JOBO 19

₂“Ebe le tla ntlhōkōfatsa

halelele hakae,

le ntšithabetse ka lipolelo

ho fihlela neng?

₃Ke ka makhetlo-khetlo

le 'nyahanya,

le sa hlajoe ke lihlong ho 'nyefōla;

₄haeba ke 'nete, ke entse phoso,

phoso eō ke ea ka,

ha e le ame ka letho.

₅Haeba le iphahamisetsa

kaholimo ho 'na, le nqosa

ka baka la tlokotsi ena ea ka;

₆joale tsebang: Molimo ke eena

ea nkentseng hampe,

o ntanteletse ka letlōoa la hae.

₇Ha ke hōoa, ke re: ‘Bosōrō!’

ha ke arabeloe!

Ke hōoa haholo,

empa toka ha e eo!

₈“O tinkelitse tsela, ke sitoa ho feta;

tselana tsa ka li aparetsoe ke lefifi.

₉O nkamohile boitlhompho ba ka,

o nthōlisitse le mofapahlooho,

₁₀o ntlepola kahohle,

'me kea ikela,

tšepo ea ka

o e fōthōtse seka sefate.

₁₁Ke tlōkōmeloa ke khalefo ea hae,

eena o ntalima ke le sera sa hae;

₁₂ke futuhetsoe ke mabōtho a hae,

a hlomme liahelo

ho pota-pota lapa la ka.

₁₃“Molimo o entse hore bana beso

ba nkoekoetle,

metsoalle le eona

e mphuralle ho qeta.

₁₄Bahaeso le bona ba se ba ntahlile,

balekane ba ka ba se ba ntebetse.

₁₅Ho baeti le makhabunyane

a lapa la ka,

ke talingoa ke le moeti,

ke le molata.

₁₆Ha ke bitsa mohlanka oa ka

ha a arabele,

esita leha ke ipiletsa ho eena.

₁₇Mohats'a ka

o nkheloa ke moea oa ka,

bana beso le bona baa 'nyonya;

₁₈liratha le tsona lia 'nyelisa,

ha ke hlaha eba lia ntlaka.

₁₉Ba ntšanang se inong le 'na

baa 'nyonya,

ke furaletsoe

le ke baratuoa ba ka.

₂₀Ke moote, ke manne,

u ka mpala likhōpo,

ke phonyohile feela

ka la mohasoa lesoba.

₂₁“Nkhauheleng! Nkhauheleng!

lōna metsoalle ea ka!

Ke otliloe ke Molimo

ka tsoho la hae!

₂₂Le ntlhorisetsa'ng

joalokaha Molimo a ntlhorisa?

Ha le khotsofale

ha ke hlephōleha linama?

₂₃“Polelo tsena tsa ka

eka li ka be li ngoloa,

eka li ka be li ngoloa,

li etsoa buka,

₂₄li ngoloa ka pene ea tšepe

tlapeng la loto,

li ngoloa lefikeng,

li hlole kamehla eohle!

₂₅“Kea tseba:

Mopholosi oa ka oa phela,

qetellong o tla ema a mpakele.

₂₆Leha tlalo la ka

le tla be se le bolile,

ka mahlo Molimo ke tla 'mona

ke se 'meleng ona;

₂₇ke eena eo

ke tla fela ke 'mone ka seqō,

ke 'mone ka mahlo a ka

ke sa rōmeletsa.

Ka pelo ea ka eohle

ke labalabela hoo!

₂₈“Haeba le ka re:

‘Re sa tla mo hlorisa,

hobane sesosa sa taba

se ka pelong ea hae!’

₂₉Lōna, ka bolōna,

le hle le tšabe sabole,

hoba sebe sa khalefo,

kotlo ea sona ke sabole,

le tle le tsebe

hore efela kahlōlo e teng.”