Thapelo ea Juditha
1Joale Juditha, a teetsoe hare ke Baiseraele bohle, a phokola sefela sena sa teboho, 'me sechaba kaofela sa se lumela ka mantsoe a phefa. 2Juditha a re:
“Hlabelang Molimo oa ka pina
ka meropa,
binelang Morena ka lisimbala,
qapang pesalema le sefela,
mo phahamiseng,
le bitse Lebitso la hae!
3Morena ke Molimo
ea qhalanyang lintoa,
o beile liahelo tsa hae
ka har'a sechaba sa hae,
hore a 'namolele
matsohong a ba ntoantšang.
4Asiria ea tsoa thabeng tsa leboea,
ea tla ka ba mashome a likete
ba lebotho la eona,
bongata ba bona ba koahela likhohlo,
lipere tsa bona tsa apesa maralla.
5Ba sokela ho chesa naha ea heso,
ho ripitla bahlankana ba heso
ka sabole,
ho pshatlanya masea a heso fatše,
ho hapa bana ba heso,
ho inkela baroetsana ba heso.
6“Empa Morena ea matla 'ohle
o ba thibetse ka letsoho la mosali.
7Mohale oa bona ha aa ka a bolaoa
ke bahlankana,
leha e le ho ranthanngoa ke bo-Titane,
kapa ho hlaseloa ke liqhobane
tse phahameng;
empa ke Juditha, morali oa Merari,
ea mo fokolisitseng ka botle
ba sefahleho sa hae.
8A hlobola liaparo tsa bohlolohali
ho lopolla ba hateletsoeng Iseraele;
a itlotsa sefahleho ka setlolo
se monko o monate,
a tlama moriri oa hae ka moqhaka,
a tena mose oa line ho mo hohela.
9Meqathatso ea hae ea khahla
mahlo a hae,
botle ba hae ba hapa moea oa hae,
'me sabole ea mo khaola molala.
10Baperesiea ba thothomela
ke sebete sa hae,
Bamede ba tšosoa ke bohale ba hae.
11Mafutsana a heso a etsa mokorotlo,
'me bona ba tšoha;
bafokoli ba heso ba hooa,
'me bona ba tšaba haholo;
ba phahamisa mantsoe a bona,
'me bona ba baleha.
12Bara ba basali ba eisehang
ba ba phohlotsa,
ba ba hlaba joaloka makhoba
a thobileng.
'me a shoela ntoeng ea Morena oa ka.
13“Ke tla binela Morena oa ka
sefela se secha:
Morena, u moholo, ua tlotleha,
matla a hao aa babatseha,
u ke ke ua hloloa.
14Libopuoa tsohle tsa hao
li ke li u sebeletse;
hobane u ile ua laela,
'me tsohle tsa e-ba teng,
ua romela moea oa hao,
'me tsa bopeha,
'me ha ho ea ka hanyetsang
lentsoe la hao.
15Lithaba li tla tsukutloa
metheong ea tsona,
li tsoakane le metsi;
mafika a tla qhibiliha
joaloka tšotso pel'a sefahleho sa hao;
empa ho ba u tšabang
u tla be sa le u le mohau.
16Mahlabelo 'ohle a monko o monate
ke ntho e nyenyane feela;
mafura 'ohle a mahlabelo a secheso
ho uena ke nthoana e fokolang;
empa ea tšabang Morena
o tla ba moholo kamehla.
17Ho malimabe balichaba
ba tsohelang sechaba sa heso matla,
Morena ea matla 'ohle o tla ba otla
ka letsatsi la kahlolo;
o tla romela mollo le liboko
nameng ea bona,
'me ba tla bokolla ke bohloko
ka ho sa eeng kae.”
Botumo ba Juditha
18Eitse ha ba fihla Jerusalema, ba khumamela Molimo; 'me ha sechaba se se se hloekisitsoe, sa nyehela ka mahlabelo a secheso, le ka linyehelo tsa boithaopo le ka limpho. 19Juditha a khethela Molimo thepa eohle ea Holofernese, eo a neng a e abetsoe ke batho. Ha e le sesireletso, seo a neng a se tlositse holim'a moalo oa hae, a se abela Morena, ho phetha kano. 20Ka khoeli tse tharo sechaba se ne se keteka, Jerusalema, ka pele ho Tempele, se e-na le Juditha.
21Ka morao ho matsatsi ao, e mong le e mong a khutlela lehaeng la hae. Juditha a boela Bethulia, moo a neng a ahile teng. Bophelong bohle ba hae a tuma haholo ka ho phatlalla ha naha. 22Ho bile le ba bangata ba neng ba batla ho mo nyala; empa ho tloha nakong eo monna oa hae Manase a hlokahetseng ka eona, 'me a orohela ho bang ka eena, Juditha ha aa ka a lumela monna le a mong, matsatsing 'ohle a ho phela ha hae. 23Botumo ba hae bo ne bo ntse bo eketseha, 'me a hola a phela tlung ea monna oa hae ho fihlela a e-ba lilemo li lekholo le metso e mehlano. A lokolla lekhabunyane la hae. A hlokahalla Bethulia, 'me a patoa lehaheng moo mofu Manase, monna oa hae, a neng a robetse teng. 24Ntlo ea Iseraele ea e-ba tšiamong ka matsatsi a supileng. Pele ho lefu la hae, a abela bang ka eena le bang ka monna oa hae, Manase, maruo a hae.
25Ha Juditha a sa ntse a phela, esita le ka morao ho lefu la hae, ha ho ea kileng a tšoenya sechaba sa Iseraele le ka mohla.
