Nkho e pshatlehileng
1Morena o bua tjena: “Tsamaea, u e'o reka nkho ea letsopa. U tsamaee le ba bang ba baholo ba sechaba, le ba bang ba baprista ba seng ba hōlile. 2U theohele ka Khohlong ea Mora oa Hinome, e pel'a Monyako oa Mangetana. Ha u fihla teng u phatlalatse mantsoe ana, ao ke tla u bolella 'ona, 3u re: ‘Lōna likhosi tsa Juda le baahi ba Jerusalema, utloang lentsoe la Morena. Morena oa mabōtho, Molimo oa Iseraele, o bua tjena: Mamelang! Sebaka sena ke tla se lihela koluoa e tla etsa hore litsèbè tsa mang kapa mang ea e utloang li hlohlone. 4Ke hobane ba mphuraletse, ba silafalitse sebaka sena, ba chesetsa mokubetso ho sona, ba o chesetsa melimo esele, eo bona le bo-ntat'a bona, kapa likhosi tsa Juda, ba sa kang ba e tseba, 'me sebaka sena ba se tlatsa mali a se nang molato. 5Ba hahetse Baale libaka tsa borapeli, hore ba chesetse bara ba bona ho tsona, ba etsetse Baale nyehelo ea secheso, e leng ntho eo ke sa kang ka ba laela eona, kapa ka e bua, kapa ka e nahana. 6Ka baka leo, hlokomelang, matsatsi aa tla, ho rialo Morena, ao ka 'ona batho ba ke keng ba hlola ba bitsa sebaka sena Tofete kapa Khohlo ea Mora oa Hinome, empa ba tla se bitsa Khohlo ea Polaelo.
7“ ‘Sebakeng sena ke tla nyōpisa merero ea Juda le ea Jerusalema. Ke tla etsa hore ba bolaoe ka sabole ke lira tsa bona, ba bolaoe ke matsoho a ba batlang ho ba bolaea. Litōpō tsa bona e tla ba lijo tsa matlaka, le lijo tsa libatana tsa naha. 8Metse eana ke tla e senya e be sebonoang-se-bonoa-ke-bohle; bo-mafeta-ka-tsela ba tla makala, ba thukuthe lihlooho ka baka la koluoa eo. 9Ke tla etsa hore ba je nama ea bara le barali ba bona, motho ka mong a je nama ea setōpō sa motsoalle oa hae nakong ena ea tsietsi, eo ka eona lira tsa bona, tse batlang ho ba bolaea, li tla be li ba etselitse thibella.’
10“Joale u tl'u pshatle nkho ena moo banna ba tsamaeang le uena ba ntseng ba bona, 11'me u re ho bona: ‘Morena oa mabōtho o bua tjena: Ke tla pshatlaka sechaba sena le motse ona joalokaha motho a pshatlaka nkho hoo e ke keng ea hlola e lokisoa. Ba tla epela bafu ba bona Tofete hobane ho tla be ho se na sebaka se seng seo ba ka ba epelang ho sona. 12Sena ke tla se etsa sebakeng sena le ho baahi ba sona, ho rialo Morena. Motse ona ke tla o etsa hore o be joaloka Tofete. 13Matlo a Jerusalema le matlo a likhosi tsa Juda a tla silafatsoa joaloka sebaka sa Tofete, ka baka la matlo 'ohle ao ba ileng ba hloella holim'a 'ona, ba chesetsa mokubetso holim'a marulelo a 'ona, ba o chesetsa linaleli, 'me ba qhatsetsa melimo esele nyehelo ea lino.’ ”
14Eaba Jeremia o khutla Tofete, moo Morena a neng a mo rōmetse teng ho ea porofeta. A fihla a ema lebaleng la Tempele ea Morena, a re ho sechaba sohle: 15“Morena oa mabōtho, Molimo oa Iseraele, o bua tjena: ‘Mamelang! Motse ona le metsana eohle e o pota-potileng ke tla e lihela koluoa tseo ke li boletseng, hobane sechaba sena se ile sa satalatsa melala ea sona, sa hana ho mamela lipolelo tsa ka.’ ”
