Selekane sa Egepeta se se nang thuso
1Morena o re:
“Le malimabe hakaakang
bana ba mahlabaphieo,
ba phethang merero
eo e seng ea ka,
ba etsang lilekane
ba se na Moea oa ka,
ba etsang hore libe li tōte!
2Le theohela Egepeta
le sa ntherisa,
tšireletso le e'o e batla ho Faro,
le tšabele moriting oa Egepeta.
3Tšireletso ea Faro
e tla le hlabisa lihlong,
ho tšabela moriting oa Egepeta
e be ho tlontloloha.
4Leha mahosana a bona
a se a le Sōoane,
maqōsa a bona
a s'a fihlile Hanese,
5bohle ba tla hlabisoa lihlong
ke chaba seo,
hoba chaba seo
ha se ba thuse ka letho;
ha se ba tlisetse thuso,
ha se ba etsetse molemo,
haese ho ba tlisetsa masoabi
le ho tlontloloha.”
6Bona ke boporofeta malebana le libatana tsa naha e ka Boroa:
Naheng ea litsietsi
le ea mahlomola,
naheng ea litau le litauhali,
ea bo-marabe
le ea nōha tse mahlōkō,
tse chalametsang,
maqōsa a belesitse maruo a 'ona
holim'a litonki,
matlotlo a 'ona
holim'a lilōta tsa likamele,
a a isetsa chaba sena
se se nang thuso,
7a isoa Egepeta,
naheng e se nang thuso,
kahoo ke e bitsa khanyapa
e se nang kotsi.
Chaba se sa hlompheng
8E-ea, u ba ngolle tsena
holim'a letlapa ba ntse ba bona,
u ba ngolle tsona bukeng,
e le hore ka matsatsi a tlang
e tl'e be bopaki,
e tl'e be bopaki ba kamehla eohle.
9Chaba sena ke sa mahlabaphieo,
bana ba sona ke bo-raleshano,
molao oa Morena ha ba o mamele.
10Ho linōhe ba re:
“Le se hlole le bona lipono!”
Ho baporofeta, ba re:
“Se re porofeteleng tse lokileng!
Re bolelleng tse re thabisang,
le re porofetele tsa bohata.
11Suthang tseleng,
le khelohele kathōko,
le khaotse ho re bolella
tsa Ea Halalelang oa Iseraele!”
12Kahoo Ea Halalelang oa Iseraele o re:
“Kahobane le hanyetsa keletso ena,
le tšepa khatello le bokhopo,
le beile tšepo ea lōna ho tsona,
13bokhopo bona
bo tla ka lerako le phahameng,
le seng le petsohile, le hlephile,
le helehang ka ho panya ha ntši.
14O tla le thuakanya
sa pitsa ea letsopa
e pshatleha makumane,
a thuakanye a sa qenehele letho,
hoo ho ke keng ha sala
le lengetana la ho okha mollo,
kapa lona la ho kha metsi,
ho a kha ka selibeng.”
15Morena Molimo, Ea Halalelang oa Iseraele, o bua tjena:
“Ha le ka baka, la ba le khotso,
le tla pholoha,
ha le ka khutsa, la ba le tšepo,
le tla matlafala,
empa le hanne ho etsa joalo.
16Le itse: ‘Che,
re tla palama lipere, re balehe!’
E, le tla fela le balehe!
La ba la re:
‘Re tla palama tse lebelo!’
Tse le phalalisang
li tla ba lebelo ho feta!
17Ba sekete ba lōna
ba tla phalalisoa ke a le mong,
ba bahlano bona
ba le phalalise bohle,
ho fihlela le sala le ka sefate,
se itsōlōkileng holim'a thaba,
le ka mokhele holim'a leralla.”
18Empa Morena o rata ho le hauhela,
o labalabela ho tla le rekolohela,
hobane Morena
ke Molimo oa toka,
ho lehlohonolo bohle
ba mo lebeletseng.
Molimo o tla hlohonolofatsa sechaba sa hae
19Oho, lōna sechaba sa Sione, lōna ba ahileng Jerusalema, le ke ke la hlola le sa lla. Ha le ka ipiletsa ho eena, o tla le hauhela; hang-hang ha a utloa sello sa lōna o tla le araba. 20Leha Morena a le fepa bohobe ba matšoenyeho, a le noesa metsi a litsietsi, baruti ba lōna ba ke ke ba hlola ba pateha, empa le tla ba bona ka mahlo a lōna. 21Leha le ka khelohela ka tsohong le letona kapa ka ho le letšehali, le tla utloa lentsoe le le nyenyeletsa, le re: “Ena ke eona tsela, tsamaeang ka eona.” 22Melimo ea lōna ea bohata, e manehiloeng silefera, le melimo ea lōna ea litšoantšo, e manehiloeng khauta, le tla e silafatsa, le e lahle joaloka lesela la lehatlelo, le re ho eona: “Tlohang mona!”
23Lijalo tsa lōna, tseo le li jalang masimong, Morena o tla li nesetsa pula, a le fe lijo tse ngata tse tsoang mobung, chai e be kholo. Mohlang oo, mehlape ea lōna e tla fula makhulong a mangata. 24Lipholo le litonki tse lemang li tla ja furu e monate, e ileng ea olosoa ka kharafu le ka khafōlé. 25Holim'a thaba ka 'ngoe e phahameng, le holim'a leralla ka leng, ho tla ba le melatsoana ea metsi a phallang, mohl'a batho ba bolaoang ba etsoa mofela, le litora li helehang. 26Ngoeli e tla lekana le leseli la letsatsi, leseli la letsatsi lona le lekane le leseli la matsatsi a supileng. Tsena li tla etsahala ka letsatsi leo ka lona Morena a tlamellang maqeba a sechaba sa hae, a folisang le matetetso a sona.
Molimo o tla ahlōla Asiria
27Bonang, bitso la Morena
le tsoa hōle,
khalefo ea hae ea tlōkōma,
kotlo e boima;
molomo oa Morena
o tletse khalefo,
leleme la hae
le ka mollo o timetsang.
28Ho phefumoloha ha hae
ho ka nōkana e e-ja litlhokoa,
metsi a nyoloha
ho ea fihla molaleng,
ho hlōkōla lichaba
mafeela a tsona,
ho li kenya khoathatha
e tla li khelosa tsela.
29Empa lōna le tla bina lifela,
joaloka mohl'a bosiu
ba mokete o halalelang,
pelo tsa lōna li nyakalle
sa ba letsang makolilo,
ba a letsa
ba e-ea thabeng ea Morena,
ba e-ea ho Lefika la Iseraele.
30Morena o tla utloahatsa
lentsoe le tlōtlehang la hae,
a bonahatse tsoho la hae
ha le theoha,
le theoha ka mabifi le ka khalefo,
ka malakabe a mollo o timetsang,
ka leru le phatlohang,
le ka lifefo, le ka sefako.
31Baasiria ba tla tšosoa
ke ntsoe la Morena,
ha Morena a ba otla
ka molamu oa hae.
32Ha Morena a ba otla
ka molamu oa hae,
ho tla thōhōletsoa
ka meropa le liharepa,
'me Morena ke eena
ea tla ba khakhatha
ka molamu oa hae.
33Khale sechesetso
se lokiselitsoe khosi,
se batsi, se bile se tebile;
joang le lihotetso li entse pōkella,
ho phefumoloha ha Morena
ho kang nōkana ea sebabole,
ho tla se hotetsa
se laime malakabe.
