Lefu la Lasaro
1Joale ho ne ho e-na le monna ea kulang, Lasaro oa Bethania, motseng oa habo Maria le ngoan'abo, Maretha. 2E ne e le Maria ea neng a tlotse Morena ka setlolo, 'me a hlakola maoto a hae ka moriri oa hae, eo khaitseli ea hae, Lasaro, a neng a kula. 3Joale bo-khaitselie ba rōmela ho Jesu, ba re: “Morena, tseba, eo u mo ratang oa kula.”
4Eare ha Jesu a utloa, a re: “Ho kula hona ha ho ise lefung, empa ho isa tlotlisong ea Molimo, hore Mora oa Molimo a tlotlisoe ka hona.” 5Jesu o ne a rata Maretha, le Maria, ngoan'abo, le Lasaro. 6Ha a utloa hore oa kula, a hlola matsatsi a mabeli sebakeng seo a neng a le ho sona.
7Kamorao ho moo, a re ho barutuoa ba hae: “A re eeng Judea hape.”
8Barutuoa ba re ho eena: “Rabbi, Bajuda ba sa tsoa batla ba u tlepetsa ka majoe; na u sa ea teng hape?”
9Jesu a araba, a re: “Na hora tsa letsatsi ha li leshome le metso e 'meli na? Ha motho a tsamaea motšeare, ha a khoptjoe, kahobane o bona leseli la lefatše lena, 10empa ha motho a tsamaea bosiu oa khoptjoa, kahobane o hloka leseli.”
11A bolela litaba tsena, 'me kamorao ho moo a re ho bona: “Lasaro, motsoalle oa rōna, o robetse, empa kea ea, hore ke tle ke mo tsose.”
12Eaba barutuoa ba re ho eena: “Morena, ha a robetse, o tla fola.” 13Jesu o ne a bua ka ho shoa ha Lasaro, empa bona ba hopola hore o bua ka boroko ba mehla.
14Ea e-ba moo Jesu a ba bolellang phatlalatsa, a re: “Lasaro o shoele, 15'me ka baka la lōna ke thabela hore ebe ke ne ke le sieo, le tle le lumele, empa a re eeng ho eena.”
16Joale Thomase, ea bitsoang Lefahla, a re ho barutuoa ba bang: “Le rōna a re eeng, re tle re shoe le eena.”
Jesu ke tsōho le bophelo
17Ha Jesu a fihla, a fumana Lasaro a se a qetile matsatsi a mane lebitleng. 18Bethania e ne e le haufi le Jerusalema, sebaka se ka bang likilomethara tse tharo. 19Bajuda ba bangata ba ne ba tlile ho Maretha le Maria, ho ba tšelisa ka khaitseli ea bona. 20Eare ha Maretha a utloa hore Jesu oa tla, a ea mo khahlanyetsa, empa Maria a sala a lutse ka tlung.
21Joale Maretha a re ho Jesu: “Morena, hoja ua ba teng mona, khaitseli ea ka e ka be e sa shoa. 22Empa le joale kea tseba hore tsohle tseo u li kōpang ho Molimo, Molimo o tla u nea tsona.”
23Jesu a re ho eena: “Khaitseli ea hao e tla tsoha.”
24Maretha a re ho eena: “Kea tseba hore e tla tsoha mohl'a tsōho ea bafu, ka letsatsi la bofelo.”
25Jesu a re ho eena: “Ke 'na tsōho le bophelo; ea lumelang ho 'na leha a ka shoa o tla phela. 26Mang le mang ea phelang, 'me a lumela ho 'na, ha a ka ke a shoa le ka mohla o le mong; na u lumela hona na?”
27A re ho eena: “E, Morena; kea lumela hore u Kreste, Mora oa Molimo, ea tlang lefatšeng.”
Jesu oa lla
28Hoba a rialo, a ea bitsa ngoan'abo Maria ka lekunutu, a re: “Moruti o teng, 'me oa u bitsa.” 29Eare eo ha a utloa, a ema kapele, a tla ho eena. 30Jesu o ne a e-s'o kene motseng, empa o ne a sa le moo Maretha a mo khahlanyelitseng teng. 31Ha Bajuda ba neng ba e-na le eena ka tlung, ba mo tšelisa, ba bona hore Maria o ema kapele, oa tsoa, ba mo latela, ba hopola hore o ea lebitleng ho ea llela teng.
