ESAEA 56

“Ahlōlang ka toka,

le etse ho nepahetseng,

hobane ho pholosa ha ka

ho se ho le haufi,

le ho loka ha ka

ho se ho tla senoloa.

₂Ho lehlohonolo motho

ea etsang tsena,

ho lehlohonolo motho

ea li khomarelang,

ea bolokang Sabatha,

ea sa se silafatseng,

eo tsoho la hae

le sa etseng tse mpe.

₃“Se lumelle molichaba

ea ikabetseng Morena hore a re:

‘Morena o tla nkhetholla

chabeng sa hae ho hang!’

Se lumelle lehaole

ho ipelaetsa, le re:

‘'Na ke sefate se omeletseng!’ ”

₄Morena o bua tjena ho mahaole:

“Mahaole a bolokang

Lisabatha tsa ka,

a ikhethelang tse nthabisang,

a khomarelang selekane sa ka,

₅kahar'a tempele ea ka,

kahar'a marako a eona,

ke tla a etsetsa khopotso,

ke a ree lebitso, bitso le fetang

la ba nang le bara le barali,

ke tla a rea lebitso la kamehla eohle,

bitso le ke keng la hlola le felisoa.

₆“Haele balichaba

ba ikabetseng Morena,

ba ikabetseng ho mo sebeletsa,

le hona ho rata bitso la hae,

bao e leng bahlanka ba hae,

ba bolokang Sabatha,

ba se boloka ba sa se silafatse,

ba khomaretseng selekane sa ka;

₇bona ke tla ba tlisa

thabeng ea ka e halalelang,

ke ba thabise

ka tlung ea ka ea thapelo.

Nyehelo tsa bona tsa secheso

le mahlabelo a bona,

tsena ke tla li amohela

aletareng ea ka,

hobane ntlo ea ka

e tla bitsoa ntlo ea thapelo,

e bitsoe ntlo ea thapelo

ea lichaba tsohle.”

“Ke sa tla boela

ke mo khutlisetsa ba bang,

ntle ho bao

ke seng ke ba khutlisitse.”

₉“Lōna batana tsohle tsa naha

tloong, le harōle,

lōna libatana tsohle tsa meru.

₁₀Balebeli ba Iseraele ba foufetse,

ha ba na tsebo,

ke ntja tsa limumu,

ha li tsebe ho bohola,

lia robala, li bōthe,

li ithatela boroko.

₁₁Ke ntja tsa menyollo,

ha li ke be li khōre,

ke balisana ba se nang kutloisiso,

motho ka mong

o ikela ka tsela ea hae,

motho ka mong

o ipatlela mouno

moo o ka bang teng.

₁₂Motho ka mong o re:

‘Tloong koano, ke tla lata veine!

A re itlōpeng joala,

re be re bo shebe feela!

La hosasane

le tla 'ne le ke la kajeno,

mohlomong le tla ba letle

ho feta lena!’ ”