ESAEA 54

₁“Bina, uena nyōpa,

u sa kang ua beleha,

tsanyaola, u bine ka thabo,

uena u sa kang ua utloa

bohlōkō ba pelehi,

hobane bana ba mosali ea lahliloeng

ba bangata ho feta

ba mosali ea nyetsoeng,”

₂“Atolosa setša sa tente ea hao,

u sarolle le masira a ntlo ea hao;

lelefatsa khoele tsa masira a hao,

le limapo tsa tsona

u li khokhothele.

₃U tla namela ka ho le letona

le ka ho le letšehali,

litlōhōlō tsa hao

li tla hapa naha tsa balichaba,

li ahe metseng

eo e seng e le masupi.

₄“U se ke ua tšaba,

u ke ke ua hlajoa ke lihlong,

se tšabe ho tlontloloha,

u ke ke ua nyenyefatsoa.

U tla lebala lihlong

tsa bocha ba hao,

ho nyelisoa ha bohlolohali ba hao,

ha u sa tla hlola u ho hopola.

₅'Mōpi oa hao

ke eena monna oa hao,

Morena oa mabōtho

ke lona lebitso la hae;

Ea Halalelang oa Iseraele

ke eena Molopolli oa hao,

o bitsoa Molimo oa lefatše lohle.

₆“Morena o u bitsitse

sa mosali ea lahliloeng,

a u bitsa

sa mosali ea hlomohileng,

ea nyetsoeng a sa le monyenyane

a ba a lahloa,”

₇“Ke ile ka u furalla

ka motsotsoana feela,

empa ka baka la kutloelo-bohlōkō

ke tla u khutlisa.

₈“Ka baka la khalefo ea ka

ke ile ka u furalla,

ka u patela fahleho sa ka

ka motsotsoana;

empa kahobane ke u rata,

ke tla u utloela bohlōkō

kamehla eohle,”

₉“Ho 'na tsena li tšoana

le tsa mehleng ea Nōoe,

ha ke ne ke hlapanya ke re:

Morallo o ke ke oa e-ba teng hape;

kahoo ke hlapanya hore

nke ke ka hlola ke u halefela,

nke ke ka hlola ke u khalema.

₁₀Leha lithaba li ka sisinngoa

le maralla a suthisoa,

lerato la ka le matla ho uena

le ke ke la sisinyeha,

kapa selekane sa ka sa khotso

sa felisoa,”

₁₁“Uena motse o hlokofalitsoeng,

oa tsukutloa ke lifefo,

oa hloka motšelisi,

majoe a marako a hao

ke tla a hahella holim'a sekama,

methèo ke e hahe ka majoe a safire.

₁₂Tora tsa hao ke tla li haha

ka mahakoe a mafubelu,

khoro e be tsa majoe

a bofubelu ba malakabe,

marako e be a mahakoe a bohlokoa.

₁₃“Bara ba hao bohle

ba tla rutoa ke Morena,

litlōhōlō tsa hao

li be le khotso ea sebele.

₁₄Ha u etsa tse lokileng

u tla matlafala,

bompoli bona

bo ke ke ba e-ba teng ho uena,

ha u ka ke ua tšaba letho,

esita le litšōsa

li ke ke tsa u atamela.

₁₅Bona, u tla fela u futuheloe,

feela e se ka tumello ea ka;

empa ea u futuhelang

o tla ineela ho uena.

₁₆“Ke 'na ea bōpileng lelala,

lona le butsoelang

mashala sefuthelong,

ebe le etsa hlomo

tse loketseng mosebetsi oa tsona;

le mosenyi ea senyang

o bōpiloe ke 'na.

₁₇Ha ho na sebetsa se tla u bolaea,

bohle ba u qōsang

u tla ba hlōla ka nyeoe.

Lena ke lona lefa

la bahlanka ba Morena,

ke ho loka hoo ke ba neang hona,”