Morena o tla otla lefatše
1Morena o tla falatsa lefatše,
a le timetse,
sebopeho sa lona a se senye,
baahi ba lona a ba hasanye.
2Ho tla ba joalo ho moprista
le ho sechaba,
ho mohlanka le ho mong'a hae,
ho lekhabunyane
le ho mofumahali oa lona;
ho be joalo ho moreki
le ho morekisi,
ho moalimi le ho moalimuoa,
ho morui le ho mofutsana.
3Fatše le tla falatsoa kahohle-hohle,
tsohle tsa lona le li amohuoe,
hobane Morena o buile joalo.
4Fatše le bofifing, le bile lea pona,
fatše lea tepella, le bile lea pona,
bahlomphehi ba lefatše
le bona baa tepella.
5Fatše le silafalitsoe
ke baahi ba lona,
ba tlōtse melao, ba robile litaelo;
ba sentse selekane sa kamehla eohle.
6Kahoo thōhako e aparetse lefatše,
baahi ba lona
ba jere molato oa bona,
ba chesoa ke lebatama,
ho sale ba 'maloana.
7Veine e ncha e fofile,
fate tsa morara li ponne,
ba thabileng
ba apareloa ke masoabi.
8Meropa ea thabo
e khaotsa ho tilinya,
mehoo ea ba nyakaletseng
le eona ea fela,
pina tsa liharepa
le tsona li khaolitse.
9Veine e felile
le lipina ha li sa le eo, lino tse tahang
ke mohalakane ho ba li noang.
10Motse oa mafeela o fetohile lesupi,
matlo 'ohle a tinketsoe,
hore ho se be ea ka kenang.
11Literateng tsohle
batho ba llela veine,
menyaka eohle le eona e s'e felile,
lefatšeng lohle
melilietsane ha e sa utloahala.
12Har'a motse ho setse masupi feela,
menyako ea motse
e robehile likotoana.
13Ho tla ba joalo lefatšeng,
har'a lichaba,
ho be joaloka fate sa mohloaare
ha se hlōhlōroa,
ho khoahlapisoa morara o setseng
ha ho kotuloa.
14Ba tla hōoeletsa ka mantsoe a phefa,
ba binele Morena ea tlōtlehang,
ba hōoe haholo,
ba hōoe ho tloha bophirimela.
15Lōna ba ka bochabela
tlotlisang Morena,
le lōna ba lihlekehlekeng,
le tlotlise bitso la Morena,
Molimo oa Iseraele.
16Pina tse tsoang
pheletsong tsa lefatše
re li utloile:
“Tlōtla e ke e isoe
ho Ea Lokileng!”
Empa 'na ke re: “Ke felile!
Ke felile! A 'na eloa!”
Mahlabaphieo
a nts'a tsoela pele ho èka,
bohlabaphieo ba 'ona
bo ntse bo hatela pele!
17Tšabo le mohohlo le leraba
li u emetse,
li emetse uena ea ahileng lefatšeng.
18Ea balehang mokhosi
o bakoang ke tšabo,
eena o tla oela kahar'a mohohlo;
ea ngoangoarelang
hore a tsoe ka mohohlong,
raba le chehiloeng
eena le tla mo tšoasa.
Pula ea litloèbèlèlè
e tla tšoloha e e-tsoa holimo,
methèo ea lefatše
le eona e tla reketla.
19Fatše lohle le tla ripitloa,
le ripitloe,
fatše lohle le tla phatloha,
le phatlohe,
fatše le tla sisinngoa
malulong a lona,
le sisinngoe.
20Fatše le tla thekesela,
le kapeee sa letaoa
le tsokotsehe
sa lephèphè la molebeli;
libe tsa lona li tla le imela haholo,
ebe lea oa,
ha le hlole le tsoha hape.
21Ka tsatsi leo, Morena o tla otla,
a otle mabōtho
a holimo leholimong,
khosi tsa lefatše
a li otlele lefatšeng.
22Khosi li tla khōbōkanngoa tsohle,
li be 'moho,
li khōbōkanngoe sa batšoaruoa
ba le ka mohohlong,
ebe li ea koalloa ka chankaneng,
kamor'a matsatsi a mangata
li nt'o neoa kotlo.
23Khoeli e tla fifala,
tsatsi le ipate sefahleho,
ha Moren'a mabōtho
a busa Sione le Jerusalema,
baholo a ba senolela tlōtla ea hae.
