1Eaba Holofernese o re ho Juditha: “Khothala, mosali, se tšabe. Ha ke e-s'o ka ke utloisa mang kapa mang bohloko ea ikhethetseng ho sebeletsa Nebukadenesare, khosi ea lefatše lohle. 2Esitana le hajoale, haeba sechaba sa heno sa baahi ba maloting se ne se sa ka sa 'nyelisa, nka be ke sa ka ka se phahamisetsa lerumo la ka. Ke bona ba ipaketseng hona. 3Feela, ak'u mpolelle, ke ka baka la'ng u balehileng ho bona, le ho tla ho rona? Hona ho tla u pholosa. Khothala! U tla phela bosiu bona, le ka nako e tlang. 4Ha ho na ea tla u ntša kotsi; empa u tla tšoaroa hantle joaloka bohle ba sebeletsang morena oa ka, khosi Nebukadenesare.”
5Juditha a mo fetola, a re: “Ak'u mamele mantsoe a lekhoba la hao; lumella lekhabunyane la hao le ke le bue ka pele ho uena. Ha nka ke ka bua leshano ka pel'a morena oa ka, bosiung bona. 6Haeba u ka latela keletso ea lekhabunyane la hao, Molimo o tla phetha mosebetsi oa hae ka uena, 'me seo morena oa ka a ikemiselitseng ho se etsa se ke ke sa hloleha. 7Ke hlapanya ka Nebukadenesare khosi ea lefatše lohle, le ka matla a ea u rometseng ho laola bohle ba phelang hore, ka uena, ha a sebeletsoe ke batho feela; empa esita le liphoofolo tsa naha, le makhomo le linonyana tse fofang li tla phelela Nebukadenesare le ntlo eohle ea hae, ka baka la matla a hao. 8Re se re utloile ka bohlale ba hao le masene a hao. Hoa tsejoa hohle lefatšeng hore, 'musong oohle oa khosi, ha ho ea lekanang le uena ka molemo, le ka tsebo e batsi le ka bolaoli bo makatsang ba lintoa. 9Hape, re utloile le seo Akiore a se boletseng puong ea hae ka lekhotleng la hao. Eitse hoba banna ba Bethulia ba mo qenehele, a ba bolella tsohle tseo a u phetetseng tsona. 10Joale, monghali le morena oa ka, se khese seo a se boletseng; empa u inahane ka sona, hobane ke 'nete. Batho ba habo rona ba ke ke ba otloa, sabole ha e ka ke ea e-ba le matla holim'a bona, haese feela ha ba ka siteloa Molimo oa bona.
11“Empa joale, e le hore morena oa ka a se ke a hloleha ka ho chechisoa ke bona, lefu le tla ba oela holimo; hobane ba linaleng tsa sebe, seo ba halefisang Molimo oa bona ka sona, nako le nako ha ba etsa phoso. 12Erekaha ba haelloa ke lijo, le metsi a bona a ntse a fokotseha, ba rerile ho hlaba makhomo a bona, 'me ba ikemiselitse ho sebelisa lintho tsohle tseo Molimo, ka melao ea hae, a thibetseng batho ho li ja. 13Ba entse qeto ea hore ba tla ja lilopotsia tsa koro, le karolo ea leshome ea veine le oli, tseo ba neng ba li bolokile ka hloko e le tse neng li khethetsoe baprista ba sebeletsang Molimo oa rona Jerusalema, tseo ka molao ho seng mang kapa mang sechabeng ea ka li amang. 14Ba bile ba romela batho Jerusalema, eo baahi ba eona ba etsang tse tšoanang le tseo, ho ba fumanela tumello e tsoang Lekhotleng la baholo ba sechaba. 15Joale, mohla ba tsebisitsoeng tumello eo 'me ba qalileng ho etsa tse reriloeng, ka lona letsatsi leo ba tla neeloa ho lona hore ba ripitloe. 16'Na, lekhabunyane la hao, hoba ke tsebe sena sohle, ka ba baleha. Molimo o nthometse ho tla phetha lintho le uena, tseo ka tsona, etlare ha lefatše le utloa, le tlang ho makala haholo. 17Lekhabunyane la hao ke mosali oa morapeli; o sebeletsa Molimo oa leholimo bosiu le motšeare. Joale, morena oa ka, ke rata ho lula le uena; 'me 'na, lekhabunyane la hao, bosiu ka bong ke tla tsoela ka khohlong ho rapela Molimo, ea tla mpolella ha ba entse libe tsa bona. 18Ke tla tla ho u tlalehela, 'me u tla futuha ka lebotho lohle la hao. Ha ho le ea mong oa bona ea tla u ema pele. 19Ke tla u etella pele ho khaohanya Judea ho fihlela u finyella Jerusalema; ke tla u lokisetsa terone ea hao ka har'a motse, 'me u tla ba tsamaisa joaloka linku tse se nang molisa, ho se ntja e u rorelang. Sena ke ile ka se senoleloa, ka se tsebisoa e sa le pele, 'me ke rometsoe ho u behela sona.”
20Mantsoe ana a hae a khahla Holofernese le batlatsi bohle ba hae, 'me ba makalla bohlale ba hae, ba re: 21“Ho tloha pheletsong e 'ngoe ea lefatše ho isa ho e 'ngoe, ha ho na mosali ea tšoanang le eena ka botle ba sefahleho le ka bohlale puong.” 22Holofernese a re ho eena: “Molimo o nepile ha a u rometse u le selelekela sa sechaba sa heno, e le hore matla a be matsohong a ka, 'me timelo e be ho ba khesitseng morena oa ka. 23Ha e le uena, bokheleke ba hao e ka botle ba hao. Ha u ka etsa joalokaha u tšepisitse, Molimo oa hao e tla ba Molimo oa ka; uena ka sebele u tla aha tlung ea khosi Nebukadenesare, 'me u tume kahohle lefatšeng.”
