JUDITHA 4

₁Baiseraele ba phelang Judea ba ne ba utloile kamoo Holofernese, molaoli ea ka sehloohong oa Nebukadenesare, khosi ea Baasiria, a neng a tšoere lichaba tse fapakaneng kateng, ka ho hapa matlotlo a litempele tsohle tsa bona le ka ho li ripitla. ₂Ba tšoha haholo ha a ntse a atamela, ba thothomella Jerusalema le Tempele ea Morena Molimo oa bona. ₃Ba ne ba sa tsoa khutla kholehong pejana; sechaba sohle sa Judea se ne se sa tsoa phuthoa haufinyane, 'me thepa e halalelang, le aletare le Tempele li ne li sa tsoa hloekisoa, hoba li silafatsoe. ₄Ka baka leo ba romela naheng eohle ea Samaria, le Kona, le Bete-Horone, le Belemaine, le Jeriko, le Koba, le Esora, le sekhutlong sa Saleme. ₅Ba bea bahlabani litlhorong tsa lithaba tse telele, ba sireletsa ka marako metse e neng e le holim'a tsona; ba bokella lijo tse neng li sa tsoa kotuloa, ho itokisetsa ntoa.

₆Joakime, moprista e moholo, ea neng a le Jerusalema mehleng eo, a ngolla baahi ba Bethulia le ba Betomesethaime, metse e 'meli e neng e shebane le Jesereele, haufi le phula ea Dotane. ₇A ba bolella hore ba thibe likhoro tsa lithaba, tseo ka tsona ho kenoang Judea; ho ne ho tla ba bonolo ho thibela bafetoheli, kaha ho ne ho patisane hoo batho ba neng ba ka feta ka bobeli feela. ₈Baiseraele ba phetha litaelo tsa Joakime, moprista e moholo, le tsa Lekhotla la baholo ba sechaba le neng le phuthehetse Jerusalema ka nako eo.

₉Batho bohle ba Iseraele ba hooa ho Molimo ka cheseho e kholo, 'me ba ikokobetsa haholo ka ho itima. ₁₀Banna, basali ba bona, le bana ba bona, le likhomo tsa bona, le balichaba ba ahisaneng le bona, le batholuoa kapa makhoba, ba itlama matheka ka tse mahoashe. ₁₁Baiseraele bohle ba neng ba ahile Jerusalema, ho nkella le basali le bana, ba ithapalatsa ka pele ho Tempele, ba itšetse lihlooho ka molora, ba phetla liaparo tsa bona tse mahoashe ka pele ho Morena. ₁₂Aletare le eona ba e apesa lesela le mahoashe; 'me ka cheseho, ba le ntsoe-leng, ba hooa ho Molimo oa Iseraele hore a se ke a lesella bana ba bona hore ba fenethoe, basali ba bona ba haptjoe, metse eo e leng lefa la bona e ripitloe, Tempele e silafatsoe le ho tlontlolloa, bahetene ba ikutloe monate ka hona. ₁₃Eaba Morena o utloa thapelo ea bona, 'me a ba hauhela mathateng a bona. Batho ba 'na ba tsoela pele ho itima ka matsatsi-tsatsi, Judea eohle le Jerusalema, ka pele ho Sehalalelo sa Morena ea matla 'ohle. ₁₄Joakime, moprista e moholo, le baprista bohle ba neng ba eme ka pele ho Morena, le basebeletsi bohle ba Morena, ba ne ba itlamme matheka ka tse mahoashe, ha ba ntse ba etsa nyehelo ea secheso se sa feleng, 'moho le linyehelo tsa likano le tsa boithapo tsa sechaba. ₁₅Ba roetse meqhaka e tlotseng molora ba hooa ka matla ho Morena, hore a phallele ntlo ea Iseraele.