Jafeta o namolela Baiseraele ho Baamone
1Jafeta oa Mogileade e ne e le mohlabani ea matla. E ne e le mora oa seotsoa, ea tsoetsoeng ke Gileade. 2Mosali oa Gileade a mo tsoalla bara. Eare ha bara ba mosali eo oa hae ba se ba hōlile ba leleka Jafeta, ba re ho eena: “U ke ke ua ja lefa la ntat'a rōna, hobane u mora oa mosali osele.” 3Jafeta a baleha, a tloha ho bana babo, a ea aha naheng ea Tobe. Ha a le moo a bokanya banna ba linōkoane, 'me ba tsamaea le eena.
4Kamora' nakoana Baamone ba futuhela Baiseraele. 5E ile eare ha hona ho etsahala, baholo ba Gileade ba ea lata Jafeta naheng ea Tobe. 6Ba re ho eena: “Tloo, u tl'o ba molaoli oa rōna, e le hore re tle re loantše Baamone.”
7Jafeta a re ho baholo ba Gileade: “Ha ke re le ne le ntlhoile, 'me la nteleka tlung ea ntate? Joale le tlela'ng ho 'na ha le le tsietsing?”
8Baholo ba Gileade ba re ho Jafeta: “Ke ka baka leo re tlileng ho uena joale, hore u ee le rōna, u e'o loantša Baamone, 'me u tla ba moetapele oa baahi bohle ba Gileade.”
9Jafeta a re ho baholo ba Gileade: “Haeba le nkhutlisetsa haeso hore ke e'o loantša Baamone, 'me eba Morena o neelana ka bona ho 'na, na ke tla ba moetapele oa lōna?”
10Baholo ba Gileade ba arabela Jafeta, ba re: “Morena ke paki ea rōna; re tla etsa joalokaha u bolela.”
11Eaba Jafeta o tsamaea le baholo ba Gileade, 'me sechaba sa mo etsa moetapele oa sona le molaoli oa sona. Jafeta a pheta lipolelo tsa hae tsohle a le Misepa, moo Morena a ntseng a bona.
12Jafeta a rōmela maqosa ho khosi ea Baamone, a re ho eona: “U ntsekisa'ng ha e le moo u tlile ho tla ntoantša naheng ea ka?”
13Eaba khosi ea Baamone e re ho maqosa a Jafeta: “Ke hobane Baiseraele, ha ba ne ba e-tsoa Egepeta, ba ne ba hape naha ea ka ho tloha Arenone, ho ea fihla Jaboko, le ho ea fihla Jorodane; ka baka leo, nkhutlisetse naha eo ka khotso.”
14Jafeta a boela a rōma maqosa ao ho khosi ea Baamone, 15a re ho eona: “Jafeta o bua tjena: Baiseraele ha baa ka ba hapa naha ea Moabe, kapa naha ea Baamone. 16Ha Baiseraele ba nyoloha Egepeta ba ile ba tsamaea har'a lehoatata ho ea fihla Leoatleng la Lehlaka, ba tla fihla Kadeshe. 17Eaba Baiseraele ba rōmela maqosa ho khosi ea Edomo, ba re ho eona: ‘Re kōpa hore u re lumelle re fete har'a naha ea hao,’ empa khosi ea Edomo ea se ke ea ba mamela. Ka mokhoa o joalo ba rōmela maqosa le ho khosi ea Moabe, le eona ea hana, 'me Baiseraele ba hlola Kadeshe.
18“Joale ba tsamaea har'a lehoatata, ba kekoloha naha ea Edomo, le naha ea Moabe, ba ea fihla ka bochabela ho naha ea Moabe, ba hloma kamose oane ho Arenone. Empa ha baa ka ba kena moeling oa Moabe, hobane Arenone e ne e le eona moeli oa Moabe.
19“Joale Baiseraele ba rōmela maqosa ho Sihone, khosi ea Baamore, e leng khosi ea Heshebone, ba re ho eena: ‘Re kōpa hore u re lumelle re fete har'a naha ea hao, ho ea naheng ea rōna.’ 20Empa Sihone a se ke a lumella Baiseraele ho feta har'a naha ea hae. A bōkella sechaba sa hae sohle, a hloma Jahase, 'me a loantša Baiseraele.
