Ntoa le lichaba tsa Bophirima
1Selemong sa leshome le metso e robeli, letsatsing la mashome a mabeli a metso e 'meli khoeling ea pele, tlung ea borena ea Nebukadenesare, khosi ea Baasiria, ho ile ha reroa ho iphetetsa lefatšeng lohle joalokaha khosi e ne e boletse. 2Hoba ho bitsoe batlatsi bohle le balaoli bohle ba eona, ba buisana ka lekunutu ka morero oa khosi, 'me eona ka sebele ea etsa qeto ea ho ripitla lefatše lohle. 3Ha laeloa hore mang kapa mang ea sa kang a arabela boipiletso ba khosi a bolaoe.
4Eitse ha lekhotla le qhalana, Nebukadenesare, khosi ea Baasiria, a bitsa Holofernese, molaoli e moholo oa mabotho a hae, ea ikarabellang ho eena feela. A mo laea, a re: 5“Khosi e Kholo, morena oa lefatše lohle, o bua joana: Tsamaea, u nke banna ba bohale ba tšepahalang, e leng bahlabani ba litaaso ba ka bang lekholo le mashome a mabeli a likete, le lebotho la bapalami ba lipitsi ba likete li leshome le metso e 'meli; 6ebe u ea futuhela linaha tse ka bophirimela, hobane batho bao ha baa ka ba mamela taelo ea ka. 7E ka khona ba ntokisetse mobu le metsi; hobane, khalefong ea ka, ke tla ba futuhela, maoto a bahlabani ba ka a tla koahela lefatše lohle la bona, 'me ke tla laela hore lintho tsohle tsa bona li haptjoe. 8Mahlatsipa a bona a tla tlala likhohlo, melatsoana eohle le linoka tsohle li tla tlala ho khaphatseha ke litopo; 9'me batšoaruoa ke tla ba isa lipheletsong tsa lefatše.
10“Joale e-ea! U qale ka ho nkhapela linaha tsohle tsa bona, ba ineele ho uena, 'me u mpolokele bona ho fihlela nako ea ho ba ahlola e fihla. 11Empa ba hanang ho ineela, u se ke ua qenehela le ea mong oa bona. Laela hore ba bolaoe, 'me ba hapeloe thepa naheng eo eohle e tla ba tlas'a hao. 12Ke hlapanya ka bophelo ba ka, le ka matla a ka a bokhosi, hore seo ke se buileng ke tla se phethisa. 13Uena he, u se lahle le e 'ngoe ea litaelo tsa morena oa hao; 'me u sebetse u ipapisitse ka thata le seo ke se laetseng, ka ntle ho tieho ea letho.”
Phutuho ea Holofernese
14Hoba Holofernese a tlohe pel'a morena oa hae, a ea phutha mahosana, balaoli le batsamaisi bohle ba mabotho a Baasiria. 15Joalokaha morena oa hae a laetse, a hloaea bahlabani ba khethehileng, e leng ba litaaso ba lekholo le mashome a mabeli a likete, le bapalami ba liqha ba likete tse leshome le metso e 'meli. 16A ba hlophisa ka mokhoa o tloaelehileng oa ntoa. 17Eaba o phutha palo e kholohali ea likamele, litonki le limoulo ho bofa lithoto; a phutha le linku, likhomo le lipoli, tse ke keng tsa baloa, bakeng sa mofao. 18Monna e mong le e mong a fuoa lijo tse ngata, le khauta le silefera e ngata e tsoang polokelong ea khosi.
19Joale a futuha, eena le lebotho lohle la hae, a eteletse pele khosi Nebukadenesare, ka sepheo sa ho aparela linaha tsohle tsa bophirimela ka makariki a hae, bahlabani ba hae ba bapalami le ba litaaso ba khethehileng. 20Matšoele-tšoele a batho a ne a ba setse morao, eka lesoiti la litsie kapa liqoba tsa lehlabathe, boieane bo neng bo ke ke ba baloa.
21Ba tloha Ninife, ba tsamaea matsatsi a mararo ho ea fihla lithoteng tsa Beketilethe. Ho tloha moo ba ea lara haufi le lithabeng tse namileng ka leboea ho Silesia e Kaholimo. 22Eaba Holofernese o kena lihlabeng le lebotho lohle la hae la ba litaaso, la bapalami le la makariki. 23A ripitla Pute le Lude, a hapa thepa ea bara bohle ba Rasise le ea bara bohle ba Ishmaele, ba neng ba phela meeling ea lehoatata, ka boroa ba Keleone.
24A itšetleha ka noka ea Euferatese, a haola Mesopotamia, a ripitla metse eohle e sirelelitsoeng, e mabopong a molatsoana oa Aberona, 'me a honyella leoatleng. 25Eaba o hapa libaka tsa Silesia, a rinya bohle ba neng ba mo loantša, a ba a futuhela lipheletsong tse ka boroa ho Jafetha, malebana le Arabia. 26A likaliketsa Bamidiane, a chesa litente tsa bona, a hapa linku tsa bona.
27A theohela phuleng ea Damaseka ha ho heloa likoro, 'me a chesa masimo 'ohle a baahi ba eona; a rinya mehlape ea manku le ea makhomo, a hapa thepa ea metse ea bona, a phumula naha eohle, 'me a bolaea bahlankana bohle ba bona ka sabole. 28Tšabo le thothomelo tsa aparela batho bohle ba ahileng lebopong la leoatle, baahi ba Sidone le Tire, ba Sure le Okina, le bohle ba Jamnia; 'me le baahi ba Ashedode le Ashekelone ba ne ba tšohile haholo.
