JOBO 36

₂“Bea butle ho se hokae,

nke ke u bontše:

Polelo tse emelang Molimo

li sa le teng.

₃Tsebo ke tla e fuputsa

hōle le hohle,

ha ke buella ho loka

ha 'Mōpi oa ka.

₄Polelo tsa ka hase tsa bosaoana;

ea buang le uena

ke monna oa mohlalefi.

₅“Molimo o matla,

empa ha a nyelise batho;

ha ho letho leo a sa le tsebeng.

₆A ke ke a tlohela

moetsalibe a phela,

empa mafutsana

o a sebeletsa ka toka.

₇Ba lokileng ha a khaotse

ho ba hlokomela,

o ba bea le likhosi

holim'a literone;

o ba bea teng,

a ba phahamise kamehla eohle.

₈Empa ha ba tlamiloe

ka mahlaahlela,

ba bofiloe

ka khoele tsa tlokotsi,

₉o ba supisa mesebetsi ea bona,

libe tse entsoeng ka boikhantšo.

₁₀O etsa hore

ba mamele khalemelo ea hae,

a ba laele hore

ba furalle bokhopo.

₁₁Ha ba mo mamela, ba mo sebeletsa,

ba tla qeta matsatsi a bona

ka boiketlo,

lemo tsa bona

ba li qete ba atlehile.

₁₂Empa ha ba ithiba litsèbè,

ba sa mamele,

lefu la bona e tla ba la sabole,

ba be ba shoe tsebo ba se na eona.

₁₃“Baetsalibe ba tletse khalefo

lipelong tsa bona,

leha ba se ba tlamiloe

ha ba ke ba kōpa thuso.

₁₄Ba shoa ba sa le bacha,

ba shoe ba phela le bo-ramaotoana.

₁₅Ba litlokotsing

o ba pholosa ka litlokotsi,

a thibolle tsèbè tsa bona

ka matšoenyeho.

₁₆“Le uena

a ka b'a u ntšitse litsietsing,

a u isitse bakeng

se sa patisanang,

moo tafole ea hao

e tla tlala mapetle!

₁₇Kahlōlo ea ba khopo

e u oetse holimo,

kahlōlo le toka li se li u maname.

₁₈Hlokomela, esere maruo a u hohela,

u se k'a lumela

ha tjotjo e u khelosa.

₁₉Ha u llela thuso,

maruo a hao a ke ke

a u tsoela molemo,

kapa matla a hao

a u ntša tsietsing tsa hao.

₂₀Se labalabele

bosiu ba kahlōlo ho fihla,

ha chaba li timela

libakeng tsa tsona.

₂₁Hlokomela,

u se sekamele bokhopong,

boo u bo ratang ho feta tlokotsi.

₂₂“Molimo o phahametse bohle

ka matla a hae;

moruti ke ofe

ea tšoanang le eena?

₂₃Tsela ea hae

o e khethetsoe ke mang?

Ke ofe ea ka reng ho eena:

‘Mona joale u fositse?’

₂₄Hopola ho tlotlisa

mesebetsi ea hae,

mesebetsi eo batho

ba e rokang ka lifela.

₂₅Batho bohle ba bone mesebetsi eo,

ba e boha ba le hōle le eona.

₂₆Molimo o moholo

ho feta kutloisiso ea rōna,

palo ea lemo tsa hae

ha re ke ke ra e fihlela.

₂₇“O monya marotholi a metsi,

ka mouoane oa 'ona

ebe o nesa pula.

₂₈Maru a pula

a tlhōtlela liphoro fatše,

mafafatsane e be litloèbèlèlè,

e be litloèbèlèlè ho batho.

₂₉Ea tsebang ho thiba ha maru

ke mang,

le ho thoathoaretsa

ha leholimo la hae?

₃₀Halima la hae

le takolotsa le leholimo,

botebo ba leoatle

oa bo khuruma.

₃₁Ke ka tsona a ahlōlang lichaba,

ke ka tsona a li fang nala.

₃₂O tšoere lehalima

ka matsoho a hae,

o laela hore le otle botsekeng.

₃₃Letōlō ke selelekela

sa sefefo sa hae,

ho tla ha sona

le liphoofolo lia ho tseba.”