32Ha Maria a fihla moo Jesu a leng teng, 'me a 'mona, a itihela maotong a hae, a re ho eena: “Morena, hoja ua ba teng mona, khaitseli ea ka e ka be e sa shoa.”
33Jesu ha a bona Maria a ntse a lla, le Bajuda ba tlileng le eena ba ntse ba lla, a hlabeha moeeng, a ferekana, 34a re: “Le 'meile kae?”
Ba re ho eena: “Morena, tloo, u bone.”
35Jesu a keleketla likeleli.
36Eaba Bajuda ba re: “Bonang kamoo a neng a mo rata kateng!”
37Ba bang ba bona ba re: “Na eo ea tutubolotseng mahlo a sefofu, a ka be a sa etsa hore le motho eo a se ke a shoa?”
Tsōso ea Lasaro
38Joale Jesu a boela a hlabeha pelong, a ea lebitleng. E ne e le lehaha, 'me le ne le koetsoe ka letlapa. 39Jesu a re: “Tlosang letlapa.”
Maretha, khaitseli ea ea shoeleng, a re ho eena: “Morena, o se a nkha, hobane e se e le letsatsi la bone a shoele.”
40Jesu a re ho eena: “Na ha kea u bolella hore, ha u lumela, u tla bona tlōtla ea Molimo?”
41Eaba ba tlosa letlapa, 'me Jesu a lelaletsa mahlo holimo, a re: “Ntate, kea u leboha ha u nkutloile. 42'Na kea tseba hore u nkutloa kamehla, empa ke buile ka baka la letšoele le nteetseng hare, hore le tle le lumele hore u nthōmile.”
43Hoba a rialo, a hōoa ka lentsoe le phahameng, a re: “Lasaro, tsoa!” 44Ea neng a shoele a tsoa a thatiloe maoto le matsoho ka masela a bafu, sefahleho sa hae se thatiloe ka lesela.
Jesu a re ho bona: “Mo tlamolleng, le mo lese a ikele.”
Morero oa ho bolaea Jesu
45Joale ba bangata ba Bajuda ba neng ba tlile ho Maria, 'me ba bona seo Jesu a se entseng, ba lumela ho eena, 46empa ba bang ba ea ho Bafarisi, ba ba bolella tseo Jesu a li entseng.
47Joale baprista ba baholo le Bafarisi ba bitsa lekhotla, ba re: “Re tla etsa'ng ha e le moo monna eo a etsa mehlolo e mengata? 48Ha re ka mo lesa joaana, bohle ba tla lumela ho eena, 'me Baroma ba tla tla, ba ripitle Tempele le sechaba sa rōna.”
49Empa e mong oa bona, Kaiafa, eo e neng e le Moprista e Moholo ka selemo seo, a re ho bona: “Ha le tsebe letho, 50leha e le ho utloisisa, hore ho molemo ho lōna hore motho a le mong a shoele sechaba, e seng hore sechaba sohle se timele.”
51Hona ha aa ka a ho bolela ka boeena, empa kaha e ne e le Moprista e Moholo ka selemo seo, o ne a ile a porofeta hore Jesu o se a tla shoela sechaba, 52e seng sechaba feela, empa le hore bana ba Molimo ba qhalakaneng a tle a ba bōkellele bonngoeng. 53Ho tloha ka letsatsi leo ba rera ho 'molaea.
54Ka baka leo, Jesu ha aa ka a hlola a tsamaea pontšeng har'a Bajuda, empa a tloha moo, a ea naheng e haufi le lefeella, motseng o bitsoang Efraime, 'me a hlola teng le barutuoa.
55Paseka ea Bajuda e ne e le haufi, 'me ba bangata ba tsoang ka mathōko ba nyolohela Jerusalema, e e-s'o be Paseka, hore ba tle ba itlhoekise. 56Joale ba batla Jesu, ba botsana ba eme ka Tempeleng, ba re: “Le hopola joang? Ebe a ke ke a tla moketeng na?” 57Baprista ba baholo le Bafarisi ba ne ba laetse hore ha e mong a ka tseba moo a leng teng, a bolele, ba tle ba mo tšoare.
