ESAEA 33

₁U malimabe hakaakang,

uena motimetsi,

uena u e-s'ong ho ka u timetsoa!

U malimabe hakaakang,

uena lehlabaphieo,

uena u e-song ho ka u èkoa!

Ha u qeta ho timetsa,

uena u tla timetsoa,

ha u khaotsa ho èka,

uena ba tla u èka.

₂Oho, Morena, ak'u re hauhele,

rōna ba u tšepileng!

Hoseng ho hong le ho hong

u re matlafatse,

u re pholose nakong ea litsietsi.

₃Ha tōlō la hao le thoathoaretsa,

chaba lia baleha,

ha u phahama,

chaba lia phasalla.

₄Lōna lichaba,

khapo ea lōna e jeloe sa bookholane

ha bo kumōla,

banna ba e tšolohela

sa boieane ba litsie.

₅Morena o phahame,

hobane o ahile holimo,

o entse hore toka le ho loka

li be teng Sione.

₆Morena e tla ba mothèo oa 'nete,

e be mothèo mehleng ea lōna,

e be sesiu sa pholoho

le bohlale le tsebo;

ho tšaba Morena

ke lona letlotlo la lōna.

₇Bonang, bahale ba bokolla,

ba bokolla har'a literata,

maqosa a khotso

a lla sa 'mokotsane.

₈'Mila e meholo e setse e le feela,

litseleng le teng

batsamai ha ba sa bonoa,

selekane se senyehile,

metse e nyelisitsoe,

ha ho sa le le ea hlomphehang.

₉Naha e omeletse, e ponne,

Lebanone e soabile, ea pona,

Sharone e fetohile lehoatata,

Bashane le Karamele

li hlōhlōreha mahaba.

₁₀“Joale ke tla ema,”

ho rialo Morena;

“joale ke tla tuma,

joale ke tla phahama.

₁₁Le emōtse 'mōkō,

le tla tsoala litlhaka,

ho phefumoloha ha lōna

ke mollo o tla le timetsa.

₁₂Lichaba li tla cha joaloka kalaka,

li che joaloka fate tsa leōka

tse remiloeng.”

₁₃Lōna ba hōle,

utloang seo ke se entseng,

lōna ba haufi,

ananelang matla a ka.

₁₄Baetsalibe ba Sione

ba tšoeroe ke tšabo,

ba khopo bona baa thōthōmela:

“Ke mang ho rōna ea ka phelang

mollong o timetsang?

Ke mang ho rōna ea ka phelang

malakabeng a kamehla eohle?”

₁₅Motho ea metsamao e lokileng,

ea puo li ntle,

ea hloileng ho rua ka mahahapa,

ea sa amoheleng tjotjo,

ea sa mameleng

merero ea ho bolaea,

ea thibelang mahlo a hae

hore a se bone bobe;

₁₆ke eena ea tla phela

bakeng tse phahameng,

eo setšabelo sa hae

e tla ba qhobosheane e thabeng.

Lijo o tla li fuoa,

a ke ke a hloka metsi.

₁₇Mahlo a lōna

a tla bona khosi e khabile,

le bone le naha e nametseng hōle.

₁₈Pelong ea hao

u tla lohotha tsietsi tsa pele:

“O kae

ea neng a bala lithelo?

O kae

ea neng a bea chelete sekaleng?

Se kae

sehloela se neng se bala litora?”

₁₉Chaba seo sa baikakasi

u ke k'a hlola u se bona,

chaba seo puo ea sona

e sa tsebahaleng,

chaba sa mahoelea,

seo puo ea sona e sa utloahaleng.

₂₀Talimang Sione,

motse oa mekete e halalelang,

mahlo a lōna

a tla bona Jerusalema,

leaho la khotso,

tente e ke keng ea thakholloa,

thakhisa tsa eona

ha li ka ke tsa khokhotholloa,

thapo tsa eona

ha li ka ke tsa khaoha.

₂₁Ke moo Morena

a tla tlotleha ho rōna,

e tla ba baka sa linōka tse batsi

le melatsoana.

Ha ho kèpè sa masokoana

se tla feta teng,

ha ho kèpè se seholo

se tla sesisoa teng.

₂₂Morena ke eena moahlōli oa rōna,

Morena ke eena

ea re beelang molao,

Morena ke eena khosi ea rōna,

Morena ke eena ea tla re pholosa.

₂₃Thapo tsa sekèpè sa hao

li hlephile,

ha li sa tiisa thupa

e tšoereng liseile,

liseile li se li sitoa

ho thathalla.

Khapo e ngata e tla arolelanoa,

esita le lihlotsa

li tla fumana seabo.

₂₄Ha ho moahi oa Sione ea tla re:

“Kea kula!”

Libe tsa baahi ba moo

li tla tšoareloa.