JOSHUA 22

₁Joshua a bitsa ba morabe oa Rubene, le ba morabe oa Gade, le ba karolo e 'ngoe ea morabe oa Manase, ₂a re ho bona: “Le bōlōkile tsohle tseo Moshe, mohlanka oa Morena, a le laetseng tsona; le 'na le mametse lentsoe la ka linthong tsohle tseo ke le laetseng tsona. ₃Ka nako e telele ena, ho fihlela kajeno, ha le e-s'o lahle bana babo lōna, empa le bōlōkile taelo ea Morena Molimo oa lōna. ₄Morena Molimo oa lōna, o phomolitse bana babo lōna joalokaha a ne a ba tšepise; ka baka leo, khutlang, le boele litenteng tsa lōna mose ho Jorodane, naheng ea lōna, eo Moshe mohlanka oa Morena, a neng a le nee eona. ₅Feela le ele hloko, le bōlōke taelo le molao oo Moshe mohlanka oa Morena, a le laetseng oona: Le rate Morena Molimo oa lōna, le tsamaee litseleng tsohle tsa hae, le bōlōke melao ea hae, le mo khomarele, le mo sebeletse ka lipelo tsa lōna tsohle, le ka moea oa lōna oohle.”

₆Eaba Joshua oa ba hlohonolofatsa, oa ba qhala, 'me ba ikela litenteng tsa bona.

₇Moshe o ne a ile a nea karolo e 'ngoe ea morabe oa Manase naha, Bashane; Joshua eena a nea karolo e 'ngoe ea bona naha har'a bana babo bona, mose ho Jorodane, ka bophirimela. Le bona, ha Joshua a ba qhala hore ba boele litenteng tsa bona, a ba hlohonolofatsa. ₈A bua le bona, a re: “Le boela litenteng tsa lōna le e-na le leruo le lengata, le liphoofolo tse ngata, le silefera, le khauta, le lethose, le tšepe, le liaparo tse ngata. Arolelang bana babo lōna tseo le li hapileng ho lira tsa lōna.”

₉Bana ba Rubene, le bana ba Gade, le ba karolo e 'ngoe ea morabe oa Manase, ba tloha ho bana ba Iseraele, Shilo, e naheng ea Kanana, ba ea naheng ea bona ea Gileade, eo ba neng ba e neoe ke Moshe ka taelo ea Morena.

₁₀Ha ba fihla seterekeng sa Jorodane, se naheng ea Kanana, bana ba Rubene, le bana ba Gade, le ba karolo e 'ngoe ea morabe oa Manase, ba haha aletare e kholo moo, holim'a lebōpo la Jorodane. ₁₁Bana ba bang ba Iseraele ba utloa ho thoe: “Helang! bana ba Rubene, le bana ba Gade, le ba karolo e 'ngoe ea morabe oa Manase, ba hahile aletare Gelelote, seterekeng sa Jorodane, lehlakoreng le ka ho bana ba Iseraele.” ₁₂Ha bana ba bang ba Iseraele ba utloa taba ena sechaba sohle sa bana ba Iseraele sa phuthehela Shilo, ho ba futuhela.

₁₃Bana ba Iseraele ba rōma Finease, mora oa moprista Eleasare, ho bana ba Rubene, le ho bana ba Gade, le ho ba karolo e 'ngoe ea morabe oa Manase, ba le Gileade. ₁₄Ba mo rōma le mahosana a leshome, khosana e 'ngoe le e 'ngoe e le ea lelapa ka leng la malapa 'ohle a Iseraele, 'me khosana e 'ngoe le e 'ngoe e le hlooho ea lelapa labo eona har'a merabe ea Iseraele.

₁₅Ba fihla Gileade ho bana ba Rubene, le ho bana ba Gade, le ho ba karolo e 'ngoe ea morabe oa Manase, ba bua le bona, ba re: ₁₆“Sechaba sohle sa Morena se bua tjena: ‘Bohlabaphieo boo ke bo joang, boo le bo etselitseng Molimo oa Iseraele, ha e le moo kajeno le tlohetse ho latela Morena, ka ho ikhahela aletare, hore le fetohele Morena kajeno? ₁₇Ebe le bona bokhopo bo entsoeng ha re le Peore, boo le kajeno re e-s'o itlose sesila sa bona, bo sa lekana, leha sechaba sa Morena se ne se oeloe ke seoa, ₁₈hoo kajeno le ka fetohelang Morena? Ha e le mona kajeno le fetohela Morena, ho tla etsahala hore hosasane a halefele sechaba sohle sa Iseraele. ₁₉Joale he, haeba naha eo e leng ea lōna e silafetse, tšelelang ka naheng eo e leng ea Morena, moo Tente ea Morena e leng teng, 'me lōna le ahe har'a rōna. Empa le se ke la fetohela Morena, kapa le rōna la re fetohela, ka ho ikhahela aletare esele ho aletare ea Morena Molimo oa rōna. ₂₀Kapa le se le lebetse hore Akane, mora oa Sera, o ne a etse tšito ka ho nka lintho tse neng li rōhakiloe, eaba Morena o halefela sechaba sohle sa Iseraele? Bokhopo bono ba hae ha boa ka ba timetsa eena a le mong feela!’ ”

