Morena o tla ahlōla lichaba
1“Bonang, ka matsatsi ao,
ka eona nako eo,
ke tla atlehisa ba Juda
le ba Jerusalema.
2Ke tla phutha lichaba tsohle,
ke li theolele
ka Khohlong ea Jehoshafate,
ke li ahlōlele hona kateng,
ka baka la sechaba sa ka,
sechaba sa ka sa Iseraele,
hobane li ile tsa se qhalanyetsa
har'a balichaba,
tsa arola naha ea ka likoto-koto.
3Li ile tsa laola
sechaba sa ka ka lōtho,
tsa ananya moshanyana ka seotsoa,
tsa reka veine ka ngoanana,
hore li tle li e noe.
4“Uena Tire, le uena Sidone, le lōna libaka tsohle tsa Filesitiea, e ka ba le mpatla'ng? Le tla mpuseletsa ka eng? Haeba le tla mpuseletsa, seo le se entseng ke tla le buseletsa sona ka potlako. 5Le nkile silefera ea ka le khauta ea ka, la isa matlotlo a ka a bohlokoa ka litempeleng tsa lōna. 6Le rekisitse baahi ba Juda le ba Jerusalema ho Bagerike, e le hore le ba ise hōle le naha ea habo bona.
7“Bonang, ke tla ba khutlisa libakeng tsohle tseo le ba rekisitseng ho tsona, ke phetetse seo le se entseng. 8Ke tla rekisa bara le barali ba lōna ho sechaba sa Juda, 'me sona se tla ba rekisetsa Basheba, e leng sechaba se hōle,” ho rialo Morena.
9“Phatlalletsang lichaba hona,
le re: ‘Hlomellang ntoa!
Bitsang bahale!
Bahlabani bohle ba ke ba atamele,
ba atamele, ba tl'o futuha!
10Khobang mehom'a lōna
le etse lisabole;
leotsang lisekele tsa lōna,
le etse marumo!
Ea fokolang a ke a re:
“'Na ke mohale!”
11Lōna lichaba tsohle,
phallang, khōbōkanang,
le phuthehele ka Khohlong!’ ”
Morena, laola bahale ba hao
ba theohe.
12“Lichaba li ke li itokise,
li theohele
ka Khohlong ea Jehoshafate;
ke tla lula kateng ke li ahlōle,
ke ahlōle chaba tsohle
tse phuthehileng.
13Akhelang sekele,
hobane mabele a butsoitse.
Tloong, le tl'o hatakela morara,
hobane setlhōtlelo sa morara
se tletse;
merifi e tletse, ea khaphatseha,
hobane bokhopo ba tsona
bo totile!”
14Matšoele-tšoele
a s'a le ka Khohlong ea Kahlōlo!
Letsatsi la Morena le haufi,
le atametse,
tsatsi la ho theohela
ka Khohlong ea Kahlōlo.
15Letsatsi le khoeli li tla fifala,
linaleli le tsona
li ke ke tsa phatsima.
Morena o tla hlohonolofatsa sechaba sa hae
16Morena o tla puruma a le Sione,
a thoathoaretse a le Jerusalema,
maholimo le lefatše le reketle.
Morena ke setšabelo
sa chaba sa hae,
ke qhobosheane
ea chaba sa Iseraele.
17“Kahoo le tla tseba
hore ke 'na Morena,
Morena Molimo oa lōna,
ea ahileng Sione,
thabeng ea ka e halalelang;
Jerusalema e tla ba sebaka,
baka se khethehileng,
balichaba ba ke ke
ba hlola ba feta kahar'a eona.
18“Mohl'a tsatsi leo,
thaba li tla rothisa veine,
maralla 'ona a kopotse lebese;
melatsoana eohle ea Juda
e phalle metsi.
Seliba se tla kolla
ka Tempeleng ea Morena, se kolle,
se noesetse Khohlo ea Shitime.
19“Egepeta e tla fetoha nanaola,
Edomo eona e fetohe lefeela,
hobane chaba sa Juda
se ile sa hlekefetsoa,
mali a sona a tšolloa
a se na molato.
20Naha ea Juda
e tla ba le baahi kamehla eohle,
Jerusalema
e be le baahi ba melōko eohle.
21Ke tla tšoarela chaba sa ka,
ke se tšoarele libe tsa sona,
libe tseo ke neng
ke e-s'o se tšoarele tsona.
'Na Morena, ke tla aha Sione!”
