Ho lokisetsoa ho hapa Kanana
1Hoba Moshe, mohlanka oa Morena, a shoe, Morena a bua ho Joshua, mora oa Nune, lehlahana la Moshe, a re: 2“Moshe, mohlanka oa ka, o shoele. Ka baka leo, tsamaea, u tšele nōka ena ea Jorodane, uena le sechaba sena sohle sa Iseraele, le tšelele naheng eo ke le neang eona. 3Libaka tsohle tseo le tla tsamaea ho tsona ke le neile tsona, joalokaha ke ne ke bue ho Moshe. 4Moeli oa lōna o tla tloha lehoatateng, o e'o fihla Lebanone, o tlohe Nōkeng e Kholo, e leng nōka ea Euferatese, o e'o fihla Leoatleng le Leholo, ka bophirimela, o akaretse naha eohle ea Bahete. Ha ho ea tla u ema kapele ka nako tsohle ha u ntse u phela. 5Ke tla ba le uena joalokaha ke bile le Moshe; ha nka ke ka u lahla, kapa ka u furalla.,
6“Tsoha molōta, u be sebete, hobane ke uena ea tla arolela sechaba sena naha eo ke neng ke hlapanyetse bo-ntat'a sona hore ke tla se nea eona e le lefa la sona. 7Feela tsoha molōta, u be sebete, u hlokomele ho phetha molao oohle oo mohlanka oa ka Moshe a u laetseng oona. U se ke ua o kheloha joang kapa joang, e le hore u tle u atlehe hohle moo u eang teng. 8Kamehla u bue ka Molao ona, u o nahane motšeare le bosiu, e le hore u tle u hlokomele ho phetha tsohle tse ngotsoeng ho oona, u tle u atlehe mesebetsing ea hao, 'me u hlohonolofale ho tsohle tseo u li etsang. 9Ke se ke u laetse: Tsoha molōta, u be sebete! U se ke ua tšaba, kapa ua nyahama pelo, hobane Morena Molimo oa hao, o na le uena hohle moo u eang teng.”
10Joshua a laela baokameli ba sechaba, a re: 11“Tsamaeang har'a liahelo, le laele sechaba, le re: ‘Ipheheleng mofao hobane kamor'a matsatsi a mararo le tla tšela nōka ena ea Jorodane, ho ea hapa naha eo Morena Molimo oa lōna, a le neang eona hore e be ea lōna.’ ”
Merabe e kamose ho Jorodane
12Joshua a bua ho ba morabe oa Rubene, le ho ba morabe oa Gade, le ho karolo e 'ngoe ea ba morabe oa Manase, a re: 13“Hopolang lentsoe leo Moshe, mohlanka oa Morena, a neng a le laele lona, a re: ‘Morena Molimo oa lōna, o tla le phomotsa, a le nee naha ena.’ 14Ho sale basali ba lōna, le bana ba lōna, le liphoofolo tsa lōna naheng eo Moshe a le neileng eona ka koano ho Jorodane, empa lōna bohle, bao le leng banna ba bahale, ba matla, le tla tšela le hlometse, le eteletse bana babo lōna pele, le ba thuse. 15Ha Morena a se a phomolitse bana bao babo lōna, joaloka lōna, 'me le bona ba se ba hapile naha eo Morena Molimo oa lōna, a ba neang eona, ke hona le ka khutlelang naheng ea lōna, la lula ho eona, e leng naha eo Moshe, mohlanka oa Morena, a le neileng eona, kamose ho Jorodane, nq'a bochabela.”
16Ba araba Joshua, ba re: “Re tla etsa tsohle tseo u re laetseng tsona, 'me hohle moo u tla re rōmela teng re tla ea. 17Re tla u mamela linthong tsohle, joalokaha re ile ra mamela Moshe. E se eka Morena Molimo oa hao, a ka ba le uena joalokaha a ne a e-na le Moshe. 18Mang le mang ea tla fetohela melao ea hao, ea sa tl'o mamela lipolelo tsa hao tsohle, tseo u ka re laelang tsona, o tla bolaoa. Empa uena, tsoha molōta, u be sebete.”
