JOSHUA 16

₁Lōtho la abela bana ba Josefa naha e tlohang Jorodane, pel'a Jeriko, ka bochabela ho liliba tsa Jeriko, ho ea fihla lehoatateng; le ho tloha Jeriko, ho nyolosa har'a naha e maralla, ho ea fihla Bethele. ₂Moeli oa tloha Bethele ho ea fihla Lōse, oa fetela pele ho ea fihla moeling oa Baareki le ho ea fihla Atarote. ₃Moeli oa theohela bophirimela, ho ea fihla naheng ea Bajafelete, le moeling oa Bete-Horone e tlase, le ho ea fihla Gesere, oa ea fella leoatleng.

₄Bana ba Josefa, le ba Manase, le ba Efraime, ba ile ba fumana lefa la bona hona moo.

₅Moeli oa naha ea bana ba Efraime, ho ea ka malapa abo bona, ea e-ba ona: Ka bochabela moeli oa naha ea bona o ne o tloha Atarote-Adare, o ea fihla Bete-Horone e holimo. ₆Moeli o lebe bophirimela, Mikemetate e be ka leboea ho oona; o thinyetse ka bochabela ho ea fihla Taanate-Shilo, o fihle o fete pel'a eona ka bochabela ho Janoha. ₇Ho tloha Janoha o theosetse Atarote le Naarate, o e'o fihla Jeriko, o felle Jorodane. ₈Ho tloha Tapua moeli o ne o leba bophirimela, ho ea fihla molatsoaneng oa Kana, o e'o fella leoatleng. Ena ke eona naha ea morabe oa bana ba Efraime, ho ea ka malapa abo bona; ₉hammoho le metse, le metsana eohle, e neng e abetsoe bana ba Efraime, e fumanoa har'a naha eo e neng e le lefa la bana ba Manase.

₁₀Leha ho le joalo ha baa ka ba ba ba leleka Bakanana ba neng ba ahile Gesere. Bakanana ba 'nile ba aha har'a bana ba Efraime ho fihlela kajeno-ea-bokajeno, 'me ba fetoha makhoba a sebetsang ka thata.