HOSEA 5

₁“Lōna baprista, utloang mona!

Lōna ba ntlo ea Iseraele,

elang hloko!

Lōna ba ntlo ea khosi,

sekehang litsèbè!

Kahlōlo ena e tobane le lōna:

Le bile leraba la ho tšoasa Misepa,

letlōoa le aliloeng holim'a Tabore.

₂Bafetoheli ba tetebetse har'a lipolao,

ke tla ba otla kaofela ha bona.

₃Tsa Efraime ke li tseba sethapo,

tsa Iseraele hase bofihla ho 'na.

Uena Efraime, u etsa bootsoa,

Iseraele eena o itšilafalitse.”

₄“Liketso tsa bona lia ba thibela,

ba sitoa ho khutla,

ho khutlela ho Molimo oa bona.

Moea oa bootsoa o s'o ba hapile,

Morena eena ha ba mo tsotelle.

₅Boikhōhōmōso ba Iseraele

boa mo ahlōla,

Iseraele le Efraime

ba tla khōthōmetseha,

ba be ba oe

ka baka la bokhopo ba bona,

Juda le eena a oe le bona.

₆Ba tla ea ka mehlape

ea likhutšoane le ea makhomo,

ba ee ka eona ho ea batla Morena,

empa ha ba ka ke ba mo fumana,

hobane eena o arohane le bona.

₇Ha baa ka ba tšepahala ho Morena,

ba mo tsoaletse bana,

bana ba likhaupane.

Joale etlare ha khoeli e thoasa,

ba timetsoe le masimo a bona.”

₈“Letsang lenaka le le Gibea,

le letse terompeta le le Rama;

hlabang mokhosi le le Bete-Afene,

pele-ea-pele uena Benjamine!

₉Mohl'a le fihlang tsatsi la kahlōlo,

naha ea Efraime

e tla fetoha nanaola.

Ke phatlalletsa merabe ea Iseraele,

ke e phatlalletsa seo e leng 'nete.

₁₀Mahosana a Juda

a ka ba tsekang meeli,

ba suthisang

mekolokotoane ea meeli.

Ke tla hlatsa khalefo ea ka,

ke e hlatsetse holim'a 'ona,

ke e tšollele holim'a 'ona,

ke e tšollele sa morallo oa metsi.

₁₁Efraime o hateletsoe,

o hlōtsoe ke nyeoe,

hobane a n'a batla thuso,

a e batla ho melingoana.

₁₂Ho ba ntlo ea Efraime

ke tšoana le tšoèlè,

ho ba ntlo ea Juda ke ka libōkō.

₁₃“Ha Efraime

a bona boloetse ba hae,

Juda eena a bona liso tsa hae,

Efraime eena

a ikela naheng ea Asiria,

a ea kōpa thuso

ho khosi ea mohlabani.

Empa khosi e sitiloe ho mo folisa,

ea hlōloa ho phekola liso tsa hae.

₁₄Ho ba ntlo ea Efraime

ke tla tšoana le tau,

ho ba ntlo ea Juda eke ke taoana.

'Na ka sebele

ke tla harōla, ke ikele,

ke ba hlasinye,

ba hloke monamoleli.

₁₅Ke tla tsamaea ke ikhutlelle haeso,

ho fihlela ba lumela molato oa bona,

ba o lumela, ba bile ba mpatla.

Matšoenyehong a bona

ba tla mpatla, ba mpatlisise.”