KOLI-EA-MALLA 5

₁Morena, ak'u hopole

tse re oetseng holimo!

Ak'u talime,

u bone sekhobo sa rōna!

₂Naha ea rōna

e hapiloe ke balichaba,

melata e ikabile ka malapa a rōna.

₃Re likhutsanyana,

bo-ntat'a rōna ba shoele,

bo-'m'a rōna

ba fetohile bahlolohali.

₄Re noa metsi a rekoang ka chelete,

patsi re e fumana ka ho e reka!

₅Baphalalisi ba rōna

ba re hateletse melala,

re sebetsa ka thata,

phomolo ha re e fumane.

₆Ra ipea tlas'a Egepeta le Asiria,

re tle re tsebe ho fumana bohobe.

₇Bo-ntat'a rōna ba entse libe,

'me ba shoele,

rōna re ahlōleloa makhopo a bona.

₈Makhoba a fetohile babusi ba rōna,

ha ho ea re namolelang

matsohong a 'ona.

₉Re fumana lijo

re okametsoe ke lefu,

ka baka la sabole e lehoatateng.

₁₀Letlalo la rōna

le ntšofetse sa sebōpi,

ka baka la ho phela har'a sekoboto.

₁₁Ba ile ba beta basali ba Sione,

ba beta le baroetsana

ba metse ea Juda.

₁₂Mahosana a il'a tšoaroa,

a fanyehoa,

baholo ba sechaba

ba rōleloa hlompho.

₁₃Bahlankana ba sebetsa ka thata,

baa sila,

bashanyana ba sulubana

tlas'a mangata a patsi.

₁₄Maqheku ha a sa lula

khorong ea motse,

bacha ba khaolitse

ho letsa mokolilo.

₁₅Thabo ea pelo tsa rōna e felile,

metjeko ea rōna e fetohile bofifi.

₁₆Meqhaka e oele hloohong tsa rōna,

re malimabe, hobane re sitiloe.

₁₇Ka baka la tsena

pelo tsa rōna li nyahame,

ka baka la tsena

mahlo a rōna a fifetse.

₁₈Kahobane thaba ea Sione

e le feela,

phokojoe li nyanyaka

har'a masupi a eona.

₁₉Uena Morena,

u busa kamehla eohle,

terone ea hao

e hlomamiselitsoe melōko eohle.

₂₀Ke ka baka la'ng

u re lebalang kamehla?

Ke ka baka la'ng

u re furallang halelele?

₂₁Re khutlisetse ho uena Morena,

re tla khutla,

nchafatsa tšiu tsa rōna

li be joaloka pele.

₂₂Kapa ebe u s'u re lahletse ruri?

Khalefo ea hao ha e sa na moeli?