Linyehelo tsa sebe se entsoeng e se ka morero
1Morena a bua ho Moshe, a re: 2“Bua le bana ba Iseraele, u re: ‘Ha motho a etsa sebe, ka ho tlōla o mong oa melao ea Morena, feela e se ka morero, ho etsoe tjena:
3“ ‘Haeba ea etsang sebe e le moprista ea tlotsitsoeng, 'me kahoo a lihela sechaba sebeng, o tla tlisetsa Morena pohoana e se nang sepha, 'me a etse sehlabelo ka baka la sebe sa hae. 4O tla tlisa pohoana ena monyakong oa Tente ea Morena kapele ho Morena, a bee letsoho la hae holim'a hlooho ea eona, a e hlabele Morena. 5Moprista ea tlotsitsoeng o tla nka a mang a mali a pohoana, a a ise ka Tenteng ea Morena. 6O tla ina monoana oa hae ka maling, a fōke kapele ho Morena, le kapele ho lesira la Sehalalelo, ka makhetlo a supileng. 7Ka mali a setseng o tla tlotsa manaka a lihukung tsa aletare ea mokubetso e kapele ho Morena, e ka Tenteng ea Morena. Mali a pohoana a setseng o tla a qhalla motheong oa aletare ea secheso, e monyakong oa Tente ea Morena. 8O tla nka mafura 'ohle a pohoana ea nyehelo e tlosang sebe, le mohlèhlo, le mafura a likahare, 9le liphieo tse peli le tšōtso ea tsona e ka mahlakoreng, le phapohane, a e tlose 'moho le liphieo tse peli. 10Moprista o tla nka mafura ana a a chesetse holim'a aletare ea secheso, joalokaha a etsa ka mafura a pohoana e nyeheloang e le sehlabelo sa teboho. 11Empa letlalo la eona, le nama eohle ea eona, le hlooho ea eona, le litlhako tsa eona, le likahare tsa eona, le mosoang oa eona, 12ke ho re pohoana eohle, tsena tsohle o tla li nkela kantle ho liahelo, sebakeng se hloekileng, thotobolong, a li chesetse teng ka patsi, a li chesetse thotobolong.
Linyehelo tse tlosang sebe sa sechaba
13“ ‘Haeba sechaba sohle sa Iseraele se etsa sebe, feela e se ka morero, 'me se sa tsebe hore se entse sebe, se tla ba molato, ka ho tlōla o mong oa melao ea Morena. 14Ha sebe sena se tsebahala, sechaba se tla nyehela ka pohoana, e le nyehelo e tlosang sebe. E tla tlisoa kapele ho Tente ea Morena. 15Baholo ba sechaba ba tla bea matsoho a bona holim'a hlooho ea pohoana, ba le kapele ho Morena, 'me ba e hlabele kapele ho Morena. 16Moprista ea tlotsitsoeng o tla isa a mang a mali a pohoana ka Tenteng oa Morena. 17O tla ina monoana oa hae ka maling, a fōke kapele ho Morena, le kapele ho lesira, ka makhetlo a supileng. 18Ka mali a mang o tla tlotsa manaka a lihukung tsa aletare ea mokubetso, e kapele ho Morena, e ka Tenteng ea Morena. Mali a setseng o tla a qhalla mothèong oa aletare ea secheso, e monyakong oa Tente ea Morena. 19Joale o tla nka mafura 'ohle a pohoana, 'me a a chesetse aletareng. 20Pohoana ena o tla e etsa joaloka pohoana e nyeheloang e le sehlabelo sa sebe; ka mokhoa o joalo moprista a ba etsetse tefelo ea sebe, 'me ba tla tšoareloa. 21O tla ntšetsa pohoana kantle ho liahelo, a e chese, joalokaha a ile a chesa pohoana ea pele. Ke nyehelo e tlosang sebe, e etsetsoang sechaba.
Nyehelo e tlosang sebe sa khosana
22“ ‘Ha khosana e etsa sebe, ka ho tlōla o mong oa melao ea Morena, Molimo oa hae, e se ka morero, e molato. 23Ha e elelloa sebe sena seo e se entseng, e tla tlisa nyehelo ea phooko, e se nang sepha. 24E tla bea letsoho la eona holim'a hlooho ea phooko ena, 'me e e hlabele kapele ho Morena, moo ho hlabeloang liphoofolo tsa secheso teng. Ena ke nyehelo e tlosang sebe. 25Moprista o tla ina monoana oa hae maling a phoofolo ena, a tlotse manaka a lihukung tsa aletare ea secheso, 'me mali a setseng a a qhalle mothèong oa aletare. 26Mafura 'ohle a eona o tla a chesetsa aletareng, joalokaha a etsa ka mafura a phoofolo ea sehlabelo sa teboho. Ka mokhoa o joalo moprista o tla etsetsa khosana tefelo ea sebe sa eona, 'me e tla tšoareloa.
Linyehelo tse tlosang sebe sa bafo
27“ ‘Ha e mong oa bafo, a etsa sebe e se ka morero, ka ho tlōla o mong oa melao ea Morena, o molato. 28Ha a elelloa sebe sena seo a se entseng, o tla tlisa nyehelo ea pōli ea sethole, e se nang sepha, ka baka la sebe sa hae. 29O tla bea letsoho la hae holim'a hlooho ea poli eo, 'me a e hlabele moo ho hlabeloang liphoofolo tsa nyehelo ea secheso teng. 30Joale moprista o tla ina monoana oa hae maling a phoofolo ena, a tlotse manaka a lihukung tsa aletare ea secheso, 'me mali 'ohle a setseng a a qhalle mothèong oa aletare. 31O tla tlosa mafura 'ohle a eona joalokaha ho tlosoa mafura a phoofolo ea sehlabelo sa teboho, 'me moprista a a chesetse aletareng e le sehlabelo se monko o monate, se amohelehang ho Morena. Moprista o tla mo etsetsa tefelo ka baka la sebe, 'me motho eo o tla tšoareloa.
32“ ‘Ha motho eo a tlisa konyana e le nyehelo e tlosang sebe, e be e tšehali, e se nang sepha. 33O tla bea letsoho la hae holim'a hlooho ea konyana eo, 'me a e hlabele moo ho hlabeloang liphoofolo tsa nyehelo ea secheso teng, e le nyehelo e tlosang sebe. 34Moprista o tla ina monoana oa hae maling a phoofolo eo, a tlotse manaka a lihuku tsa aletare ea secheso, 'me mali 'ohle a setseng a a qhalle mothèong oa aletare. 35O tla tlosa mafura 'ohle a eona joalokaha ho tlosoa mafura a konyana ea sehlabelo sa nyehelo ea teboho, 'me a a chesetse aletareng, holim'a linyehelo tse etsetsoang Morena. Ka mokhoa o joalo moprista o tla mo etsetsa tefelo ea sebe, 'me motho eo o tla tšoareloa.
