JOHANNE 7

₁Kamorao ho tsena Jesu a tsamaea Galelea; o ne a sa rate ho tsamaea Judea, hobane Bajuda ba ne ba batla ho 'molaea. ₂Mokete oa Bajuda oa Maphephe o ne o le haufi. ₃Eaba bana babo ba re ho eena: “Tloha mona, u ee Judea, hore le barutuoa ba hao ba bone mesebetsi eo u e etsang, ₄hobane ha ho ea etsang letho sephiring, ha a batla ho ba pepeneneng. Ha u etsa tsena, iponahatse ho lefatše.” ₅Esitana le bana babo ba ne ba sa lumele ho eena.

₆Jesu a re ho bona: “Nako ea ka ha e e-s'o fihle, athe nako ea lōna ke eona kamehla. ₇Lefatše le ke ke la le hloea, empa 'na le ntlhoile, kahobane 'na ke paka hore mesebetsi ea lona e mebe. ₈Lōna, e-eang moketeng; 'na ha ke ee moketeng ona, hobane nako ea ka ha e e-s'o fihle.” ₉Hoba a ba bolelle tsena, a sala Galelea.

₁₀Empa ha bana babo ba se ba ile moketeng, le eena a ea ka lenyele, e seng ka ho tōtōbala, empa sephiring. ₁₁Joale Bajuda ba 'matla moketeng, ba re: “O kae?”

₁₂Ho ne ho e-na le ho luma-luma ho hongata ka eena letšoeleng; ba bang ba ne ba re: “O lōkile.”

Ba bang ba re: “Che, o khelosa letšoele.” ₁₃Leha ho le joalo ho ne ho se ea buang ka eena pepeneneng ka baka la ho tšaba Bajuda.

₁₄Ha e se e le mahareng a mokete, Jesu a ea ka Tempeleng, a ruta. ₁₅Bajuda ba makala, ba re: “O tseba tsa thuto joang, a sa ithuta?”

₁₆Jesu a ba araba, a re: “Thuto ea ka hase ea ka, empa ke ea ea nthōmileng; ₁₇ha motho a rata ho etsa thato ea ea nthōmileng, o tla tseba hore na thuto eo e tsoa ho Molimo, kapa ke bua ka bonna. ₁₈Ea ipolelang o ipatlela tlōtla, athe ea batlang tlōtla ea ea mo rōmileng, eena ke oa 'nete, 'me ho se lōke ha ho eo ho eena. ₁₉Na Moshe ha aa ka a le nea Molao? Empa ha ho le ea mong ea phethang Molao oo. Ke ka baka la'ng ha le batla ho mpolaea?”

₂₀Letšoele la araba, la re: “U na le modemona; ke mang ea batlang ho u bolaea?”

₂₁Jesu a ba araba, a re: “Ke entse ketso e le 'ngoe, 'me le maketse bohle. ₂₂Moshe o le neile lebōllo, e seng hore le tsoa ho Moshe, empa le tsoa ho baholo-holo, 'me le bōlōtsa motho ka Sabatha. ₂₃Ha motho a bōlōtsoa ka Sabatha hore Molao oa Moshe o se ke oa felisoa, ke'ng ha le nkhalefela kahobane ke folisitse motho kahohle-hohle ka Sabatha? ₂₄Se ahlōleng ho ea ka tšobotsi, empa ahlōlang ka kahlōlo e lōkileng.”

₂₅Ba bang ba Jerusalema ba re: “Na hase eena eo ba batlang ho 'molaea? ₂₆Empa bonang, o bua pepenene, 'me ha ba re letho ho eena. Na ekaba babusi ba tsebile kannete hore ke eena Kreste? ₂₇Empa re tseba moo motho enoa a tsoang teng; ha Kreste a e-tla, ha ho ea tla tseba moo a tsoang teng.”

