Ho halalela ha baprista
1Morena a re ho Moshe: “Bua le baprista, e leng bara ba Arone, u re ho bona: ‘Moprista a se ke a itšilafatsa ka mofu oa sechaba sa habo, 2haese feela ka mofu eo a tsoalanang le eena, e leng 'm'ae, le ntat'ae, le mora oa hae, le morali oa hae, le ngoan'abo; 3le khaitseli ea hae e tsoaloang le eena, eo e sa leng moroetsana, e e-s'ong ho nyaloe. Bana a ka itšilafatsa ka bona. 4Empa moprista a se ke a itšilafatsa ka khaitseli ea hae e nyetsoeng, hobane ka hona o tla be a itšilafatsa.
5“ ‘Baprista ba se ke ba beola moriri o har'a hlooho tsa bona, ba se ke ba sekola litelu tsa bona, leha e le ho iphatsa 'meleng. 6Ba tla halalela ho Molimo oa bona, 'me ba se ke ba silafatsa lebitso la Molimo oa bona. Kahobane ke bona ba etsang nyehelo ea secheso ea Morena, e leng lijo tsa Molimo, tseo ba nyehelang ka tsona, ba lokela ho halalela.
7“ ‘Moprista a se ke a nyala mosali oa seotsoa kapa ea silafetseng; le mosali ea hlalaneng le monna oa hae a se ke a mo nyala, hobane moprista oa halalela ho Molimo oa hae. 8U mo tsebe a halalela, hobane ke eena ea nyehellang Molimo oa hao ka lijo. O tla halalela ho uena, hobane 'na, Morena ea u halaletsang, kea halalela.
9“ ‘Morali oa moprista ha a itšilafatsa ka bootsoa, o silafatsa ntat'ae, 'me morali eo o tla chesoa ka mollo.
10“ ‘Moprista e Moholo, ea ileng a tšèloa hloohong ka ole e tlotsang, ea ileng a halaletsoa hore a tle a apare liaparo tsa boprista, a se ke a tlohela moriri oa hae oa hlanthōlōha, 'me a se ke a hahōla liaparo tsa hae. 11A se ke a kena kamoo ho beiloeng setōpō; leha e ka ba setōpō sa ntat'ae kapa sa 'm'ae, a se ke a itšilafatsa ka ho kena ka ho sona. 12A se ke a tsoa ka Sehalalelong, esere a silafatsa Sehalalelo sa Molimo oa hae, hobane o halalelitsoe ke Molimo ka ho tšèloa ka ole e tlotsang. Ke 'na Morena.
13“ ‘A nyale moroetsana. 14A se ke a nyala mohlolohali, kapa mosali ea hlaliloeng, kapa seraburabu, kapa seotsoa, empa a nyale moroetsana oa sechaba sa habo. 15A se ke a silafatsa bana ba hae sechabeng sa habo, hobane ke 'na Morena ea mo halaletsang.’ ”
16Morena a bua ho Moshe, a re: 17“Bua ho Arone, u re: ‘Har'a litlōhōlō tsa hao, melōkong eohle ea tsona, ho se be monna ea nang le sepha, ea tla etsa nyehelo ea lijo tsa Molimo oa hae. 18Monna ofe kapa ofe ea nang le sepha, e ka ba monna oa sefofu, kapa oa sehlotsa, kapa ea holofetseng nko, kapa ea litho li fetanang; 19kapa monna ea robehileng leoto kapa letsoho; 20kapa monna ea lekhutla, kapa oa kakachelana, kapa ea qhōmmeng leihlo, kapa ea nang le setlapeli, kapa ea lekhoekhoe, kapa ea pshatlehileng makoalata; bana bohle ba se ke ba atamela. 21Monna e mong le e mong oa lelōko la moprista Arone, ea nang le sepha, a se ke a atamela ho etsa nyehelo ea secheso ea Morena. O na le sepha, 'me a se ke a atamela ho nyehela ka lijo tsa Molimo oa hae. 22A ka ja bohobe ba Molimo oa hae bo halalelang ka ho fetisisa, le bo halalelang. 23Empa a se ke a atamela lesira, leha e le ho atamela aletare, hobane o na le sepha, esere a silafatsa lintho tsa ka tse halalelang, hobane ke 'na Morena ea li halaletsang.’ ”
24Moshe a bua joalo ho Arone le ho bara ba hae, le ho bana bohle ba Iseraele.
