Puo ea Holofernese
1Ha lerata la ba khobokaneng ho pota lekhotla la hae le kokobela, Holofernese, molaoli e moholo oa lebotho la Baasiria, a bua le Akiore ka pele ho letšoele lohle la balichaba le la Bamoabe, a re:
2“Akiore, u inka u le eng, uena le bahiruoa ba Efraime, ha kajeno u iketsa moporofeta har'a rona, 'me u re bolella hore re se ke ra hlasela sechaba sa Iseraele, hobane Molimo oa sona o tla se sireletsa? Hona molimo ke mang haese Nebukadenesare? Eena o tla bontša matla a hae, 'me a ba hlakole lefatšeng; Molimo oa bona a ke ke a ba pholosa. 3Empa rona, bahlanka ba hae, re tla ba bolaea ka bobebe bo kang hoja ho bolaoa motho a le mong. Ha ba ka ke ba ema ka pele ho sefutho sa bapalami ba rona; 4ba tla ba fiela kaofela. Lithaba tsa habo bona li tla thophotheloa ke mali a bona, 'me mahoatata a bona a tlala-tlale litopo tsa bona. Ho e-na le hore ba re thibele ka ntoa, bohle ba tla shoa, ho rialo khosi Nebukadenesare, morena oa lefatše lohle. Eena o buile, 'me mantsoe a hae a ke ke a fella feela. 5Ha e le uena Akiore, uena mohiruoa oa Baamone, uena ea buileng mantsoe ana a boeki, u ke ke ua bona sefahleho sa ka hape, ho fihlela letsatsi leo ke tla be ke iphetelitse ka lona holim'a lesika lena la batho ba balehileng Egepeta. 6Ke moo lisabole tsa bahlabani ba ka le marumo a bahlanka ba ka li tla u phohlotsa likhopo, u oele har'a mahlatsipa ha ke khutla.
7“Joale bahlanka ba ka ba tla u siea thabeng, ba u siee haufi le o mong oa metse e likhorong tsa lithaba. 8U ke ke be ua shoa, ho fihlela u timela joaloka bona. 9Se be le sefahleho se sosobaneng, haeba u sa na le tšepo ea hore metse eo ha e ka ke ea haptjoa! Ke buile, 'me ha ho le le leng la mantsoe a ka le tla oela fatše.”
Akiore o tlisoa Bethulia
10Holofernese a laela bahlanka ba mo sebeletsang tenteng ho tšoara Akiore, ho mo isa Bethulia le ho neelana ka eena ho Baiseraele. 11Bahlanka ba mo nka, ba mo ntšetsa ka ntle ho liahelo, 'me ba haola phula; eaba joale ba leba lihlabeng, ba ba ba fihla lilibeng tse tlas'a Bethulia. 12Hang feela ha banna ba motse oo ba ba bona, ba nka lihlomo tsa bona, ba tsoa motseng 'me ba hloella tlhorong ea thaba, ha ba matjeketjane bona ba tšela Baasiria ka lethala la majoe ho ba thibela ho nyolohela kaholimo. 13Leha ho le joalo, ba khukhunela mosikong oa thaba, moo ba ileng ba tlama Akiore teng, ba mo siea a rapaletse tlas'a thaba, ba boela ho morena oa bona.
14Ha Baiseraele ba theoha motseng oa bona, ba ema pel'a hae, ba mo tlamolla 'me ba mo isa Bethulia, moo ba ileng ba mo hlahisa ho beng ba motse. 15Bao, mehleng eo, e ne e le Usiea, mora oa Mika, oa leloko la Simeone, Kaberise, mora oa Gothoniele, le Karemise, mora oa Melkiele. 16Ba phutha baholo bohle ba motse. Bahlankana bohle le basali bohle le bona ba potlakela phuthehong. Akiore a emisoa har'a batho bao bohle, eaba Usiea o 'motsa ka tse etsahetseng. 17A araba ka ho ba bolella se ileng sa buuoa ka lekhotleng la Holofernese; le seo eena ka sebele a ileng a se bua ka pele ho baetapele ba Baasiria; le kamoo Holofernese a neng a ikakasa kateng ka seo a tla se etsa ho bana ba Israele. 18Joale bohle ba oela fatše ka mangole ba khumamela Molimo, 19ba hooa, ba re: “Morena, Molimo oa leholimo, ak'u talime boikhohomoso ba bona, 'me u hauhele moloko oa habo rona o kokobelitsoeng. Tsatsing lena, bontša mosa oa hao ho batho ba khethetsoeng uena.” 20Eaba ba tšelisa Akiore, 'me ba mo lebohela haholo. 21Hoba phutheho e qhalane, Usiea a mo isa lapeng ha hae, 'me a etsetsa baholo mokete oa lijo. Bosiu boo bohle ba ipiletsa ho Molimo oa Israele hore a ba thuse.