₂₈Joale Jesu a phahamisa lentsoe, a ruta ka Tempeleng, a re: “Lea ntseba, le tseba le moo ke tsoang teng; ha kea tla ka bonna, empa ea nthōmileng ke oa 'nete, eo le sa mo tsebeng. ₂₉'Na kea mo tseba, hobane ke tsoa ho eena, 'me ke eena ea nthōmileng.”

₃₀Joale ba batla ho mo tšoara, empa ha ho ea ileng a mo a isa letsoho, hobane nako ea hae e ne e e-s'o fihle. ₃₁Empa ba bangata letšoeleng ba ile ba lumela ho eena, ba re: “Ha Kreste a e-tla, na o tla etsa mehlolo e mengata ho feta e entsoeng ke eo?”

₃₂Bafarisi ba utloa letšoele le luma-luma tse joalo ka Jesu, 'me baprista ba baholo le Bafarisi ba rōma bahlanka ho mo tšoara. ₃₃Eaba Jesu o re: “Ke sa tla ba le lōna nakoana, ebe ke ea ho ea nthōmileng. ₃₄Le tla mpatla, 'me ha le na ho mphumana; le moo ke leng teng, le ke ke la tla.”

₃₅Bajuda ba botsana, ba re: “O se a tla ea kae hore re se ke ra mo fumana? E seng o se a tla ea ho ba qhalaneng har'a Bagerike le ho ruta Bagerike? ₃₆Ke polelo 'ngoe eo a e boletseng, ha a re: ‘Le tla mpatla, 'me ha le na ho mphumana; le moo ke leng teng, le ke ke la tla?’ ”

₃₇Ka letsatsi la ho qetela, e leng le leholo la mokete, Jesu a ema, a hōoa, a re: “Ha motho a nyoriloe, a tle ho 'na, a noe. ₃₈Ea lumelang ho 'na, joalokaha Mangolo a boletse, linōka tsa metsi a kollang li tla phalla li e-tsoa ka ho eena.” ₃₉A bolela hona a lekanya Moea oo ba lumetseng ho eena ba neng ba se ba tla o amohela; kaha Moea o ne o e-s'o be teng, hobane Jesu a ne a e-s'o tlotlisoe.

₄₀Joale ha ba bang letšoeleng ba utloa lipolelo tsena, ba re: “Kannete ke eena Moporofeta!”

₄₁Ba bang ba re: “Ke eena Kreste!”

Empa ba bang ba re: “Na Kreste a ka tsoa Galelea? ₄₂Na Mangolo ha a bolele hore Kreste o tla tsoa lelōkong la Davida, motsaneng oa Betlelehema, moo Davida a neng a ahile teng?” ₄₃Eaba letšoele le fapana ka maikutlo ka baka la hae; ₄₄ba bang ho bona ba ne ba lakatsa ho mo tšoara, empa ha ho ea ileng a mo isa letsoho.

₄₅Joale bahlanka ba ea ho baprista ba baholo le ho Bafarisi, 'me bao ba re ho bona: “Ke ka baka la'ng le sa mo tlisang?”

₄₆Bahlanka ba araba, ba re: “Ha ho motho ea kileng a bua joaloka motho enoa.”

₄₇Bafarisi ba ba botsa, ba re: “Na le lōna le khelositsoe? ₄₈Na o teng ho babusi kapa ho Bafarisi ea lumetseng ho eena? ₄₉Empa mahōōhōō ana a sa tsebeng Molao a rōhakehile.”

₅₀Nikodema, e mong oa bona, ea neng a tle ho eena pele ho moo, a re ho bona. ₅₁“Na Molao oa rōna o ahlōla motho a e-s'o ikarabelle, le ho tseba seo a se entseng?”

₅₂Ba mo araba, ba re: “Na le uena u tsoa Galelea? Fuputsa, 'me u tla bona hore ha ho moporofeta ea tsoang Galelea.”

₅₃Joale e mong le e mong a ea tlung ea hae.