Melao ea limpho tsa Morena
1Morena a bua ho Moshe, a re:
2“Bua le bana ba Iseraele, u re ho bona: ‘Ha motho a rata ho phetha kano ea hore o tla nyehella Morena ka motho ea tla lefelloa chelete ea topollo, 3monna eo lilemo tsa hae li leng lipakeng tsa lilemo tse mashome a mabeli le mashome a tšeletseng, chelete ea topollo ea hae e tla ba silefera e etsang boima ba likeramo tse makholo a tšeletseng tse lekantsoeng ka tekanyo e sebelisoang ka Sehalalelong. 4Haeba e le mosali, eena chelete ea topollo ea hae e tla ba silefera e etsang boima ba likeramo tse makholo a mararo. 5Haeba e le moshanyana ea lilemo li hlano ho isa ho tse mashome a mabeli, eena chelete ea topollo ea hae e tla ba silefera e etsang boima ba likeramo tse makholo a mabeli, 'me ha e le ngoanana e be silefera e etsang boima ba likeramo tse lekholo le leshome. 6Haeba e le ngoana oa moshanyana ea khoeli ho isa lilemong tse hlano, chelete ea topollo ea hae e tla ba silefera e etsang boima ba likeramo tse mashome a mahlano a metso e mehlano, 'me ha e le ngoana oa ngoanana eena chelete ea topollo ea hae e tla ba silefera e etsang boima ba likeramo tse mashome a mararo a metso e mehlano. 7Haeba lilemo tsa motho li tloha ho tse mashome a tšeletseng ho ea holimo, 'me e le monna, chelete ea topollo ea hae e tla ba silefera e etsang boima ba likeramo tse lekholo le mashome a supileng; athe ha e le mosali e tla ba silefera e etsang boima ba likeramo tse lekholo le leshome. 8Haeba motho ea entseng kano a futsanehile hoo a sitoang ho lefa chelete e beiloeng, motho eo o tla hlahisoa kapele ho moprista, 'me moprista o tla lekanya chelete ea topollo ea hae, ho ea ka matla a ea entseng kano.
9“ ‘Haeba ho entsoe kano ka phoofolo e ka nyehelloang Morena, e le sehlabelo, phoofolo eo eohle e abeloang Morena e tla halalela. 10Motho eo a se ke a tlisa ho hong bakeng sa eona, kapa a tlisa esele; bakeng sa e ntle a se ke a tlisa e mpe, kapa bakeng sa e mpe a tlisa e ntle. Haeba a ka ananya phoofolo eo ka phoofolo esele, bobeli ba tsona li tla halalela. 11Haeba e le phoofolo e sa hloekang, e ke keng ea nyehelloa Morena e le sehlabelo, o tla tlisa phoofolo eo kapele ho moprista. 12Moprista o tla hakanya theko ea eona, ho ea ka hore na e ntle kapa e mpe, 'me ho tla uoa kamoo moprista a hakanyang kateng. 13Empa haeba ea entseng kano a rata ho lefa chelete ea topollo ea phoofolo eo, o tla a eketsa ka karolo e le 'ngoe ho tse hlano tsa chelete e hakantsoeng.
14“ ‘Ha motho a khethela Morena ntlo ea hae hore e halalele ho Morena, moprista o tla hakanya theko ea eona ho ea ka hore na e ntle kapa e mpe, 'me theko ea eona e tla ba kamoo moprista a e hakantseng kateng. 15Empa haeba motho ea khethetseng Morena ntlo ea hae a rata ho e lopolla, o tla eketsa ka karolo e le 'ngoe ho tse hlano tsa chelete e hakantsoeng, 'me ntlo e tla boela e e-ba ea hae.
