohata. Ho molemo ho ba lemati la ntlo, le sireletsang tse kahare, ho e-na le ho ba melimo ena ea bohata. Ho molemo ho ba tšiea ea sefate ka tlung ea borena, ho e-na le ho ba melimo ena ea bohata.

₆₀Letsatsi, khoeli le linaleli lia khanya, li abetsoe tšebetso 'me lia mamela. ₆₁Ka mokhoa o tšoanang lehalima, ha le benya, ke pono e ntle; hape, moea o foka kahohle lefatšeng; ₆₂le 'ona maru, ha Molimo a a laela ho aparela lefatše lohle, a phetha taelo eo; ₆₃le oona mollo o tsoang holimo, ha o romeloa ho chesa lithaba le meru, o etsa joalo. Empa melimo ena e ke ke ea bapisoa le lintho tsena, leha e le ka botle kapa ka matla. ₆₄Ka hoo ha ho ka ke ha hopoloa kapa ha boleloa hore ke melimo, hobane e hloka matla a ho hlophisa litaba, leha e le ho tsoela batho molemo. ₆₅Joale lea tseba hore hase melimo: le se ke la e tšaba!

₆₆E ke ke ea lihela likhosi thohako kapa ea li tlisetsa hlohonolofatso, ₆₇leha e le ho hlahisetsa lichaba lipontšo leholimong. E ke ke ea khanya joaloka letsatsi, esitana le ho bonesa joaloka khoeli. ₆₈E fetoa ke liphoofolo tsa naha, tse tsebang ho balehela moo li ka ipatang teng, 'me tse tsebang ho iphelisa. ₆₉Joale, ho rona ha ho bonahale ho hang hore ke melimo: ka hoo le se ke la e tšaba!

₇₀Melimo ea bona ea sefate, e koahetsoeng ka khauta le silefera, e joaloka setšosa feela tšimong ea mahapu, se se nang mosebetsi. ₇₁Hape, melimo ea bona ea sefate, e koahetsoeng ka khauta le silefera, e tšoana le sehlahla sa meutloa se serapeng, seo nonyana efe kapa efe e ka lulang holim'a sona; kapa e tšoana le sefifi se akhetsoeng feela qalong e lefifi. ₇₂Ka baka la ho bola ha liaparo tse perese tse e apesitseng, kapa tsa masela a matle, le tla tseba hore hase melimo. Qetellong le eona e tla jeoa ke likokoanyana, 'me hona e tla ba sekhobo sa naha eo. ₇₃Joale boemo ba motho ea lokileng, ea se nang melimo ea bohata, bo molemo ho feta, hobane eena ha a na ho angoa ke sekhobo!