JOSHUA 15

₁Naha eo bana ba morabe oa Juda, ho ea ka malapa abo bona, ba ileng ba e abeloa ka lōtho, e ne e fihla moeling oa Edomo, le ho ea fihla ka boroa ho lehoatata la Sine, qetheng ea karolo e ka boroa.

₂Ka boroa moeli oa bona o ne o tloha qetheng ea karolo ea Leoatle la Letsoai, koung e shebileng boroa. ₃Ho tloha moo o lebe ka boroa ho moepa oa Akarabime, o fetele Sine, o e'o nyoloha ka boroa ho Kadeshe-Barenea, o fete pel'a Heserone, o nyolohele Adare, o nt'o thinyetsa Karaka. ₄Joale moeli ona o fete pel'a Asamone, o nyolose ka molatsoana oa Egepeta, ebe o il'o fella leoatleng. Ona e tla ba oona moeli oa bona ka boroa.

₅Ka bochabela moeli o ne o tloha Leoatleng la Letsoai, o be o e'o fihla molomong oa Jorodane.

Ka leboea moeli o ne o tloha koung ea leoatle, moo Jorodane e kenang leoatleng teng.

₆Moeli o ne o nyolosetsa Bete-Hogela, o e'o pota ka leboea ho Bete-Araba, o nyolose hape ho ea fihla Lefikeng la Bohane, mora oa Rubene. ₇Moeli o nyolohe Debiri, ho tloha khohlong ea Akore ho ea leboea, o nt'o thinyetsa Gilegale e lebaneng le moepa oa Adumime e ka lehlakoreng le ka boroa la molatsoana. Joale o fetele metsing a Ene-Shemeshe, o e'o fella Selibeng sa Rogele. ₈Moeli o nyolose ka khohlo ea mora oa Hinome, ka lehlakoreng le ka boroa ho Bajebuse – ke eona Jerusalema – o nyolohele tlhōrōng ea thaba e kapele ho khohlo ea Hinome, ka bophirimela, e leng ka leboea qetheng ea khohloana ea Refaime. ₉Joale moeli oa sehoa ho tloha tlhōrōng ea thaba, ho ea fihla selibeng sa Metsi a Nefetoa; oa fetela metseng ea thaba ea Eferone. Oa boela oa sehoa ho ea Baala – ke eona Kiriate-Jerime. ₁₀Joale moeli o thinyetse ka bophirimela ho Baala, ho ea fihla thabeng ea Seire, ebe o fetela leropong le ka leboea la thaba ea Jearime – ke eona Kesalone – oa theosa ho ea fihla Bete-Shemeshe, oa ea feta Timina. ₁₁Moeli ona oa leba leropong la Ekerone le ka leboea, oa sehoa ho ea fihla Shikarone, oa fetela thabeng ea Baala, oa fetela le Jabeneele, oa ea fella leoatleng.

₁₂Ka bophirimela moeli e ne e le Leoatle le Leholo le lebōpo la lona.

Ona ke oona moeli oa bana ba Juda, ho ea ka malapa abo bona.

₁₃Ho ea ka taelo ea Morena ho Joshua, Kalebe, mora oa Jefune, o ile a abeloa karolo ea naha har'a bana ba Juda; a mo abela le motse oa Areba, 'me Areba e ne e le ntat'a Anake. Ke eona Heborone. ₁₄Naheng eo, Kalebe a leleka bara ba bararo ba Anake e leng Sheshai, le Ahimane, le Talamai, litlōhōlō tsa Anake. ₁₅Kalebe a nyoloha teng, a futuhela baahi ba motse oa Debiri. Lebitso la pele la motse oa Debiri e ne e le Kiriate-Sefere. ₁₆Eaba Kalebe o re: “Mang kapa mang ea ka futuhelang motse oa Kiriate-Sefere, 'me a o hapa, ke tla mo nea morali oa ka Akasa, hore e be mosali oa hae.” ₁₇Eaba Oteniele, mora oa Kenase, ngoan'abo Kalebe, o hapa Kiriate-Sefere, 'me Kalebe a mo nea morali oa hae hore e be mosali oa hae. ₁₈Ha Akasa a fihla ho Oteniele, Oteniele a mo pheella hore a kōpe ntat'ae, Kalebe, a ke a mo qōthele naha.

Ha Akasa a thōlōha tonki ea hae, Kalebe a re ho eena: “U batla'ng?”

₁₉Akasa a re: “Ak'u mphe mpho e 'ngoe hape. Erekaha u 'neile naha ea Negebe, ak'u mphe le liliba.” Kalebe a mo nea liliba tse holimo le tse tlase.