16“ ‘Ha motho a khethela Morena karolo e 'ngoe ea tšimo ea hae eo e leng lefa la hae, khakanyo e tla etsoa ho ea ka peō e jalang karolo eo ea tšimo. Peō ea harese e boima ba likilo tse mashome a mabeli e tla ba silefera e etsang boima ba likeramo tse makholo a tšeletseng. 17Haeba motho a khethela Morena tšimo ea hae ka selemo sa mokete oa tokoloho, theko ea eona e tla ba kamoo e hakantsoeng kateng. 18Empa haeba motho a khethela Morena tšimo ea hae kamora' selemo sa mokete oa tokoloho, moprista o tla mo hakanyetsa theko ea eona ho ea ka lilemo tse sa setseng ho ea fihla selemong sa mokete oa tokoloho o tlang, ebe e tlosoa cheleteng ea tšimo, e hakantsoeng. 19Haeba ea khethetseng Morena tšimo eo a rata ho e lopolla, o tla eketsa ka karolo e le 'ngoe ho tse hlano tsa chelete e hakantsoeng, 'me tšimo e tla boela e e-ba ea hae. 20Empa haeba a sa lopolle tšimo eo, eba o e rekiselitse motho e mong, e ke ke ea hlola e lopolloa. 21Ka selemo sa mokete oa tokoloho, tšimo eo e tla lopolloa e se e halalela ho Morena, e le tšimo e abiloeng, 'me e tla ba ea moprista, e be lefa la hae.
22“ ‘Haeba motho a khethela Morena tšimo eo a e rekileng, e se ea lefa la hae, 23moprista o tla mo hakanyetsa chelete e lekanang lilemo tse sa setseng ho ea fihla moketeng oa tokoloho o tlang, 'me motho eo o tla ntša chelete e hakantsoeng ka lona letsatsi leo, e abeloe Morena e le ntho e halalelang. 24Ka selemo sa mokete oa tokoloho, tšimo eo e tla boela ho motho eo ea e rekisitseng, eo tšimo e neng e le lefa la hae. 25Khakanyo eohle e tla lekanngoa ka tekanyo e sebelisoang ka Sehalalelong. Ligera tse mashome a mabeli ke likeramo tse leshome le motso o le mong.
26“ ‘Ho se be motho ea ka khethelang Morena matsibolo a liphoofolo tsa hae, hobane 'ona ke a Morena; e ka ba matsibolo a khomo, kapa a nku, ke a Morena. 27Haeba e le phoofolo e sa hloekang, motho o tla e lopolla ho ea ka khakanyo ea hao, 'me o tla eketsa ka karolo e le 'ngoe ho tse hlano tsa chelete ea topollo. Haeba a sa e lopolle, e tla rekisoa ka chelete eo u e hakantseng.
28“ ‘Empa ntho efe kapa efe e abiloeng, eo motho a e abelang Morena, eo e leng ea motho ea e abang; e ka ba motho, kapa phoofolo, kapa tšimo eo e leng lefa la hae, e ke ke ea rekisoa kapa ea lopolloa. Ntho e 'ngoe le e 'ngoe e abiloeng, e halalela ka ho fetisisa ho Morena.
29“ ‘Motho ofe kapa ofe ea lelekiloeng sechabeng sa habo, a ke ke a lopolloa; ruri o tla bolaoa.
30“ ‘Karolo e 'ngoe le e 'ngoe ho tse leshome tsa kotulo ea naha, le ea peō e jaloang masimong, kapa ea litholoana tsa lifate, ke ea Morena; ea halalela. 31Haeba motho a rata ho lopolla karolo ea hae e le 'ngoe ho tse leshome, o tla e eketsa ka karolo ea eona e le 'ngoe ho tse hlano. 32Karolo e 'ngoe le e 'ngoe ea leshome, likhomong, kapa likhutšoaneng, tsohle tseo molisa a li balang ka molamu oa hae, e leng phoofolo e 'ngoe le 'ngoe ea leshome, e tla halalela ho Morena. 33Motho a se ke a hlahloba hore na e ntle kapa e mpe; le hona a se ke a e ananya ka e 'ngoe. Haeba a ka e ananya, eona le eo e anantsoeng, bobeli lia halalela, 'me li ke ke tsa lopolloa.’ ”
34Ena ke melao eo Morena a e laetseng Moshe, bakeng sa bana ba Iseraele, a le thabeng ea Sinai.
