Molaetsa ho khosi Akase
1Mehleng ea puso ea Akase, khosi ea Juda, eo e neng e le mora oa Jotame, le setlōhōlō sa Usiea, bo-Resine, khosi ea Arame, le Peka, mora oa Remaleea, khosi ea Iseraele, ba futuhela Jerusalema, empa ba se ke ba e hlōla.
2Ha bolelloa ba ntlo ea Davida, ha thoe: “Baarame ba se ba fihlile naheng ea ba morabe oa Efraime.” Akase le sechaba sa hae ba tšoha haholo, ba thōthōmela sa lifate li tsukutloa ke moea.
3Morena a re ho Esaea: “Uena le mora oa hao Sheara-Jashube, tsamaeang le e'o khahlanyetsa Akase. Le tla mo fumana qetellong ea mosèlè oa metsi a letšana le kaholimo, tseleng e eang setšeng sa Mohlatsoi oa Masela. 4Le re ho eena: ‘Itlhokomele, u be sebete, u se ke ua tšaba, u se ke ua nyahamisoa pelo ke likoqonyana tseno tse peli tse kubellang, e leng khalefo ea Resine le ea Baarame, le ea mora oa Remaleea. 5Baarame le ba morabe oa Efraime, le mora oa Remaleea, ba rerile ho u timetsa, ba re: 6“A re futuheleng Juda, re e harasoanye, re e arolelane, re bee mora oa Tabeele hore e be khosi ea eona.” 7Ka baka leo, Morena Molimo o re:
“ ‘Hona ho ke ke ha e-ba teng,
hona ho ke ke ha etsahala,
8hobane Damaseka
ke motse-moholo oa Arame,
hlooho ea Damaseka
ke Resine feela.
Ho e-s'o fete lemo tse mashome
a tšeletseng a metso e mehlano,
morabe oa Efraime
o tla b'o s'o senyehile,
e se e se sechaba.
9Motse-moholo oa Efraime
ke Samaria,
hlooho ea Samaria
ke mora oa Remaleea feela.
ha le sa lumele
le ke ke la tiea.’ ”
Sesupo sa Emanuele
10Morena a boela a bua ho Akase, a re: 11“Kōpa Morena Molimo oa hao, hore a u etsetse sesupo se tsoang tlase-tlase, kapa holimo-limo.”
12Empa Akase a re: “Nke ke ka kōpa letho, nke ke ka bea Morena tekong.”
13Eaba Esaea o re: “Mamelang lōna ba ntlo ea Davida! Na ha hoa lekana ha le ntse le khathatsa batho, ha e le moo le ntse le khathatsa Molimo oa ka? 14Ka baka lena, Morena ke eena ea tla le etsetsa sesupo. Bonang, moroetsana o tla emōla, a tsoale mora, 'me o tla mo rea lebitso la Emanuele. 15O tla ja lebese le mahe a linotši, ho fihlela a tseba ho khesa bobe, a ikhethela ho lokileng. 16Empa etlare moshanyana a e-s'o tsebe ho khesa bobe, le ho ikhethela ho lokileng, naha ea likhosi tsena tse peli, tseo u li tšabang, e tla fetoha nanaola.
17“Uena le sechaba sa hao, le ba ntlo ea ntat'ao, Morena o tla le tlisetsa nako e e-s'ong ho be teng ho tloha mohla ba morabe oa Efraime ba ikarolang ho ba morabe oa Juda. O tla tlisa khosi ea Asiria.”
18Mohlang oo Morena o tla letsa mololi o bitsang lintsintsi tse tsoang hōle, melatsoaneng ea Egepeta, le linotši tse tsoang naheng ea Asiria. 19Li tla tla tsohle, li fihle li hahele likhohlong tse tebileng, le mafarung a mafika, le har'a lifate tsohle tsa leōka, le har'a makhulo 'ohle.
20Mohl'a tsatsi leo, Morena o tla beōla ka lehare le alimiloeng kamose oane ho Nōka, e leng khosi ea Asiria. O tla beōla lihlooho tsa lōna, le mohoètè o meomong ea lōna, a le beōle le litelu. 21Tsatsing leo motho o tla rua khomo e le 'ngoe le likhutšoane tse peli, 22empa o tla ja lebese, hobane li tla be li sisa haholo. Bohle ba tla sala naheng eo ba tla ja lebese le mahe a linotši.
23Mohl'a tsatsi leo, hohle moo ho neng ho e-na le lifate tsa morara tse sekete, tseo theko ea tsona e leng silefera e ka etsang boima ba likilo tse leshome le metso e 'meli le halofo, ho tla mela hlabahlabane le meutloa. 24Batho ba tla tsamaea ba nkile liqha le metsu, hobane naha e tla be a koahetsoe ke hlabahlabane le meutloa. 25Maralla 'ohle a neng a lemiloe, ho ke ke ha hlola ho uoa ho 'ona, ka baka la ho tšaba hlabahlabane le meutloa; empa e tla ba moo ho khapheloang likhomo teng, le moo linku li sollang teng.