21“Empa Morena Molimo oa Iseraele, a neelana ka Sihone le sechaba sohle sa hae matsohong a Baiseraele. Baiseraele ba ba hlōla, ba hapa naha eohle ea Baamore, e leng baahi ba naha eo. 22Ba hapa naha eohle ea Baamore, ho tloha Arenone ka boroa, ho ea fihla Jaboko ka leboea le ho tloha lehoatateng ka bochabela, ho ea fihla Jorodane ka bophirimela.
23“Kahoo Morena Molimo oa Iseraele, a leleka Baamore kapele ho sechaba sa hae sa Baiseraele. 24Ruri seo molimo oa lōna Kemoshe a le neileng sona ke sa lōna; le rōna re hapa naha ea e mong le e mong eo Morena Molimo oa rōna, a mo lelekileng kapele ho rōna. 25Joale u bona eka u feta Balake, mora oa Sipore, khosi ea Moabe, ka eng? Na o kile a tsekisana le Baiseraele, kapa na o kile a ba loantša? 26Ke lilemo tse makholo a mararo Baiseraele ba ahile Heshebone le metsaneng ea eona, le Arōoere le metsaneng ea eona, le metseng eohle e lebōpong la Arenone. Ke hobane'ng le sa kang la re amoha eona ka nako ee kaofela? 27Ka baka leo, ha kea u siteloa ka letho, 'me u etsa hampe ka ho ntoantša. Eka ka letsatsi lena Morena a ka ahlōla pakeng tsa bana ba Iseraele le Baamone.”
28Empa khosi ea Baamone ea se ke ea natsa molaetsa oo Jafeta a o rōmetseng ho eona.
Kano ea Jafeta
29Joale Moea oa Morena oa aparela Jafeta. A feta har'a naha ea Gileade le Manase, a fihla Misepa e Gileade. Ho tloha Misepa e Gileade a fetela ho Baamone. 30Jafeta a etsetsa Morena kano, a re: “Haeba ruri u ka neelana ka Baamone matsohong a ka, 31etlare ha ke khutla ke hlōtse Baamone, mang kapa mang ea tla tsoa tlung ea ka ho nkhahlanyetsa, e tla ba oa Morena, 'me ke tla etsa nyehelo ea secheso ka eena.”
32Eaba Jafeta o tšelela ho Baamone ho ba loantša, 'me Morena a neelana ka bona matsohong a hae. 33Jafeta a ba etsa mofela ho tloha Arōoere, ho ea fihla Minite. A timetsa metse e mashome a mabeli, ho ea fihla Abele-Keramime, a ba rinya haholo. Ka mokhoa o joalo bana ba Amone ba hlōloa ke bana ba Iseraele.
Morali oa Jafeta
34Ha Jafeta a khutlela ha hae, morali oa hae a tsoa ho ea mo khahlanyetsa, a letsa meropa, a etsa motjeko. E ne e le eena feela ngoana oa hae; ntle ho eena o ne a se na mora kapa morali e mong. 35Ha Jafeta a 'mona, a hahola liaparo tsa hae, a re: “Jo, morali oa ka oee! U nkutloisetsa'ng bohlōkō hakaale! Na ke uena ea ka ntlisetsang bomalimabe? Ke etselitse Morena kano, 'me nke ke ka e koenehela!”
36Morali oa hae a re ho eena: “Ntate, u etselitse Morena kano; etsa seo u ileng ua re u tla se etsa ka 'na, hobane Morena o u phetelelitse ho lira tsa hao, e leng Baamone.” 37A boela a re ho ntat'ae: “Nketsetse ntho ena e le 'ngoe feela: Ntumelle ke be mong feela ka likhoeli tse peli, ke tsamaee le thak'a tsa ka ke e'o lelera har'a lithaba, ke llele hore ke tla shoa ke le moroetsana.”
38Eaba ntat'ae o re: “Tsamaea!” A mo lumella ho ba sieo ka khoeli tse peli. A tsamaea le thaka tsa hae, a ea lithabeng, a ea llela hore o tla shoa e ntse e le moroetsana. 39Kamora' likhoeli tse peli a khutlela ho ntat'ae, 'me ka eena ntat'ae a phetha kano eo a e etselitseng Morena, morali oa hae a shoa e ntse e le moroetsana.
Hona ea e-ba moetlo oa Baiseraele, 40oa hore ka selemo se seng le se seng baroetsana ba Baiseraele ba e'o llela morali oa Jafeta oa Mogileade ka matsatsi a mane.
