Pelaelo ea Jeremia
1Uena Morena, u lokile kamehla,
ha ke bea nyeoe ea ka
kapele ho uena, u lokile,
empa a nke ke bue le uena
ka toka ea hao:
Ke hobane'ng ha ba khopo
ba atleha mererong ea bona?
Ke hobane'ng ha ba bolotsana
ba phela ka boiketlo?
2U ba hlomile,
metso ea bona e tebile;
baa mela, ba beha litholoana.
Ba bua ka uena ka molomo feela,
empa pelo tsa bona tsona
li hōle le uena!
3Uena Morena, u ntseba hantle,
ua mpona,
u lekola menahano ea ka
mabapa le uena.
Ba hule sa nku e isoa tlhabong!
Uena u ba beele kathōko,
bakeng sa tsatsi la tlhabo
ba beele kathōko.
4Naha ee e tla lula e omeletse,
e lule e omeletse ho fihlela neng,
limela li pone ho fihlela neng?
Kahobane ba phelang naheng ena
ba khopo,
liphoofolo le linonyana li shoele.
Ho feta mona, batho ba re:
“Ha a na ho bona
seo re se etsang.”
Molimo o arabela Jeremia
5“Ha u il'a khathala
u ipeisa le batho,
joale lipere
u tla ipeisa joang le tsona?
Haeba o ka khoptjoa
naheng e bataletseng,
mahoholing a Jorodane
u ka tsamaea joang?
6Bang ka uena esita le bana beno,
bana le bona ba u ekile,
ba kene har'a letšoele
ho u loantša,
u se k'a ba tšepa,
leha ba u buisa hantle.”
Morena o soabisoa ke chaba sa hae
7“Ke furaletse ntlo ea ka,
ka siea lefa la ka,
moratuoa ka neelana ka eena,
matsohong o lira tsa hae.
8Lefa la ka le tšoana le tau ea moru;
ea nthorela, kahoo ke e hloile.
9Lefa la ka le tšoana le nonyana,
nonyana e khoarahlana,
e ubelloang
ke nonyana tse ling kamahohle.
Tsamaeang le e'o phutha
batana tsohle tsa naha,
le li phuthe li tle moketeng.
10Balisa ba bangata
ba sentse tšimo ea ka,
ba hataketse morara oa eona,
ba o hatakela ka maoto,
tšimo ea ka e ntle
ba e fetola lehoatata.
11Ba e fetotse lehoatata le omeletseng,
le nkotlang pelo ha ke le bona.
Naha eohle e fetohile lehoatata,
hobane ha ho le ea mong
ea e tsotellang.
12Maralla 'ohle a lehoatateng
a nyeunya basenyi,
hobane sabole ea Morena
e tla timetsa tsohle,
e timetse
lipheletso tsohle tsa lefatše,
ha ho le ea mong
ea tla phela ka khotso.
13Ba jetse koro,
ba kotula hlabahlabane,
ba sebetsa ka thata,
ba sebeletse lelea,
kotulo ea bona
e ba hlabisitse lihlong,
ka baka la khalefo ea Morena,
khalefo e tlōkōmang.”
14Ho bohle ba khopo, bao re ahisaneng le bona, ba hapang naha eo ke e neileng sechaba sa ka sa Iseraele, Morena o bua tjena: “Ke tla ba tlosa linaheng tsa bona, ba ntlo ea Juda ke ba ntše kahar'a bona. 15Ha ke se ke ba tlositse ke tla boela ke ba hauhela, 'me sechaba ka seng ke se khutlisetse naheng ea sona. 16Haeba ba ithuta mekhoa ea sechaba sa ka hantle, 'me ba hlapanya ka lebitso la ka, joalokaha ba ile ba ruta sechaba sa ka ho hlapanya ka Baale, ba re: ‘Ka Morena ea phelang,’ ba tla tsitsa har'a sechaba sa ka. 17Empa haeba sechaba sefe kapa sefe se sa mamele, ke tla se felisa ho hang, ke se timetse,” ho rialo Morena.
