'Muso oa khotso
1Lehlōmela le tla hlōma,
le hlome kutung ea Jese,
kala le tsoang mothapong oa hae
le behe litholoana.
2Moea oa Morena o tla ba ho eena,
Moea oa bohlale
le Moea oa kutloisiso,
Moea oa boeletsi
le Moea o matla,
Moea oa tsebo
le Moea oa ho tšaba Morena;
3eena o tla thabela
ho tšaba Morena.
ha a ka ke a ahlōla
ho ea ka tšobotsi,
kapa a etsa qeto
ho ea ka tsa bo-fuufu;
4empa mafutsana
o tla a ahlōlela ka toka,
ba ikokobelitseng ba naha ena
a ba sebeletse ka toka,
polelo tsa hae
e be thupa e otlang naha ena,
kahlōlo tsa hae
li timetse ba khopo.
5Ho loka e tla ba leqhama la hae,
'nete e be senyepa thekeng la hae.
6Phiri e tla phela le konyana,
lengau lona le bothe,
le bothe le potsanyane,
namane le taoana le sethojana
li hōle 'moho,
ngoana oa lesea a li etelle pele.
7Khomo e tla fula le bèrè,
manamane a tsona a bothe 'moho,
tau e fule joang joaloka pholo.
8Lesea le tla ipapalla
pel'a mokoti oa masumo,
ngoana a kenye letsoho
mokoting oa qōoane.
9Li ke ke tsa senya
kapa tsa ntša kotsi,
hohle Thabeng ea ka e halalelang,
hobane fatše le tla be le tletse
tsebo ea Morena,
joalokaha leoatle le tletse metsi.
Bathōpuoa ba tla khutla
10Mohlang oo, setlōhōlō sa Jese se tla ema e le mokhele oa lichaba; lichaba tsohle li tla se batla, sebaka seo se tla phomola ho sona se tla tlōtleha. 11Tsatsing leo Morena o tla otlolla letsoho la hae khetlo la bobeli, ho lopolla masalla a sechaba sa hae a Asiria le a Egepeta, a Patarose le a Kushe, a Elame le a Shinare, a Hamate le a ahileng lihlekehlekeng.
12O tla emisetsa lichaba mokhele,
a phuthe Baiseraele
ba lelekiloeng naheng ea bona;
a bokelle sechaba sa Juda
se qhalantsoeng,
a se bokelle hohle
qoleng tse 'ne tsa lefatše.
13Mōna oa ba Efraime o tla fela,
lira tsa ba morabe oa Juda
li timetsoe,
ba Efraime
ba ke ke ba hōnōhela ba Juda,
le ba Juda
ba ke ke ba tšoenya ba Efraime.
14Ka bophirimela
ba tla ubella Filesitiea,
ba kopanele chaba tsa bochabela
ba li senyetse,
ba hape Baedomo le Bamoabe,
Baamone bona ba busoe ke bona.
15Morena o tla pshesa kou
ea oatle la Egepeta,
tsoho la hae le fokise moea
o chesang holim'a Nōka,
Nōka eo a e arole
melatsoana e supileng,
batho ba e tšele
ba ntse ba roetse meqathatso.
16Masalla a chaba sa hae
a tsoang Asiria,
a tla tsamaea 'mileng
o phatlaletseng,
joaloka mohla Baiseraele
ba tsoang Egepeta.
