HOSEA 8

₁“Letsa lenaka, u hlabe mokhosi!

Ntsu ke eo e ubella Moreneng,

hobane chaba se sentse,

sa senya selekane sa ka,

sa ba sa tlōla le molao oa ka.

₂Chaba sa Iseraele sea ipiletsa,

sea ipiletsa, se re ho 'na:

‘Oho, Molimo oa rōna,

rōna rea u tseba!’

₃Empa Baiseraele

ba furaletse tse molemo,

kahoo sera se tla ba phalalisa.

₄Ba ipeetse khosi

ba sa ka ba ntherisa;

ba bea mahosana

'na ke sa ka ka tseba.

Ka silefera le ka khauta ea bona

ba iketselitse melingoana ea bona,

kahoo Baiseraele ba tla timela.

₅Uena Samaria,

ke nyonya melingoan'a hao,

melingoan'a hao ea manamane,

khalefo ea ka

e tlōkōmela baahi ba Samaria!

Ba tla sitoa ho itlhoekisa

ho fihlela neng?

₆Namane ena

e n'e etsoe naheng ea Iseraele,

e entsoe ke lelala,

empa eona hase Molimo.

Namane ea Samaria

e tla thuakanngoa!

₇“Ba jetse moea,

ba tla kotula sefefo,

kaofela mabele a bona a phutsitse,

kahoo lijo li ke ke tsa e-ba teng;

leha eba a n'a ka beha haholo,

balichaba ba ne ba tla a lobela.

₈Baiseraele ba koentsoe,

ba koentsoe bokoilitane,

joale ba se ba loeba

kahar'a balichaba,

ba ka ntho e s'e se na molemo.

₉Ba nyolohile, ba ikela Asiria,

sa tonki e hlaha, e lelerang le naha;

Efraime eena o ikhiretse basireletsi.

₁₀Le hoja ba ithekisitse,

ba ithekisitse ho balichaba,

'na ke tla ba phutha, ke ba bokelle.

Ba tla qala ho fella likobong,

ha ba hatelloa ke khosi ea Asiria.

₁₁“Le hoja Efraime

a hahile lialetare tse ngata,

a tl'a etsetse tefelo ea sebe ho tsona,

aletare tsena

li fetohile sentele sa libe.

₁₂Ke mo ngoletse melao

e se nang palo,

empa o e talima e le ntho tsa basele.

₁₃Ba nketsetsa linyehelo,

nyehelo tsa mahlabelo,

ba itjella nama eo ea mahlabelo,

empa ho 'na Morena,

ha a amohelehe.

ke tla hopola bokhopo ba bona,

ke ba otlele libe tsa bona,

ke ba khutlisetse naheng ea Egepeta.

₁₄Iseraele o lebetse 'Mōpi oa hae,

a haha matlo a likhosi tsa hae;

Juda o hahile metse e mengata,

metse e hahelelitsoeng,

empa metse eo

ke tla e chesa ka mollo,

o chese matlo a eona a bokhosi.”