₂₁Bana ba Rubene, le bana ba Gade, le ba karolo e 'ngoe ea morabe oa Manase, ba araba lihlooho tsa merabe ea Iseraele, ba re: ₂₂“Morena Molimo oa melimo! Morena Molimo oa melimo! Molimo oa tseba, le lōna Baiseraele le tsebe! Haeba hona ke bofetoheli kapa bohlabaphieo, re timetsoe hona kajeno! ₂₃Haeba re ikhahetse aletare hore re tlohele ho latela Morena, kapa ho nyehella holim'a eona ka nyehelo ea secheso, kapa ka nyehelo ea lijo, kapa ho nyehella ho eona ka linyehelo tsa teboho, Morena a re ahlōle ka boeena.

₂₄“Re entse hona hobane re ne re tšaba hore ka nako e tlang bana ba lōna ba tla re ho bana ba rōna: ‘Le kopana ka eng le Morena Molimo oa Iseraele? ₂₅Pakeng tsa rōna le lōna, lōna bana ba Rubene, le lōna bana ba Gade, Morena o entse hore Jorodane e be moeli. Lōna ha le na kabelo ea letho ho Morena!’ Ke moo bana ba lōna ba tla etsa hore bana ba rōna ba se ke ba hlola ba tšaba Morena.

₂₆“Ka baka leo, re ile ra re: ‘A re haheng aletare, feela e se be eo ho etsetsoang nyehelo ea secheso, kapa ea sehlabelo holim'a eona,’ ₂₇empa e be paki e pakeng tsa rōna le lōna, le pakeng tsa litlōhōlō tsa rōna, hore le rōna re tla etsetsa Morena tšebeletso moo a leng teng, ka linyehelo tsa rōna tsa secheso, le ka mahlabelo a rōna, le ka linyehelo tsa rōna tsa teboho; esere ka nako e tlang bana ba lōna ba re ho bana ba rōna: ‘Ha le na kabelo ea letho ho Morena!’

₂₈“Ka baka leo, re ile ra re etlare ka nako e tlang, ha ba bua joalo ho rōna kapa ho bana ba rōna, ebe re re: ‘Bonang moaho ona oa aletare ea Morena, e tšoanang le eo bo-ntat'a rōna ba e hahileng, ba sa e hahe e le e etsetsang nyehelo ea secheso, kapa ea sehlabelo, empa e le paki e pakeng tsa rōna le lōna.’

₂₉“Re thōko haholo le ho fetohela Morena, le hore kajeno re mo furalle, re se ke ra mo latela ka ho haha aletare eo ho eona ho etsetsoang nyehelo ea secheso, le nyehelo ea lijo, kapa ea sehlabelo, e le e kathōko ho aletare ea Morena Molimo oa rōna, e kapele ho Tente ea hae.”

₃₀Eare ha bo-moprista Finease, le mahosana a sechaba, le lihlooho tsa merabe ea Iseraele, ba utloa mantsoe a builoeng ke bana ba Rubene, le bana ba Gade, le bana ba karolo e 'ngoe ea Manase, ba khotsofala. ₃₁Finease, mora oa moprista Eleasare, a re ho bana ba Rubene, le ho bana ba Gade, le ho ba karolo e 'ngoe ea morabe oa Manase: “Kajeno rea tseba hore Morena o teng kahar'a rōna, hobane ha lea etsetsa Morena bohlabaphieo bona; le pholositse bana ba Iseraele matsohong a Morena.”

₃₂Joale bo-Finease, mora oa moprista Eleasare, le mahosana, ba tloha ho bana ba Rubene, le ho bana ba Gade, ba tsoa naheng ea Gileade, ba khutlela naheng ea Kanana ho bana ba Iseraele, ba fihla ba ba phetela litaba. ₃₃Tsena tsa khotsofatsa bana ba Iseraele, 'me bana ba Iseraele ba boka Molimo. Ba khaotsa ho bua ka ho ba futuhela, le ho ripitla naha eo bana ba Rubene, le bana ba Gade ba neng ba ahile ho eona.

₃₄Bana ba Rubene le bana ba Gade ba rea aletare eo lebitso la “Paki”, hobane ba ne ba re: “Ena ke paki ho rōna bohle hore Morena ke Molimo.”