JOELE 1

₂Lōna maqheku mamelang mona!

Lōna baahi bohle ba naha,

sekehang tsebe!

Na mehleng ea lōna

ntho e tjee e kil'a bonoa?

Mehleng ea bo-ntat'a lōna

teng e kil'a bonoa?

₃Lōna le e phetele bana ba lōna;

bona ba e phetele litlōhōlō tsa lōna;

tsona li e phetele

litlōhōloana tsa lōna.

₄Litsie tsa fihlellana ka mekhahlelo:

oa pele oa e-ja lijalo, oa siea,

oa bobeli oa e-ja, le oona oa siea,

oa boraro oa e-ja, le oona oa siea,

oa bone oa e-ja, oa kōkōna tsohle.

₅Lōna matahoa, tsohang le lle!

Lōna bohle ba noang veine,

bokollang, le lle,

le llele veine e ncha,

hoba le e amohiloe

le le khatheng la ho e latsoa.

₆Chaba ke seo

se futuhela naha ea heso

ke chaba se matla,

palo ea sona ke boieane;

meno a sona ekare a lekakuba,

mekoètsèpè ea sona

ekare ea tauhali.

₇Fate tsa ka tsa morara

se se se li sentse,

tsa feiee tsona

sa li ebōla makhapetla,

sa a ebōla, sa a lahlela hōle,

makala a tsona a sala a soeufetse.

₈Bokollang sa ngoetsana

e apere tse mahoashe,

e bokollela mohats'a eona

oa matsoathaka.

₉Nyehelo ea lijo le ea lino

e felisitsoe ka Tempeleng,

ka Tempeleng ea Morena.

Baprista ba aparetsoe ke bofifi,

bona baprista

ba sebeletsang Morena.

₁₀Masimo a lobetsoe, a senyehile,

naha e omeletse, e s'e le sekaka,

mabele a lobetsoe, a senyehile,

veine e ncha ha e sa riteloa,

ole le eona ha e sa fumanoa.

₁₁Lōna balemi, nyahamang lipelo!

Lōna ba lemang morara, bokollang!

Bokollelang koro,

le bokollele harese,

hoba kotulo e senyehetse masimong.

₁₂Fate tsa morara li se li omeletse,

fate tsa feiee tsona li ponne,

fate tsa kharenate,

tsa palema le tsa liapole:

Lifate tsohle tsa naha li omeletse.

Ruri batho ba feletsoe ke monyaka.

₁₃Lōna baprista,

aparang tse mahoashe, le lle!

Lōna basebeletsi ba aletare,

bokollang!

Tloong, le lale le apere,

le apere tse mahoashe,

lōna basebeletsi ba Molimo oa ka,

hoba nyehelo ea lijo le ea lino

e felisitsoe ka Tempeleng,

ka Tempeleng ea Molimo oa lōna.

₁₄Khethang letsatsi la ho itima lijo,

le meme phutheho e halalelang.

Phuthang maqheku

le baahi bohle ba naha,

ba phuthehele

ka Tempeleng ea Morena,

ea Morena Molimo oa rōna:

Bohle ba meketse,

ba ipiletse ho Morena.

₁₅A letsatsi le tšabehang!

Tsatsi la Morena le se le le haufi!

Le tla tla e le tsatsi la timetso,

e tsoang ho Ea Matla 'ohle.

₁₆Na lijo ha lia senyeha

re ntse re li shebile?

Ka Tempeleng ea rōna

thabo le monyaka li kae?

₁₇Peō e bolelletse katlas'a makoètè,

meliko e senyehile, lisiu li tabohile,

hobane mabele le 'ona a phutsitse.

₁₈Liphoofolo li lumaela habohlōkō!

Mehlape ea likhomo ea liila,

e hloka makhulo;

mehlape ea likhutšoane

le eona ea tšèrèma.

₁₉Oho, Morena,

ke ipiletsa ho uena,

hobane hlaha e chesitse

makhulo a lehoatata,

fate tsohle le tsona

tsa chella har'a lithota.

₂₀Libatana tsa naha lia u bokollela,

hobane metsi a linōka

a pshele pshi!

Hlaha e chesitse

le makhulo a lehoatata.