₂₀Lena ke lōna lefa la morabe oa bana ba Juda, ho ea ka malapa abo bona.

₂₁Karolong ea naha ea morabe oa bana ba Juda, metse e hōle-hōle ho ea moeling oa Edomo, ka boroa, e ne e le Kabeseele, le Edere, le Jagure, ₂₂le Kina, le Dimona, le Adada, ₂₃le Kedeshe, le Hasore, le Jitenane, ₂₄le Sife, le Teleme, le Bealote, ₂₅le Hasore-Hadata, le Keriote-Heserone, e leng Hasore, ₂₆le Amame, le Shema, le Molada, ₂₇le Hasere-Gada, le Heshemone, le Bete-Pelete, ₂₈le Hasere-Shuale, le Beeresheba, le Bisiotia, ₂₉le Baala, le Ijime, le Eseme, ₃₀le Eletolade, le Kesile, le Horema, ₃₁le Sikelage, le Mademana, le Sanesanna, ₃₂le Lebaote, le Shilehime, le Aine, le Rimone. Metse ena e ne e le mashome a mabeli a metso e robong, le metsana ea eona.

₃₃Liphuleng metse e ne e le Eshetaole, le Sora, le Ashena, ₃₄le Sanōoa, le Ene-Gannime, le Tapua, le Ename, ₃₅le Jaremute, le Adulame, le Soko, le Aseka, ₃₆le Shaaraime, le Aditaime, le Gedera, le Gederotaime. Metse ena e ne e le leshome le metso e mene, le metsana ea eona.

₃₇E nt'o ba Senane, le Hadasha, le Migedale-Gade, ₃₈le Dilane, le Misepa, le Jokothele, ₃₉le Lakishe, le Bosekate, le Egelone, ₄₀le Kabone, le Lahamase, le Kiteleshe, ₄₁le Gederote, le Bete-Dagone, le Naama, le Makeda. Metse ena e ne e le leshome le metso e tšeletseng, le metsana ea eona.

₄₂E be Lebena, le Etere, le Ashane, ₄₃le Jifeta, le Ashena, le Nesibo, ₄₄le Keila, le Akasibe, le Maresha. Metse ena e ne e le robong, le metsana ea eona.

₄₅E be Ekerone, le metse ea eona, le metsana ea eona. ₄₆Ho tloha Ekerone, ho ea fihla leoatleng, e be metse eohle, le metsana ea eona, e pel'a Ashedode. ₄₇E ntan'o ba Ashedode, le metse le metsana ea eona; le Gasa, le metse le metsana ea eona, ho ea fihla molatsoaneng oa Egepeta, le Leoatleng le Leholo, le mabōpong a lona.

₄₈Naheng e maralla metse e ne e le ena: Shamire, le Jatire, le Soko, ₄₉le Dana, le Kiriate-Sanna, e leng Debiri, ₅₀le Anabe, le Eshetemoa, le Anime, ₅₁le Goshene, le Holone, le Gilo. Metse ena e ne e le leshome le motso o mong, le metsana ea eona.

₅₂E be Arabe, le Duma, le Eshane, ₅₃le Janume, le Bete-Tapua, le Afeka, ₅₄le Humeta, le Motse oa Areba, e leng Heborone, le Siore. Metse ena e ne e le robong, le metsana ea eona.

₅₅E be Maone, le Karamele, le Sife, le Juta, ₅₆le Jesereele, le Jokodeame, le Sanōoa, ₅₇le Kaine, le Gibea, le Timina. Metse ena e ne e le leshome, le metsana ea eona.

₅₈E be Halehule, le Bete-Sure, le Gedore, ₅₉le Maarate, le Bete-Anote, le Eletekone. Metse ena e ne e tšeletse, le metsana ea eona.

₆₀E be Kiriate-Baale, e leng Kiriate-Jearime, le Raba. Metse ena e ne e le 'meli, le metsana ea eona.

₆₁Lehoatateng e ne e le Bete-Araba, le Midine, le Sekake, ₆₂le Nibeshane, le Motse oa Letsoai, le Ene-Gedi. Metse ena e ne e tšeletse, ho sa balelloe metsana ea eona.

₆₃Ha e le Bajebuse bona, e leng baahi ba Jerusalema, bana ba Juda ba ile ba sitoa ho ba leleka. Ke ka baka leo le kajeno-ea-bokajeno, Bajebuse ba ntseng ba ahile Jerusalema, 'moho le bana ba Juda.