MEETLO 8

₁Morena a bua ho Moshe, a re:

₂“Nka Arone le bara ba hae, le liaparo, le ole e tlotsang, le pohoana ea nyehelo e tlosang sebe, le lipheleu tse peli, le serōtō sa bohobe bo sa lomosoang. ₃Joale u khobokanye phutheho eohle monyakong oa Tente ea Morena.”

₄Moshe a etsa joalokaha Morena a mo laetse. Ha phutheho eohle e se e bokane monyakong oa Tente ea Morena, ₅Moshe a re ho eona: “Sena ke seo Morena a laetseng hore se etsoe.”

₆Joale Moshe a tlisa Arone le bara ba hae, a ba hlatsoa ka metsi. ₇A apesa Arone seaparo se fihlang maotong, le setipe, a mo tlama ka leqhama. A mo apesa seaparo, a mo apesa le setipe, a mo tlama thekeng ka leqhama le tlamang setipe. ₈A mo apesa mokhabiso oa sefuba, 'me holim'a oona a bea majoana a khabisitsoeng a Urime le Thumime. ₉A mo roesa katiba hloohong, 'me a bea moqhaka oa khauta o halalelang holim'a karolo e kapele ea katiba eo, joalokaha Morena a ne a laetse Moshe.

₁₀Eaba Moshe o nka ole e tlotsang, o tlotsa Tente ea Morena, le tsohle tse neng li le ka ho eona, 'me a li halaletsa. ₁₁A fōka holim'a aletare ka ole, ka makhetlo a supileng; a fōka le sekotlolo le seluloana sa sona, hore li halalele. ₁₂A tšèla ole holim'a hlooho ea Arone, a mo tlotsa hore a halalele. ₁₃Joale Moshe a tlisa bara ba Arone, a ba apesa liaparo tse fihlang maotong, 'me a ba tlama ka maqhama, a ba roesa lituku, joalokaha Morena a ne a mo laetse.

₁₄Joale Moshe a tlisa pohoana ea nyehelo e tlosang sebe, 'me Arone le bara ba hae ba bea matsoho a bona holim'a hlooho ea pohoana ea nyehelo e tlosang libe. ₁₅Moshe a e hlaba, 'me a qopetsa monoana oa hae ka maling, a tlotsa manaka a aletare ka mali ao, a e hloekisa. Mali a mang a a tšollela mothèong oa aletare, a e halaletsa, a e hloekisa. ₁₆A nka mohlèhlo, le phapohane, le liphieo tse peli, le tšōtso ea tsona, a li chesetsa holim'a aletare. ₁₇Pohoana ena, le letlalo la eona, le nama ea eona, le mosoang oa eona, a li nka, a li chesetsa kantle ho liahelo, joalokaha Morena a ne a mo laetse.

₁₈Moshe a tlisa pheleu ea sehlabelo sa secheso, 'me Arone le bara ba hae ba bea matsoho a bona holim'a hlooho ea eona. ₁₉A e hlaba, 'me ka mali a eona a fōka aletare ho e pota-pota. ₂₀Moshe a khabela pheleu ena, 'me a chesa hlooho ea eona, le litho tsa eona, le mafura a eona. ₂₁Likahare le litlhakoana a li hlatsoa ka metsi, 'me a chesetsa pheleu eohle holim'a aletare. E ne e le nyehelo ea secheso, e monko o monate, e amohelehang ho Morena, joalokaha Morena a ne a mo laetse.

₂₂Joale Moshe a tlisa pheleu ea bobeli, e leng pheleu ea khalaletso. Arone le bara ba hae ba bea matsoho a bona holim'a hlooho ea eona. ₂₃A e hlaba, 'me a nka mali a mang a eona, a tlotsa ntlha ea tsebe ea Arone ea letsoho le letona, le monoana o moholo oa letsoho la hae le letona, le monoana o moholo oa leoto le letona. ₂₄Moshe a tlisa bara ba Arone, a nka mali, 'me ka 'ona a tlotsa lintlha tsa litsebe tsa bona tsa matsoho a matona, le holim'a menoana e metona ea matsoho a bona a matona; le holim'a menoana e metona ea maoto a bona a matona. Ka mali a mang Moshe a fōka aletare ho e pota-pota. ₂₅Joale a nka mafura a pheleu, le mafura a mohatla oa eona, le mohlèhlo, le phapohane, le liphieo tse peli, le tšōtso ea tsona, le serope sa letsoho le letona. ₂₆Ka serōtōng sa bohobe bo sa lomosoang, bo neng bo le kapele ho Morena, a nka kuku e le 'ngoe e sa lomosoang, le leqebekoane le le leng le lubiloeng ka ole, le moqathane o le mong, a li bea holim'a mafura, holim'a serope sa letsoho le letona. ₂₇Tsena tsohle a li bea liatleng tsa Arone le liatleng tsa bara ba hae, 'me Moshe a li akhōtsa, e le nyehelo e akhōletsoang Morena. ₂₈Moshe a boela a li nka liatleng tsa bona, a li chesetsa holim'a aletare, holim'a nyehelo ea secheso. E ne e le nyehelo ea khalaletso, e monko o monate, e amohelehang ho Morena. ₂₉Moshe a nka sefuba, a se akhōtsa e le nyehelo e akhōletsoang Morena. Ea e-ba seabo sa Moshe se tsoang pheleung ea khalaletso, joalokaha Morena a ne a mo laetse.

₃₀Joale Moshe a nka ole e tlotsang, le a mang a mali a neng a le holim'a aletare, 'me ka 'ona a fōka Arone le liaparo tsa hae, le bara ba hae, le liaparo tsa bona. Eaba o halaletsa Arone le liaparo tsa hae, le bara ba hae le liaparo tsa bona.

₃₁Moshe a re ho Arone le ho bara ba hae: “Phehelang nama ena monyakong oa Tente ea Morena, 'me le e jele moo, le bohobe bo ka serōtōng sa linyehelo tsa khalaletso, joalokaha Morena a laetse, a re: ‘Arone le bara ba hae ba tla li ja.’ ₃₂Nama e setseng, le bohobe bo setseng, le tla li chesa ka mollo. ₃₃Le qete matsatsi a supileng le sa tsoe ka monyako oa Tente ea Morena, ho fihlela matsatsi a khalaletso ea lōna a fela, hobane le tla halaletsoa ka matsatsi a supileng. ₃₄Morena o laetse hore ho etsoe se entsoeng kajeno, hore le etsetsoe tefelo ea sebe. ₃₅Le tla hlola monyakong oa Tente ea Morena ka matsatsi a supileng, motšeare le bosiu, le etsa seo Morena a le laetseng sona, le tle le se ke la shoa, hobane ke laetsoe joalo ke Morena.”

₃₆Arone le bara ba hae ba etsa tsohle tseo Morena a li laetseng Moshe.